ആറാട്ടുപുഴ: ആറാട്ടുപുഴ ഭക്തജന സമിതിയുടെ നേതൃത്വത്തില്‍ മൂന്നു ദിവസങ്ങളിലായി നടത്തി വരുന്ന ഗണേശോത്സവം ഇന്നു സമാപിക്കും. വെള്ളിയാഴ്ച വെളുപ്പിന് നടന്ന ഗണപതി ഹോമത്തോടെയാണ് പത്താമത് ഗണേശോത്സവത്തിന് തിരി തെളിഞ്ഞത്. വൈകീട്ട് നടന്ന സാംസ്‌കാരിക സമ്മേളനം കെ.ജി.കെ മേനോന്‍  ഉദ്ഘാടനം ചെയ്തു. എം.രാജേന്ദ്രന്‍ അധ്യക്ഷനായി. യോഗത്തില്‍ വി.സതീഷ് സ്വാഗതവും, സി.മധുസൂദനന്‍ നന്ദിയും പറഞ്ഞു. ആറാട്ടുപുഴ ക്ഷേത്ര ഉപദേശക സമിതി സെക്രട്ടറി എ.ജി ഗോപി, ശിവരാത്രി കമ്മിറ്റി പ്രസിഡന്റ് സതീശന്‍ എന്നിവര്‍ ആശംസകള്‍ അര്‍പ്പിച്ചു. രാമായണ പാരായണ പ്രതിഭ അയ്യപ്പന്‍ നായര്‍, അയ്യപ്പന്‍ പാട്ട് കലാകാരന്‍ കിയ്യത്ത് കോരന്‍, അയ്യപ്പന്‍ പ്പാട്ട് സംഘത്തിന്റെ സംസ്ഥാന അവാര്‍ഡ് ജേതാവ് സുധീര്‍, തെയ്യം കലാകാരന്‍ സതീശന്‍ എന്നിവരെ ആദരിച്ചു.
തുടര്‍ന്ന് ആറാട്ടുപുഴ ശ്രീ ശാസ്താ കലാവേദി അവതരിപ്പിച്ച തിരുവാതിരക്കളിയും അരങ്ങേറി. ഇന്നലെ വൈകീട്ട് പത്തനാപുരം അഖിലയും സംഘവും അവതരിപ്പിച്ച തായമ്പക, വെള്ളാങ്കല്ലൂര്‍ ശങ്കര്‍ജിയും സംഘവും അവതരിപ്പിച്ച ഗാനാമൃതം എന്നിവയുമുണ്ടായി. 6 മണിയോടുകൂടി ഗണേശ വിഗ്രഹം മന്ദാരംകടവില്‍ നിമഞ്ജനം ചെയ്യും.