ഉത്തർപ്രദേശ്: സ്കൂൾ ഫീസ് അടക്കാത്തതിനാൽ പരീക്ഷ എഴുതാൻ സ്കൂൾ അധികൃതർ സമ്മതിക്കാത്തതിന് പിന്നാലെ 17കാരി ആത്മഹത്യ ചെയ്തു. ഉത്തർപ്രദേശിലെ പ്രതാപ്ഗഡ് ജില്ലയിലാണ് സംഭവം നടന്നത്. ശനിയാഴ്ചയാണ് പരീക്ഷയെഴുതാനായി വിദ്യാർത്ഥിനി സ്കൂളിൽ എത്തിയിരുന്നത്. എന്നാൽ ഫീസ് അടക്കാത്തതിനെ തുടർന്ന് സ്കൂൾ അധികൃതർ വിദ്യാർത്ഥിനിയെ പരീക്ഷയെഴുതാൻ അനുവദിക്കാതെ പോവുകയായിരുന്നു. ഇത് ചൂണ്ടിക്കാട്ടി 17കാരിയുടെ അമ്മ പൊലിസിൽ പരാതി നൽകിയിരുന്നു. 

ഇതിനുപുറമേ സ്കൂൾ മാനേജരായ സന്തോഷ് കുമാർ യാദവ്, ഓഫീസറായ ദീപക്ക് സരോജ്, പ്രിൻസിപ്പലായ രാജ്‌കുമാർ യാദവ്‌ എന്നിവർ വിദ്യാർഥിനിയെ പരസ്യമായി അപമാനിച്ചെന്നും ഇതിൽ മനംനൊന്താണ് തന്റെ മകൾ ആത്മഹത്യ ചെയ്തതെന്നും അമ്മയുടെ പരാതിയിൽ പറയുന്നുണ്ട്. സംഭവത്തിൽ സെക്ഷൻ 107 പ്രകാരം പൊലിസ് കേസ് രജിസ്റ്റർ ചെയ്തിട്ടുണ്ട്. സംഭവത്തിൽ അന്വേഷണം നടന്നുകൊണ്ടിരിക്കുകയാണെന്നും പൊലിസ് അറിയിച്ചു. 

താൻ ജോലിക്ക് പോയി തിരിച്ചെത്തിയ സമയത്തായിരുന്നു മകളെ മരിച്ച നിലയിൽ കണ്ടെത്തിയതെന്ന് അമ്മ പറഞ്ഞു. ഫീസിൽ 1500 രൂപ ആദ്യം അടച്ചിരുന്നുവെന്നും ബാക്കി 800 രൂപ മാത്രമായിരുന്നു കൊടുക്കാൻ ഉണ്ടായിരുന്നതെന്നും പരാതിയിൽ പറയുന്നുണ്ട്.

School authorities refused to allow her to write exams after she failed to pay school fees 17 year old girl commits suicide