ഹൈദരാബാദ്: ഐപിഎല്ലിൽ ആദ്യ മത്സരത്തിൽ രാജസ്ഥാൻ റോയൽസിന് തോൽവി. സൺറൈസേഴ്‌സ് ഹൈദരാബാദ് 44 റൺസിനാണ് രാജസ്ഥാനെ തകർത്തുവിട്ടത്. ഓറഞ്ച് ആർമിയുടെ തട്ടകമായ ഹൈദരാബാദ് രാജീവ് ഗാന്ധി സ്റ്റേഡിയത്തിൽ നടന്ന മത്സരത്തിൽ ടോസ് നേടിയ രാജസ്ഥാൻ എതിരാളികളെ ബാറ്റിംഗിനയക്കുകയായിരുന്നു. ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഹൈദരാബാദ് 20 ഓവറിൽ ആറ് വിക്കറ്റ് നഷ്ടത്തിൽ 286 റൺസിന്റെ കൂറ്റൻ ടോട്ടലാണ് നേടിയത്. വിജയലക്ഷ്യം പിന്തുടർന്നിറങ്ങിയ രാജസ്ഥാൻ 20 ഓവറിൽ ആറ് വിക്കറ്റ് നഷ്ടത്തിൽ 242 റൺസാണ് നേടിയത്. 

മത്സരം പരാജയപ്പെട്ടെങ്കിലും രാജസ്ഥാൻ റോയൽസിനൊപ്പം ഒരു ചരിത്ര നേട്ടമാണ് മലയാളി താരം സഞ്ജു സാംസൺ സ്വന്തമാക്കിയത്. ഐപിഎല്ലിന്റെ ചരിത്രത്തിൽ രാജസ്ഥാൻ റോയൽസിന് വേണ്ടി 4000 റൺസ് പൂർത്തിയാക്കാനാണ് സഞ്ജുവിന് സാധിച്ചത്. ഈ നേട്ടത്തിലെത്തുന്ന ആദ്യത്തെ രാജസ്ഥാൻ റോയൽസ് താരം കൂടിയാണ് സഞ്ജു എന്നുള്ളതാണ് ഈ റെക്കോർഡിനെ കൂടുതൽ സ്പെഷ്യലാക്കുന്നത്.

 

മത്സരത്തിൽ 37 പന്തിൽ 66 റൺസ് നേടിയാണ് സഞ്ജു തിളങ്ങിയത്. 178.38 പ്രഹര ശേഷിയിൽ ഏഴ് ഫോറുകളും നാല് സിക്സുകളുമാണ്‌ സഞ്ജു അടിച്ചെടുത്തത്. സഞ്ജുവിന് പുറമേ ധ്രുവ് ജുറലും അർദ്ധ സെഞ്ച്വറി നേടി. 35 പന്തിൽ അഞ്ച് ഫോറുകളും ആറ് സിക്സുകളും ഉൾപ്പെടെ 70 റൺസായിരുന്നു ജുറൽ നേടിയത്. ഷിർമോൺ ഹെറ്റ്മെയർ 23 പന്തിൽ 42 റൺസും ശുഭം ദൂബെ 11 പന്തിൽ പുറത്താവാതെ 34 റൺസും നേടി. 

അതേസമയം ആദ്യം ബാറ്റ് ചെയ്ത ഹൈദരാബാദിനായി സെഞ്ച്വറി നേടി ഇഷാൻ കിഷൻ മിന്നും പ്രകടനമാണ് നടത്തിയത്. 47 പന്തിൽ പുറത്താവാതെ 106 റൺസ് നേടിയിരുന്നു ഇഷാന്റെ വെടിക്കെട്ട്. 11 ഫോറുകളും ആറ് കൂറ്റൻ സിക്സുകളും അടങ്ങുന്നതായിരുന്നു താരത്തിന്റെ ഇന്നിങ്‌സ്. ട്രാവിസ് ഹെഡ് 31 പന്തിൽ 67 റൺസും നേടി മികച്ച പ്രകടനം കാഴ്ചവെച്ചു. ഒമ്പത് ഫോറുകളും മൂന്ന് സിക്സുകളും അടങ്ങുന്നതായിരുന്നു താരത്തിന്റെ ഇന്നിങ്സ്. ഹെൻറിച്ച് ക്ലാസൻ 14 പന്തിൽ നിന്നും 34 റൺസും നിതീഷ് കുമാർ റെഡ്ഢി 15 പന്തിൽ നിന്നും 30 റൺസും നേടി വലിയ ടോട്ടൽ പടുത്തുയർത്തുന്നതിൽ നിർണായകമായി. 

മാർച്ച്‌ 26ന് കൊൽക്കത്ത നൈറ്റ്‌ റൈഡേഴ്‌സിനെതിരെയാണ് രാജസ്ഥാന്റെ അടുത്ത മത്സരം. തൊട്ടടുത്ത ദിവസം നടക്കുന്ന മത്സരത്തിൽ ലഖ്നൗ സൂപ്പർ ജയന്റ്സിനെയാണ് ഹൈദരാബാദ് നേരിടുക.

Sanju Samson is the first Rajasthan Royals player to score 4000 runs in ipl history