ലിസ്ബൺ: രാജ്യാന്തര തലത്തിലും തന്റെ ഗോളടി മേളം തുടർന്നിരിക്കുകയാണ് പോർച്ചുഗീസ് സൂപ്പർതാരം ക്രിസ്റ്റ്യാനോ റൊണാൾഡോ. യുവേഫ നേഷൻസ് ലീഗിന്റെ ക്വാർട്ടർ ഫൈനലിൽ ഡെന്മാർക്കിനെതിരെയാണ് റൊണാൾഡോ ഗോൾ നേടിയത്. ക്വാർട്ടർ ഫൈനലിലെ രണ്ടാം പാദ മത്സരത്തിൽ പോർച്ചുഗൽ 5-2 എന്ന സ്കോറിന്റെ തകർപ്പൻ വിജയമാണ് സ്വന്തമാക്കിയത്.

 മത്സരത്തിന്റെ ആദ്യ പകുതിയിൽ ലഭിച്ച പെനാൽറ്റി റൊണാൾഡോ നഷ്‍ടമാക്കിയിരുന്നു. എന്നാൽ രണ്ടാം പകുതിയിൽ റൊണാൾഡോ ലക്ഷ്യം കാണുകയായിരുന്നു. ഈ ഗോളിന് പിന്നാലെ പോർച്ചുഗലിനായി 40+ വയസ്സിൽ ഗോൾ നേടുന്ന രണ്ടാമത്തെ താരമായി മാറാനും റൊണാൾഡോക്ക് സാധിച്ചു. 40ാം വയസിൽ പോർച്ചുഗലിനായി ഗോൾ നേടിയ ആദ്യ താരം പെപ്പയാണ്. ഈ ഗോളോടെ ഫുട്ബോൾ കരിയറിലെ തന്റെ ഗോൾ നേട്ടം 929 ആക്കി ഉയർത്താനും പോർച്ചുഗീസ് ഇതിഹാസത്തിന് സാധിച്ചു. 71 ഗോളുകൾ കൂടി നേടിയാൽ ഫുട്ബോളിൽ 1000 ഗോളുകളെന്ന നാഴികക്കല്ലിലേക്കും റൊണാൾഡോക്ക് നടന്നുകയറാൻ സാധിക്കും. 

അതേസമയം ടൂർണമെന്റിലെ ക്വാർട്ടർ ഫൈനലിൽ ഡെന്മാർക്കിനെ 5-3 എന്ന അഗ്രിഗേറ്റ് സ്കോറിന് മറികടന്നാണ് പോർച്ചുഗൽ സെമിഫൈനൽ യോഗ്യത ഉറപ്പാക്കിയത്. ആദ്യ പാദ മത്സരത്തിൽ ഏകപക്ഷീയമായ ഒരു ഗോളിന് പോർച്ചുഗൽ ഡെന്മാർക്കിനോട് പരാജയപ്പെട്ടിരുന്നു. എന്നാൽ രണ്ടാം പാദ  മത്സരത്തിൽ റൊണാൾഡോയും സംഘവും ശക്തമായി തിരിച്ചു വരുകയായിരുന്നു. 

മത്സരത്തിൽ റൊണാൾഡോയ്ക്ക് പുറമേ  പോർച്ചുഗലിനായി ഫ്രാൻസിസ്കോ ട്രിങ്കോ ഇരട്ടഗോളുകൾ നേടി തിളങ്ങി. ജോക്കിം ആൻഡേഴ്സൺ(ഓൺ ഗോൾ), ഗോൺസാലോ റാമോസ് എന്നിവരുടെ ഗോളുകളും പോർച്ചുഗലിന്റെ വിജയത്തിൽ നിർണായകമായി. ഡെന്മാർക്കുവേണ്ടി റാസ്മസ് ക്രിസ്റ്റൻസൺ, ക്രിസ്റ്റ്യൻ എറിക്സൺ എന്നിവരാണ് ഗോളുകൾ നേടിയത്.   

ജൂൺ അഞ്ചിന് നടക്കുന്ന സെമി ഫൈനൽ പോരാട്ടത്തിൽ ജർമനിയാണ് റോബർട്ടോ മാർട്ടിനസിന്റെയും കൂട്ടരുടെയും എതിരാളികൾ. മറ്റൊരു സെമി ഫൈനലിൽ നിലവിലെ യൂറോ കപ്പ് ചാമ്പ്യന്മാരായ സ്‌പെയ്ൻ ഫ്രാൻസിനെയും നേരിടും. 

Cristaino Ronaldo Create a Record for Portugal in UEFA Nations league