റയൽ മാഡ്രിഡ് താരങ്ങളായ വിനീഷ്യസ് ജൂനിയർ, റോഡ്രിഗോ, കിലിയൻ എംബാപ്പെ എന്നിവരെക്കുറിച്ച് സംസാരിക്കുകയാണ് ബ്രസീലിയൻ യുവതാരം എൻഡ്രിക്. റയലിലെ തന്റെ സഹതാരങ്ങളെ ലോകത്തിലെ ഏറ്റവും മികച്ച താരങ്ങളെന്നാണ് എൻഡ്രിക് വിശേഷിപ്പിച്ചത്. 

ഈ മൂന്ന് താരങ്ങൾക്കൊപ്പം കളിക്കുകയെന്നത് തന്റെ സ്വപ്നമാണെന്നും ഇവരിൽ നിന്നും ഒരുപാട് കാര്യങ്ങൾ പഠിക്കാൻ ശ്രമിക്കുന്നുണ്ടെന്നും ബ്രസീലിയൻ യുവതാരം അഭിപ്രായപ്പെട്ടു. മാഡ്രിഡ് യൂണിവേഴ്സലിന് നൽകിയ അഭിമുഖത്തിലാണ് എൻഡ്രിക് ഇക്കാര്യം പറഞ്ഞത്. 

''ഏറ്റവും മികച്ച താരങ്ങളോടൊപ്പം കളിക്കുക അവരിൽ നിന്നും ഒരുപാട് കാര്യങ്ങൾ പഠിക്കുക എന്നതെല്ലാം വിവരിക്കാൻ സാധിക്കാത്ത അനുഭവമാണ്. എനിക്ക് ഏറ്റവും പ്രധാനമായ കാര്യം അതാണ്. 18 വയസ്സുള്ളപ്പോഴാണ് ഞാൻ റയലിൽ എത്തിയത്. എനിക്ക് ജീവിതം ഒരുപാട് അസ്വദിക്കണം. ഫുട്ബോളിൽ ഒരുപാട് കാര്യങ്ങൾ ആസ്വദിക്കണം. അതാണ് ഞാൻ ചെയ്തുകൊണ്ടിരിക്കുന്നത്. റയൽ മാഡ്രിഡിനെക്കുറിച്ച് എനിക്ക് ഒരു പരാതിയുമില്ല. അവിടെ നിന്നും ഞാൻ എന്റെ മാനസികാവസ്ഥയിൽ ഒരുപാട് മാറ്റങ്ങൾ വരുത്തി. എനിക്ക് അധികം മത്സരങ്ങൾ കളിക്കാൻ അവസരം കിട്ടിയില്ലെങ്കിലും കളിക്കുമ്പോഴെല്ലാം ഞാൻ എന്റെ ടീമിനെ വിജയിപ്പിക്കാൻ ഗോളുകൾ നേടാറുണ്ട്. ലോകത്തിലെ ഏറ്റവും മികച്ച താരങ്ങളുള്ള ഒരു വലിയ ക്ലബ്ബിൽ കളിക്കുക എന്നത് എനിക്ക് ലഭിക്കുന്ന ഏറ്റവും വലിയ ഒരു പദവിയാണ്. റോഡ്രിഗോ, എംബാപ്പെ, വിനി എന്നിവർ ലോകത്തിൽ മികച്ച മൂന്ന് താരങ്ങളാണ്. അവരാണ് ഞങ്ങളുടെ ആക്രമണ നിരയിലുള്ള മൂന്ന് പേർ'' ബ്രസീലിയൻ താരം പറഞ്ഞു. 

റയലിനായി എട്ട് മത്സരങ്ങളിൽ മാത്രമേ എൻട്രിക്കിന് കളിയ്ക്കാൻ സാധിച്ചിട്ടുള്ളൂ. ഇതിൽ ഒരു ഗോളും താരം നേടിയിട്ടുണ്ട്. ലാ ലീഗയിൽ ഒരു മത്സരം മാത്രമേ താരം കളിച്ചിട്ടുള്ളൂ. ഒരു തവണ മാത്രമേ ബ്രസീലിയൻ താരത്തിന് ആദ്യ ഇലവനിൽ കളിയ്ക്കാൻ അവസരം ലഭിച്ചിട്ടുള്ളൂ. ബാക്കിയുള്ള മത്സരങ്ങളിലെല്ലാം താരം പകരക്കാരനായാണ് കളത്തിൽ ഇറങ്ങിയത്.

Endrik Picks world best three football players