അഹമ്മദാബാദ്: ഐപിഎല്ലിലെ അഞ്ചാം മത്സരത്തിൽ രാജസ്ഥാൻ റോയൽസ് ഗുജറാത്ത് ടൈറ്റൻസിനോട് പരാജയപ്പെട്ടിരുന്നു. കഴിഞ്ഞ ദിവസം നടന്ന മത്സരത്തിൽ രാജസ്ഥാനെ 58 റൺസിനാണ് ശുഭ്മൻ ഗില്ലും സംഘവും തകർത്തു വിട്ടത്. സീസണിലെ രാജസ്ഥാന്റെ മൂന്നാം തോൽവിയായിരുന്നു ഇത്. ഗുജറാത്തിന്റെ തട്ടകത്തിൽ നടന്ന മത്സരത്തിൽ ടോസ് നേടിയ രാജസ്ഥാൻ റോയൽസ് ബൗളിങ് തെരഞ്ഞെടുക്കുകയായിരുന്നു. ആദ്യം ബാറ്റ് ചെയ്ത ഗുജറാത്ത് 20 ഓവറിൽ ആറു വിക്കറ്റ് നഷ്ടത്തിൽ 217 റൺസാണ് അടിച്ചെടുത്തത്. വിജയലക്ഷ്യം പിന്തുടർന്നിറങ്ങിയ രാജസ്ഥാൻ 19.2 ഓവറിൽ 159 റൺസിന് പുറത്താവുകയായിരുന്നു.

മത്സരം പരാജയപ്പെട്ടെങ്കിലും ടി-20യിൽ ഒരു തകർപ്പൻ നേട്ടം കൈവരിക്കാനും സഞ്ജുവിന് സാധിച്ചു. കുട്ടി ക്രിക്കറ്റിൽ 7500 റൺസ് പൂർത്തിയാക്കാനാണന് സഞ്ജുവിന് സാധിച്ചത്. ടി-20യിൽ ഈ നാഴികക്കല്ലിലെത്തുന്ന എട്ടാമത്തെ ഇന്ത്യൻ താരം കൂടിയാണ് സഞ്ജു. വിരാട് കോഹ്‌ലി, രോഹിത് ശർമ, ശിഖർ ധവാൻ, സുരേഷ് റെയ്ന, സൂര്യകുമാർ യാദവ്, കെഎൽ രാഹുൽ, ദിനേശ് കാർത്തിക് എന്നിവരാണ് ഈ നേട്ടം സ്വന്തമാക്കിയിട്ടുള്ളത്.

 

മത്സരത്തിൽ 28 പന്തിൽ 41 റൺസാണ് രാജസ്ഥാൻ നായകൻ സ്വന്തമാക്കിയത്. നാല് ഫോറുകളും രണ്ട് സിക്സുകളുമാണ് സഞ്ജു സ്വന്തമാക്കിയത്. മത്സരത്തിൽ 19 റൺസ് നേടിയപ്പോൾ ആണ് സഞ്ജു ഈ നേട്ടം സ്വന്തമാക്കിയത്. സഞ്ജുവിന് പുറമെ ഷിർമോൺ ഹെറ്റ്മെയർ അർദ്ധ സെഞ്ച്വറി നേടി. 32 പന്തിൽ നാല് ഫോറുകളും മൂന്ന് സിക്സുകളും ഉൾപ്പെടെ 52 റൺസായിരുന്നു താരം നേടിയത്. 

മത്സരത്തിൽ ഗുജറാത്തിനു വേണ്ടി പ്രസിദ് കൃഷ്ണ മൂന്ന് വിക്കറ്റുകളും റാഷിദ് ഖാൻ, സായ് കിഷോർ എന്നിവർ രണ്ട് വീതം വിക്കറ്റുകളും നേടി മിന്നും പ്രകടനം നടത്തിയപ്പോൾ രാജസ്ഥാൻ ബാറ്റിംഗ് നിര തകരുകയായിരുന്നു. കുൽവന്ദ് കെജ്രോലിയ, മുഹമ്മദ്‌ സിറാജ്, അർഷദ് ഖാൻ എന്നിവർ ഓരോ വീതം വിക്കറ്റുകളും നേടി. 

ഏപ്രിൽ 13ന് റോയൽ ചലഞ്ചേഴ്‌സ് ബെംഗളൂരുവിനെതിരെയാണ് രാജസ്ഥാന്റെ അടുത്ത മത്സരം. റോയൽസിന്റെ തട്ടകമായ ജയ്‌പൂരിലെ സവായ് മാൻസിങ് സ്റ്റേഡിയമാണ്‌ വേദി. 

Sanju Samson Complete 7500 Runs in T20 Cricket