ഷാർജ: പൊതുനിരത്തിൽ അപകടകരമാം വിധം ബൈക്ക് സ്റ്റണ്ടുകൾ നടത്തിയ ഒരു വീഡിയോ സമൂഹ മാധ്യമങ്ങളിൽ വൈറലായിരുന്നു. ഇതിന് പിന്നാലെ തന്നെ ഷാർജ പൊലിസ് 20 വയസ്സുകാരനായ ഒരു അറബ് മോട്ടോറിസ്റ്റിനെ അറസ്റ്റ് ചെയ്തു. ഈ വീഡിയോ വ്യാപകമായ ശ്രദ്ധ നേടിയതോടെ, ഇയാൾ തന്റെയും മറ്റുള്ളവരുടെയും ജീവന് അപകടകരമാം വിധത്തിലുള്ള ഡ്രൈവിം​ഗിൽ ഏർപ്പെട്ടതായി പൊലിസ് കണ്ടെത്തി.

ഷാർജ പൊലിസിന്റെ ട്രാഫിക് ആൻഡ് പട്രോൾ ഡിപ്പാർട്ട്മെന്റ് ഉടൻ തന്നെ ഇയാളെ അറസ്റ്റ് ചെയ്തു. അപകടസാധ്യതയുള്ള ഡ്രൈവിംഗ്, സാധുവായ നമ്പർ പ്ലേറ്റ് ഇല്ലാതെ വാഹനമോടിക്കൽ, റെഡ് സി​ഗ്നൽ ലംഘനം, ബൈക്കിന്റെ എഞ്ചിൻ, ചേസിസ് എന്നിവയിൽ നിയമവിരുദ്ധമായ മാറ്റങ്ങൾ വരുത്തൽ എന്നിവയാണ് ഇയാൾക്കെതിരെയുള്ള ആരോപണങ്ങൾ. 

അപകടങ്ങൾ കുറയ്ക്കുന്നതിനും പൊതുജനക്ഷേമം സംരക്ഷിക്കുന്നതിനും ഗതാഗത നിയമങ്ങൾ പാലിക്കേണ്ടതിന്റെ പ്രാധാന്യം പൊലിസ് വ്യക്തമാക്കി. അപകടകരമായ ഡ്രൈവിംഗ് ശ്രദ്ധയിൽപ്പെട്ടാൽ 901 എന്ന നമ്പറിൽ ഷാർജ പൊലിസിനെ അറിയിക്കാനും പൊതുജനങ്ങൾക്ക് നിർദേശം നൽകി.

"റോഡ് സുരക്ഷ നിലനിർത്തുന്നതിൽ സമൂഹത്തിന്റെ പിന്തുണ അത്യന്താപേക്ഷിതമാണ്. ഒരുമിച്ച് പ്രവർത്തിക്കുന്നതിലൂടെ, സുരക്ഷിതമായ ഒരു അന്തരീക്ഷം സൃഷ്ടിക്കാനും ഷാർജയിലെ ജീവിത നിലവാരം മെച്ചപ്പെടുത്താനും സാധിക്കും," ഷാർജ പൊലിസിലെ ട്രാഫിക് ആൻഡ് പട്രോൾസ് ഡിപ്പാർട്ട്‌മെന്റ് ഡയറക്ടർ കേണൽ അൽ നഖ്ബി വ്യക്തമാക്കി.

Sharjah Police swiftly arrested a 20-year-old Arab motorcyclist after a viral video showed him performing dangerous stunts on a public road. The rider faces multiple charges, including reckless driving, driving without a license plate, running a red light, and illegal vehicle modifications. Authorities warn against such risky behavior, emphasizing the dangers to public safety.