കൊല്ലം: കേരളത്തിലേക്ക് എംഡിഎംഎ വിതരണം ചെയ്യുന്ന പ്രധാന മോത്ത വിതരണക്കാരനായ നൈജീരിയൻ സ്വദേശിയെ ഇരവിപുരം പൊലീസ് ഡൽഹിയിൽ നിന്ന് സാഹസികമായി പിടികൂടി. 29കാരനായ അഗ്ബെഡോ അസൂക്ക സോളമനാണ് അറസ്റ്റിലായത്.

കൊല്ലത്ത് ഏറ്റവും വലിയ ലഹരി വേട്ട

കൊല്ലം നഗരത്തിലെ ഈ വർഷത്തെ ഏറ്റവും വലിയ എംഡിഎംഎ വേട്ടയിലൂടെയാണ് അസൂക്കയുടെ അറസ്റ്റിലേക്ക് പൊലീസ് എത്തിയത്. മാർച്ച് 11നാണ് സിറ്റി പൊലീസ് കമ്മീഷണർ കിരൺ നാരായണൻ്റെ നേതൃത്വത്തിൽ 90 ഗ്രാം എംഡിഎംഎ പിടികൂടിയത്. ഡൽഹിയിൽ നിന്ന് വിമാനമാർഗം ലഹരി മരുന്ന് എത്തിച്ച ഉമയനല്ലൂർ സ്വദേശി ഷിജുവിനെ അന്നേ ദിവസം അറസ്റ്റ് ചെയ്തു. തുടർന്നുള്ള അന്വേഷണത്തിൽ കൂട്ടുപ്രതികളായ ആസിംഖാൻ, റാഫിഖ്, ഫൈസൽ എന്നിവരും പിടിയിലായി.

ഡൽഹിയിൽ സാഹസികമായ അറസ്റ്റ്

പ്രതികളെ ചോദ്യം ചെയ്തതോടെ ലഹരിമരുന്ന് ഡൽഹിയിലെ നൈജീരിയൻ സ്വദേശിയിലൂടെ എത്തിയതാണെന്ന് വ്യക്തമായി. ഇതിന്റെ അടിസ്ഥാനത്തിൽ, സിറ്റി പൊലീസ് കമ്മീഷണറുടെ നിർദ്ദേശപ്രകാരം ഇരവിപുരം എസ്.ഐ രാജീവിന്റെ നേതൃത്വത്തിൽ ഒരു സംഘം മാർച്ച് 27ന് ഡൽഹിയിലേക്ക് പോയി. അന്വേഷണത്തിന് മേൽനോട്ടം വഹിച്ചത് സിറ്റി എസിപി എസ്. ഷെരീഫ് ആയിരുന്നു.

പ്രതികളെ സഹായിച്ച ഫൈസലിനെ പൊലീസ് സംഘത്തിനൊപ്പം കൂട്ടിയായിരുന്നു പ്രതിയെ പിടികൂടാനുള്ള നീക്കം. മൂന്ന് ദിവസം നീണ്ട പരിശ്രമത്തിനൊടുവിൽ അസൂക്കയെ പിടികൂടാനായി. തുടർന്ന് ഡൽഹി പൊലീസിന്റെ പ്രോട്ടോക്കോളുകൾ പൂർത്തിയാക്കിയശേഷം, ട്രെയിൻ മാർഗം പ്രതിയെ കൊല്ലത്തേക്ക് കൊണ്ടുവന്നു.

കൂടുതൽ കണ്ണികൾ 

അസൂക്കയെ വിശദമായി ചോദ്യംചെയ്യുന്നതിനൊപ്പം ലഹരി ശൃംഖലയിലെ മറ്റ് കണ്ണികളെ കണ്ടെത്താനും അന്വേഷണം തുടരുന്നതായി പൊലീസ് അറിയിച്ചു. കേസിൽ കൂടുതൽ പ്രതികൾക്കായുള്ള അന്വേഷണം പുരോഗമിക്കുകയാണ്.

Iravipuram police arrested Nigerian national Agbedo Asuka Solomon, a major MDMA supplier to Kerala, in a daring operation in Delhi. The arrest follows the seizure of 90 grams of MDMA in Kollam on March 11. Investigations led to Asuka, and a police team, along with an arrested accomplice, tracked her down after a three-day search. The accused was brought to Kollam by train for further questioning as authorities continue investigating the drug network.