നോയിഡ: ഗ്രേറ്റർ നോയിഡ നോളജ് പാർക്ക്-3ൽ സ്ഥിതി ചെയ്യുന്ന അന്നപൂർണ ഗേൾസ് ഹോസ്റ്റലിൽ വൻ തീപിടുത്തം. എയർ കണ്ടീഷണറിന്റെ കംപ്രസർ പൊട്ടിത്തെറിച്ചതിനെ തുടർന്ന് ഉണ്ടായ അപകടത്തിൽ 160-ഓളം വിദ്യാർത്ഥികൾ ഉള്ള ഹോസ്റ്റലിൽ ഭീതി പരന്നു.

കഴിഞ്ഞ ദിവസം വൈകുന്നേരം ഒരു എയർ കണ്ടീഷണറിന്റെ കംപ്രസർ പൊട്ടിത്തെറിച്ചതോടെയാണ് തീ പടർന്നത്. തീ വേഗത്തിൽ വ്യാപിച്ചതോടെ അകത്ത് ഉണ്ടായിരുന്ന പെൺകുട്ടികൾ ബാൽക്കണിയിലൂടെ ഇറങ്ങി രക്ഷപ്പെടാൻ ശ്രമിച്ചു. രണ്ടാം നിലയിൽ നിന്ന് ഇറങ്ങാൻ ശ്രമിക്കവെ വഴുതി വീണ ഒരു വിദ്യാർത്ഥിനിക്ക് പരിക്കേറ്റു. അവരെ ഉടൻ ആശുപത്രിയിൽ പ്രവേശിപ്പിച്ചു.

അപകട വിവരം ലഭിച്ചതോടെ അഗ്നിശമന സേനയുടെ രണ്ട് യൂണിറ്റുകൾ സ്ഥലത്തെത്തി തീയണയ്ക്കാൻ ശ്രമിച്ചു. പ്രദേശവാസികളും രക്ഷാപ്രവർത്തനത്തിൽ പങ്കുചേർന്നു. ഒടുവിൽ, തീ പൂർണമായും നിയന്ത്രിക്കാനായി. നോയിഡ ചീഫ് ഫയർ ഓഫീസർ പ്രദീപ് കുമാർ അറിയിച്ചു.

ബാൽക്കണിയിൽ നിന്നിറങ്ങാൻ നാട്ടുകാർ സഹായിച്ചുകൊടുത്ത ഗോവണിയിലൂടെ വിദ്യാർത്ഥികൾ സുരക്ഷിതമായി ഇറങ്ങുന്നതിന്റെ ദൃശ്യങ്ങൾ പുറത്ത് വന്നിട്ടുണ്ട്. ഇങ്ങനെയിറങ്ങുമ്പോഴാണ് ഒരു കുട്ടിക്ക് ബാലൻസ് തെറ്റി വീണ് പരിക്കേറ്റത്. മറ്റാർക്കും സാരമായ പരിക്കുകളില്ല. അഗ്നിശമന സേന തീപിടുത്തത്തിന്റെ കാരണം വിശദമായി പരിശോധിക്കുന്നുണ്ട്. പോലീസ് ആവശ്യമായ നിയമ നടപടികൾ സ്വീകരിച്ചിട്ടുണ്ടെന്നും അധികൃതർ അറിയിച്ചു.

A massive fire broke out at Annapurna Girls' Hostel in Greater Noida Knowledge Park-3 after an AC compressor exploded. Panic ensued as 160 students attempted to escape. One student sustained injuries after slipping while climbing down the balcony. Firefighters arrived promptly and extinguished the fire. No other injuries were reported.