കൊച്ചി: പൊതുനിരത്തില്‍ തള്ളിക്കളഞ്ഞ മാലിന്യം വിലാസം നോക്കി കണ്ടുപിടിച്ച് തിരിച്ച് അവിടേക്ക് തന്നെ അയച്ച് ശുചീകരണ തൊഴിലാളികള്‍. കളമശേരിയിലാണ് സംഭവം. പതിനെട്ടാം വാര്‍ഡിലെ റോഡരികില്‍ മൂന്ന് ചാക്ക് മാലിന്യമാണ് തൃക്കാക്കരയില്‍ താമസിക്കുന്ന ആള്‍ കൊണ്ടുവന്ന് തളളിക്കളഞ്ഞത്. നഗരസഭയുടെ ശുചീകരണ വിഭാഗത്തിലെ ജീവനക്കാരാണ് ജോലിക്ക് എത്തിയപ്പോള്‍ ചാക്ക് കണ്ടത്. തുറന്നു നോക്കിയപ്പോഴാണ് മാലിന്യമാണെന്ന് കണ്ടത്. 

മാലിന്യത്തില്‍ നിന്നും വിലാസം കണ്ടെടുത്തതോടെയാണ് ഉടമയിലേക്കെത്തിയത്. വേറൊരാളാണ് മാലിന്യം കൊണ്ടിട്ടത്. ഇയാള്‍ മാലിന്യം വഴിയില്‍ കളയുകയായിരുന്നുവെന്നാണ് വീട്ടുടമയുടൊ മൊഴി. മുനിസിപ്പല്‍ നിയമപ്രകാരം 15000 രൂപ പിഴ ഈടാക്കുകയും കര്‍ശന താക്കീത് നല്‍കുകയും ചെയ്തു. പൊതുനിരത്തില്‍ മാലിന്യം തള്ളുന്നവര്‍ക്കെതിരേ കര്‍ശന നടപടി സ്വീകരിക്കാനാണ് കൗണ്‍സിലിന്റെ തീരുമാനം.

നഗരത്തിലെ പ്രധാന മാലിന്യ നിക്ഷേപ കേന്ദ്രങ്ങളായി മാറിയിരിക്കുകയാണ് എന്‍എഡി, സിപോര്‍ട്ട് -യെര്‍പോട്ട് റോഡ് എന്നിവ. എന്‍ഫോഴ്‌സ്‌മെന്റ് സ്‌ക്വാഡ് നടത്തിയ പരിശോധനയില്‍ ലഭിച്ച വിലാസങ്ങള്‍ പ്രകാരം പൊതുസ്ഥലത്ത് മാലിന്യം തള്ളുന്നതിന് നോട്ടിസയച്ച് പിഴ ഈടാക്കുന്ന നടപടി ഉണ്ടാവുന്നതാണ്.