2026 ലോകകപ്പ് യോഗ്യത മത്സരത്തിൽ ഉറുഗ്വായെ പരാജയപ്പെടുത്തി അർജന്റീന തകർപ്പൻ വിജയം സ്വന്തമാക്കിയിരുന്നു. മത്സരത്തിൽ എതിരില്ലാത്ത ഒരു ഗോളിനാണ് അർജന്റീന വിജയിച്ചത്. മത്സരത്തിൽ അർജന്റീനക്കൊപ്പം ഒരു പുതിയ നാഴികക്കല്ലാണ് ഗോൾ കീപ്പർ എമിലിയാനോ മാർട്ടിനസ് സ്വന്തമാക്കിയത്. അർജന്റീനക്കായി 50 മത്സരങ്ങൾ പൂർത്തിയാക്കാനാണ് എമിലിയാനോക്ക് സാധിച്ചത്. 

ഈ മത്സരങ്ങളിൽ നിന്നുമായി 36 ക്ലീൻ ഷീറ്റുകളാണ് മാർട്ടിനസ് സ്വന്തമാക്കിയിട്ടുള്ളത്. അർജന്റീനക്കൊപ്പം നാല് കിരീടങ്ങളാണ് സമീപ കാലങ്ങളിൽ മാർട്ടിനസ് നേടിയെടുത്തത്. അർജന്റീനക്കായി ഏറ്റവും കൂടുതൽ മത്സരങ്ങൾ കളിക്കുന്ന മൂന്നാമത്തെ ഗോൾ കീപ്പർ കൂടിയാണ് മാർട്ടിനസ്. 94 മത്സരങ്ങളിൽ അർജന്റീനയുടെ ഗോൾ കീപ്പറായി കളത്തിലിറങ്ങിയ സെർജിയോ റൊമേറോയാണ് ഈ പട്ടികയിൽ ഒന്നാം സ്ഥാനത്തുള്ളത്. 54 മത്സരങ്ങളുമായി ഉബാൾഡോ ഫില്ലോളിനിയുമാണ് രണ്ടാം സ്ഥാനത്തുള്ളത്. 

അതേസമയം മത്സരത്തിൽ സൂപ്പർ താരം ലയണൽ മെസി ഇല്ലാതെയായിരുന്നു അർജന്റീന കളത്തിലിറങ്ങിയത്. മേജർ ലീഗ് സോക്കറിൽ അറ്റ്ലാൻഡ യൂണൈറ്റഡിനെതിരെയുള്ള മത്സരത്തിലായിരുന്നു മെസിക്ക് പരുക്ക് പറ്റിയിരുന്നത്. അർജന്റീനക്കായി തിയാഗോ അൽമാഡയാണ് ഗോൾ നേടിയത്. മത്സരത്തിൽ രണ്ടാം പകുതിയിൽ ആയിരുന്നു താരത്തിന്റെ ഗോൾ പിറന്നത്. എതിർ ടീമിന്റെ പോസ്റ്റിന്റെ പുറത്തു നിന്നും ഒരു തകർപ്പൻ ഷോട്ടിലൂടെ താരം ലക്ഷ്യം കാണുകയായിരുന്നു. മത്സരത്തിന്റെ ഇഞ്ചുറി ടൈമിൽ നിക്കോളാസ് ഗോൺസാലസ് ചുവപ്പ് കാർഡ് കണ്ട് പുറത്തായിരുന്നു. 

ലാറ്റിനമേരിക്കൻ ലോകകപ്പ് യോഗ്യതാ ഗ്രൂപ്പിൽ 13 മത്സരങ്ങളിൽ നിന്നും ഒമ്പത് വിജയവും ഒരു സമനിലയും മൂന്ന് തോൽവിയുമായി 28 പോയിന്റുമായി ഒന്നാം സ്ഥാനത്താണ് അർജൻറീന. 22 പോയിന്റോടെ ഇക്വഡോർ രണ്ടാം സ്ഥാനത്തും 21 പോയിന്റ് നേടിയ ബ്രസീൽ മൂന്നാം സ്ഥാനത്തുമാണ് ഉള്ളത്. മാർച്ച് 26ന്‌ ബ്രസീലിനിനെതിരെയാണ് അർജന്റീനയുടെ അടുത്ത മത്സരം. 2026 ഫിഫ ലോകകപ്പിന് അമേരിക്ക, കാനഡ, മെക്സിക്കോ എന്നീ രാജ്യങ്ങളാണ് ആതിഥേയരാകുന്നത്.

Emiliano Martnez create a new record in Argentina football team history