അബൂദബി: ചെറിയ പെരുന്നാളിനോടനുബന്ധിച്ച് യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ 1,295 തടവുകാരെ മോചിപ്പിക്കാന്‍ ഉത്തരവിട്ടു. ഇതോടൊപ്പം ദുബൈ ഭരണാധികാരിയും പ്രധാനമന്ത്രിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം 1,518 തടവുകാര്‍ക്ക് മാപ്പുനല്‍കുകയും ചെയ്തു. വിശുദ്ധ മാസത്തില്‍ കാരുണ്യത്തിന്റെയും അനുരഞ്ജനത്തിന്റെയും പ്രതീകമായിട്ടാണ് യുഎഇ നേതാക്കളുടെ നടപടി. ചെറിയ പെരുന്നാളിന് മുന്നോടിയായി മോചിപ്പിക്കപ്പെടുന്നവരില്‍ 500ലധികം ഇന്ത്യന്‍ പൗരന്മാരും ഉള്‍പ്പെടുന്നു. ഇന്ത്യയുമായുള്ള ബന്ധത്തില്‍ യുഎഇയുടെ പ്രതിബദ്ധതയും നീതിയോടും നയതന്ത്രത്തോടുമുള്ള വിശാലമായ സമീപനവും ഇത് എടുത്തുകാണിക്കുന്നുവെന്ന് അധികൃതര്‍ പറഞ്ഞു.

ഉത്തര്‍പ്രദേശ് സ്വദേശിയായ ഷഹ്‌സാദി ഖാനെ യുഎഇയില്‍ വധശിക്ഷയ്ക്ക് വിധേയമാക്കിയതിന് ദിവസങ്ങള്‍ക്ക് ശേഷമാണ് ഇന്ത്യന്‍ പൗരന്മാരുടെ മോചനം സംഭവിക്കുന്നത്. കൊലപാതകക്കുറ്റത്തിന് ശിക്ഷിക്കപ്പെട്ട മലയാളികളായ മുഹമ്മദ് റിനാഷ് അരങ്കിലോട്ട്, മുരളീധരന്‍ പെരുംതട്ട വളപ്പില്‍ എന്നിവരെയും കഴിഞ്ഞമാസം വധശിക്ഷയ്ക്കിരയാക്കിയിരുന്നു.

ദുബായിലെ തിരുത്തല്‍, ശിക്ഷാ കേന്ദ്രങ്ങളില്‍ തടവിലാക്കപ്പെട്ട വിവിധ രാജ്യക്കാരായ വ്യക്തികള്‍ക്കാണ് ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം നല്‍കിയ മാപ്പ് ബാധകമാകുക. കൊലപാതകം, ലഹരി കടത്ത് ഉള്‍പ്പെടെ കൊടിയ കുറ്റകൃത്യങ്ങളില്‍ ഉള്‍പ്പെട്ടിട്ടില്ലാത്തവര്‍ക്കാകും ഇതിന്റെ ആനുകൂല്യം ലഭിക്കുക. 

ശിക്ഷ അനുഭവിച്ചവര്‍ക്ക് പുതിയ തുടക്കം നല്‍കുന്നതിനുള്ള ഷെയ്ഖ് മുഹമ്മദിന്റെ താല്‍പ്പര്യത്തെ ഈ തീരുമാനം പ്രതിഫലിപ്പിക്കുന്നുവെന്ന് ദുബായ് അറ്റോര്‍ണി ജനറല്‍ ചാന്‍സലര്‍ ഇസ്സാം അല്‍ഹുമൈദാന്‍ പറഞ്ഞു. ദുബായ് പോലീസുമായി സഹകരിച്ച് ദുബായ് പബ്ലിക് പ്രോസിക്യൂഷന്‍ അവരുടെ മോചനത്തിനുള്ള നിയമ നടപടിക്രമങ്ങള്‍ നടപ്പാക്കിവരികയാണ്.

ജയില്‍ മോചിതരായ തടവുകാരുടെ സാമ്പത്തിക ബാധ്യതകള്‍ പരിഹരിക്കുമെന്ന് ഷെയ്ഖ് മുഹമ്മദ് ബിന്‍ സായിദ് പ്രഖ്യാപിച്ചു. തടവുകാരുടെയും അവരുടെ കുടുംബങ്ങളുടെയും ഭാരങ്ങള്‍ ലഘൂകരിക്കുന്നതിനും അവരുടെ വീടുകളില്‍ ഉറപ്പാക്കാനും പുതുതായി ജീവിതം ആരംഭിക്കാനും ഇതുവഴി കഴിയുമെന്നും അധികൃതര്‍ അറിയിച്ചു.