കണ്ണൂർ: എമ്പുരാൻ സിനിമയുടെ വ്യാജ പ്രിന്റ് പിടികൂടി. കണ്ണൂർ പാപ്പിനിശ്ശേരിയിൽ നിന്നുമാണ് സിനിമയുടെ വ്യാജ പ്രിന്റ് പിടികൂടിയത്. പാപ്പിനിശ്ശേരിയിലെ തംബുരു കമ്മ്യൂണിക്കേഷൻസ് എന്ന സ്ഥാപനത്തിൽ നിന്നുമാണ് പ്രിന്റ് പിടിച്ചെടുത്തത്. സംഭവത്തിൽ ജീവനക്കാരിയെ പോലീസ് കസ്റ്റഡിയിൽ എടുത്തു. പെൻ ഡ്രൈവിലൂടെ ചിത്രത്തിന്റെ കോപ്പികൾ നൽകുകയായിരുന്നു.

നേരത്തെ വെബ് സൈറ്റുകളിൽ നിന്നും സിനിമയുടെ വ്യാജ പതിപ്പുകൾ ഡിലീറ്റ് ചെയ്തിരുന്നു. സിനിമ ഡൗൺലോഡ് ചെയ്താലും നടപടികൾ ഉണ്ടാവുമെന്ന് പൊലിസ് അറിയിച്ചിരുന്നു. സിനിമ റിലീസ് ചെയ്ത് മണിക്കൂറുകൾക്കുള്ളിൽ തന്നെ സിനിമയുടെ വ്യാജ പതിപ്പ് പല വെബ് സൈറ്റുകളിലും ടെലഗ്രാമിലും ഇറങ്ങിയിരുന്നു. ഇപ്പോൾ ഈ വിഷയത്തിൽ സൈബർ പൊലിസ് നിരീക്ഷണം കൂടുതൽ ശക്തമാക്കിയിരിക്കുകയാണ്. 

അതേസമയം സംഘ്പരിവാർ എതിർപ്പിന് പിന്നാലെ എമ്പുരാൻ സിനിമയിലെ ചില സീനുകളിൽ വെട്ടി മാറ്റപ്പെടും. 24 സീനുകളാണ് സിനിമയിൽ നിന്ന് വെട്ടി മാറ്റുക. പ്രധാന വില്ലൻ കഥാപാത്രത്തിന്റെ പേര് മാറ്റി. ബജ്‌റംഗി എന്ന പേര് ബൽദേവ് എന്നാക്കി മാറ്റി. സ്ത്രീകൾക്കെതിരായ അതിക്രമം വരുന്ന മുഴുവൻ സീനും ഒഴിവാക്കി.

മതചിഹ്നങ്ങളുടെ പശ്ചാത്തലത്തിൽ വാഹനങ്ങൾ കടന്നു പോകുന്ന സീൻ ഒഴിവാക്കി. എൻ.എ.ഐ പരാമർശം മ്യൂട്ട് ചെയ്തു. സിനിമയിലെ നന്ദി കാർഡിൽ നിന്ന് സുരേഷ് ഗോപിയുടെ പേര് ഒഴിവാക്കി. പ്രധാന വില്ലൻ കഥാപാത്രവും വില്ലൻ കഥാമാത്രവും തമ്മിലുള്ള സംഭാഷണത്തിലും വെട്ടുണ്ട്. പ്രഥ്വിരാജും അച്ഛൻ കഥാപാത്രവും തമ്മിലുള്ള സംഭാഷണത്തിലിും വെട്ടുണ്ട്. 

Woman arrested for selling fake version of Empuraan in Kannur