ഡല്‍ഹി: വഖഫ് ഭേദഗതി ബില്‍ പാസാക്കാനുള്ള നീക്കവുമായി കേന്ദ്രം മുന്നോട്ട്. ബജറ്റ് സമ്മേളനം അവസാനിക്കാന്‍ മൂന്നുദിവസം ബാക്കിനില്‍ക്കെ ബില്ല് അവതരിപ്പിക്കാന്‍ തന്നെയാണ് കേന്ദ്ര തീരുമാനം.  ബില്ല് ഈ സമ്മേളന കാലയളവില്‍ അവതരിപ്പിക്കുമെന്ന് പാര്‍ലമെന്ററികാര്യ മന്ത്രി കിരണ്‍ റിജിജു ഇന്നലെ വ്യക്തമാക്കിയിരുന്നു. പുതുക്കിയ ഭേദഗതികള്‍ക്ക് മേല്‍ പാര്‍ലമെന്റില്‍ ചര്‍ച്ച നടക്കുമെന്നും കിരണ്‍ റിജിജു പറഞ്ഞു. 

ബുധനാഴ്ച തന്നെ ബില്‍ സഭയില്‍ അവതരിപ്പിക്കാനാണ് നീക്കം. ലോക്‌സഭയിലായിരിക്കും ആദ്യം അവതരിപ്പിക്കുക. കൂടിയാലോചനകള്‍ക്ക് ശേഷം ബില്‍ അവതരിപ്പിക്കുന്ന സമയം തീരുമാനിക്കുമെന്നും കേന്ദ്രമന്ത്രി കൂട്ടിച്ചേര്‍ത്തു. 

ചില രാഷ്ട്രീയ പാര്‍ട്ടികളും സംഘടനകളും സമൂഹത്തെ തെറ്റിദ്ധരിപ്പിക്കാനും സംഘര്‍ഷങ്ങള്‍ സൃഷ്ടിക്കാനും നുണകള്‍ പ്രചരിപ്പിക്കുന്നുണ്ടെന്നും ബില്‍ മുസ് ലിംകളുടെ താല്‍പ്പര്യത്തിനനുസരിച്ചാണെന്നും പ്രതിപക്ഷത്തെയും മുസ്‌ലിം സംഘടനകളെയും പരാമര്‍ശിച്ചുകൊണ്ട് റിജിജു ചൂണ്ടിക്കാട്ടി. 

ബി.ജെ.പിയുടെ 22 ഭേദഗതികള്‍ അംഗീകരിച്ച ജെ.പി.സി പ്രതിപക്ഷത്തിന്റെ 44 ഭേദഗതികളും തള്ളികയായിരുന്നു. 

അതിനിടെ, രാഹുല്‍ ഗാന്ധിക്കെതിരായ സ്പീക്കറുടെ പ്രസ്താവനയില്‍ പ്രതിപക്ഷം ഇന്നും സഭയില്‍ ഉന്നയിക്കും.