നായകളെ സ്‌നേഹിക്കുന്നവര്‍ ധാരാളമുണ്ട്. സ്വന്തം മക്കളെ പോലെ കൊണ്ടു നടക്കുന്നവരും. അതുകൊണ്ട് അതിനെന്തെങ്കിലും അപകടം പറ്റിയാലും നോക്കിനില്‍ക്കാറില്ല. എന്തു റിസ്‌കെടുത്തും രക്ഷിക്കാന്‍ ശ്രമിക്കും. അതുപോലെ ഒരു സംഭവമാണ് അങ്ങ് ഫ്‌ളോറിഡയില്‍ നടന്നത്. കിം സ്‌പെന്‍സര്‍ എന്ന യുവതിയും തന്റെ നായയും കൂടെ രാത്രി നടക്കാനിറങ്ങിയതായിരുന്നു.  ഒരു തടാകത്തിനു സമീപത്തുകൂടെയായിരുന്നു കിമ്മും തന്റെ നായയായ കോനയും നടന്നിരുന്നത്. അപ്പോഴാണ് അപ്രതീക്ഷിതമായി ഒരു ചീങ്കണ്ണിയുടെ ആക്രമണം.

ആറടി നീളമുള്ള ചീങ്കണ്ണി നായെയാണ് ആക്രമിച്ചത്. പെട്ടെന്ന് നായയെ കടിക്കുകയായിരുന്നു ചീങ്കണ്ണി. ചീങ്കണ്ണിയുടെ വായയില്‍ പെട്ട നായയെ കിം രക്ഷിച്ചെടുക്കുകയും ചെയ്തു. അത് നായയെ കടിച്ചിരിക്കുകയായിരുന്നു. എന്നാല്‍ അദ്ഭുതമെന്നു തന്നെ പറയട്ടെ ഒരുപേടിയുമില്ലാതെ, ഒരു സെക്കന്‍ഡ് പോലും പാഴാക്കാതെ ചീങ്കണ്ണിയുടെ വായ തുറന്ന് തന്റെ നായയെ രക്ഷിക്കുകയായിരുന്നു കിം. നായയുടെ തലമുഴുവന്‍ അതിന്റെ വായ്ക്കുള്ളിലായിരുന്നു.

ചീങ്കണ്ണിയെ ചവിട്ടി അവളുടെ കൈകള്‍ കൊണ്ട് തന്നെ താടിയെല്ലുകള്‍ തുറന്ന് നായയെ പുറത്തെടുത്തു. ഞങ്ങളുടെ പിന്നാലെ ഓടിയ അതേ വേഗത്തില്‍ തന്നെ ചീങ്കണ്ണി വെള്ളത്തിലേക്കും തിരിച്ചു പോയി.  ഭാഗ്യം കൊണ്ടു മാത്രമാണ് ഞാനും എന്റെ നായയും ചീങ്കണ്ണിയുടെ പിടിയില്‍ നിന്നു രക്ഷപ്പെട്ടതെന്നാണ് കിം പറയുന്നത്. എന്തായാലും കോനയും കിമ്മും പരിക്കില്ലാതെ ചീങ്കണ്ണിയില്‍ നിന്നു രക്ഷപ്പെടുകയായിരുന്നു. അത്രയേറെ അപകട സാഹചര്യമായിരുന്നു അത്. നാട്ടുകാര്‍ക്കെല്ലാം ഈ സംഭവം ഞെട്ടലായിരുന്നു.

കിമ്മിന്റെ ധൈര്യത്തെ കുറിച്ച് പലരും അഭിനന്ദിച്ചു. അധ്യാപികയാണ് കിം. തനിക്ക് പാമ്പിനെയും ചീങ്കണ്ണിയെയുമൊന്നും ഇഷ്ടമല്ലെന്നാണ് കിം പറയുന്നത്. എന്നാല്‍ തന്റെ പ്രിയപ്പെട്ട നായയെ രക്ഷിക്കാന്‍ കഴിഞ്ഞതില്‍ വളരെയധികം സന്തോഷമുണ്ടെന്നും പറഞ്ഞു. ഈ ഭയത്തില്‍നിന്ന് എത്രയും പെട്ടെന്ന് എന്റെ നായ മുക്തി നേടട്ടെ എന്നും കിം പറഞ്ഞു.