മീററ്റ്: ദേശീയ തലത്തില്‍ തന്നെ വലിയ വാര്‍ത്താ പ്രാധാന്യം നേടിയ ഒന്നായിരുന്നു മെര്‍ച്ചന്റ് നേവി ഓഫീസര്‍ സൗരഭ് രാജ്പുത്തിന്റെ കൊലപാതകം. കേസില്‍ പ്രതിയായ സൗരഭിന്റെ ഭാര്യ മുസ്‌കാന്‍ ഗര്‍ഭിണിയാണെന്ന് പൊലിസ് നേരത്തേ സ്ഥിരീകരിച്ചിരുന്നു. എന്നാല്‍ കാമുകന്‍ സാഹിലിനൊപ്പം ചേര്‍ന്ന് സൗരഭിനെ കൊലപ്പെടുത്തുമ്പോള്‍ യുവതി ഗര്‍ഭിണിയായിരുന്നുവെന്നും ഭ്രൂണത്തിന് ഏഴ് ആഴ്ചയോളം പ്രായമുണ്ടായിരുന്നതായും പൊലിസ് പറഞ്ഞു.

അറസ്റ്റിനു ശേഷം ജയിലില്‍ എത്തി ഏതാനും ദിവസങ്ങള്‍ കഴിഞ്ഞപ്പോഴാണ് മുസ്‌കാന്‍ ഗര്‍ഭിണിയായതിന്റെ ലക്ഷണങ്ങള്‍ കാണിച്ചുതുടങ്ങിയത്. തുടര്‍ന്ന് യുവതിയെ മെഡിക്കല്‍ പരിശോധനക്ക് വിധേയമാക്കിയപ്പോഴാണ് ഗര്‍ഭം സ്ഥിരീകരിച്ചത്. കാമുകന്‍ സാഹിലില്‍ നിന്നാണ് ഗര്‍ഭം ധരിച്ചതായി യുവതി പറഞ്ഞതായി റിപ്പോര്‍ട്ടുകള്‍ ഉണ്ട്.

ഇക്കഴിഞ്ഞ മാര്‍ച്ച് നാലിനാണ് മുസ്‌കാനും സാഹിലും ചേര്‍ന്ന് സൗരഭിനെ കൊല ചെയ്തത്. ഭക്ഷണത്തില്‍ ഉറക്ക ഗുളിക നല്‍കി മയക്കിയ സൗരഭിനെ കത്തി കൊണ്ട് കുത്തിക്കൊന്ന ശേഷം കണങ്ങളാക്കി വെട്ടിനുറുക്കി വീപ്പക്കുള്ളിലാക്കി സിമന്റ് ഇട്ട് അടയ്ക്കുകയായിരുന്നു.

ഗര്‍ഭിണിയാണെന്ന് സ്ഥിരീകരിച്ചതിനെ തുടര്‍ന്ന്, ഗര്‍ഭിണികളായ തടവുകാര്‍ക്കുള്ള പ്രോട്ടോക്കോളുകള്‍ക്കനുസൃതമായി മുസ്‌കാന് വൈദ്യസഹായം നല്‍കുന്നതിനുള്ള ക്രമീകരണങ്ങള്‍ ജയില്‍ അധികൃതര്‍ ഏര്‍പ്പെടുത്തിയിട്ടുണ്ട്. ഗര്‍ഭിണികളായ തടവുകാര്‍ക്കുള്ള മാര്‍ഗ്ഗനിര്‍ദ്ദേശങ്ങള്‍ അനുസരിച്ച് യുവതിക്ക് ചികിത്സയും പരിചരണവും നല്‍കും. 

വെള്ളിയാഴ്ച രാവിലെ 11:45 ഓടെയാണ് പൊലിസ് സംഘവും ഒരു ഫാര്‍മസിസ്റ്റും ചേര്‍ന്ന് മുസ്‌കാനെ മെഡിക്കല്‍ കോളേജിലേക്ക് കൊണ്ടുപോയത്. പരിശോധനയ്ക്ക് ശേഷം ഉച്ചയ്ക്ക് 1:30 ഓടെ അവര്‍ ജയിലിലേക്ക് മടങ്ങി. ഇതുവരെ കുടുംബാംഗങ്ങളാരും യുവതിയെ ജയിലില്‍ സന്ദര്‍ശിച്ചിട്ടില്ലെന്ന് ഉദ്യോഗസ്ഥര്‍ പറഞ്ഞു.

ഭര്‍ത്താവ് സൗരഭ് രജുതിന്റെ കൊലപാതകവുമായി ബന്ധപ്പെട്ട് മാര്‍ച്ച് 19നാണ് മുസ്‌കാന്‍ റസ്‌തോഗിയും കാമുകന്‍ സാഹില്‍ ശുക്ലയും അറസ്റ്റിലായത്. സൗരഭിനെ കൊലപ്പെടുത്തിയ ശേഷം ഇവര്‍ ഹിമാചല്‍ പ്രദേശിലേക്ക് വിനോദ യാത്രയും നടത്തിയിരുന്നു. പിന്നീടാണ് ഇരുവരെയും പൊലിസ് അറസ്റ്റു ചെയ്തത്.