ന്യൂഡല്‍ഹി: കനത്ത ചൂടില്‍ വെന്തുരുകുന്ന വിദ്യാര്‍ഥികളോട് പ്രിന്‍സിപ്പല്‍ കാണിച്ച സ്‌നേഹവും സഹാനുഭൂതിയും 'അതേ നാണയത്തില്‍' തിരിച്ച് നല്‍കി വിദ്യാര്‍ഥികള്‍. ചൂടുകുറക്കാനായി  ക്ലാസ് മുറിയുടെ ചുവരില്‍ ചാണകം പൂശിയ കോളജ് പ്രിന്‍സിപ്പലിന്റെ ഓഫിസ് മുറിയില്‍ ചാണകം കൊണ്ട് അഭിഷേകം നടത്തിയാണ് അവര്‍ പ്രിന്‍സിപ്പലിന്റെ ശീതികരണ പ്രക്രിയക്ക് പിന്തുണ അറിയിച്ചത്. ഡല്‍ഹി യൂണിവേഴ്സിറ്റിക്ക് കീഴിലുള്ള ലക്ഷ്മിഭായ് കോളജിലാണ് സംഭവം. 

എപ്രില്‍ 13-നാണ്  കോളജ് പ്രിന്‍സിപ്പല്‍  പ്രത്യുഷ് വത്സല ക്ലാസ് മുറിയുടെ ചുവരില്‍ ചാണകം പൂശുന്നതിന്റെ ദൃശ്യങ്ങള്‍ പുറത്തു വന്നത്. തദ്ദേശീയമായ രീതിയില്‍ ചൂട് കുറയ്ക്കുന്നത് സംബന്ധിച്ച ഗവേഷണത്തിന്റെ ഭാഗമായാണ് ചാണകം പൂശിയതെന്നാണ് പ്രിന്‍സിപ്പല്‍ തന്റെ പ്രവൃത്തിക്ക് നല്‍കിയ വിശദീകരണം.  ഒരാഴ്ചക്കകം ഗവേഷണത്തിന്റെ പൂര്‍ണ വിവരങ്ങള്‍ പുറത്തുവിടുമെന്നും പ്രിന്‍സിപ്പല്‍ വ്യക്തമാക്കി. 

എന്നാല്‍ ഗവേഷണ ഫലം പുറത്തു വരാന്‍ ഒരാഴ്ചയൊന്നും വേണ്ടി വന്നില്ല. ചാണകത്തിന്റെ തണുപ്പറിഞ്ഞ വിദ്യാര്‍ഥികള്‍ തങ്ങള്‍ മാത്രം എങ്ങിനെയാണ് ഈ സൗകര്യങ്ങള്‍ അനുഭവിക്കുക എന്നായി. ഉടന്‍ തന്നെ പ്രിന്‍സിപ്പലോടുള്ള ഐക്യദാര്‍ഢ്യവുമായി വിദ്യാര്‍ഥി യൂണിയന്‍ ഭാരവാഹികളുടെ നേതൃത്വത്തില്‍ അവര്‍ പുറപ്പെട്ടു. പ്രിന്‍സിപ്പലിന്റെ ശീതീകരിച്ച ഓഫിസ് മുറിയുടെ ചുവരില്‍ ഡല്‍ഹി സര്‍വകലാശാല വിദ്യാര്‍ഥി യൂണിയന്‍ പ്രസിഡന്റ് റോണക് ഖത്രിയുടെ നേതൃത്വത്തില്‍ ചാണകാഭിഷേകം നടത്തുകയും ചെയ്തു.

आज लक्ष्मीबाई कॉलेज में विभिन्न मुद्दों को लेकर छात्र शक्ति से मिलने और उनकी समस्याएं जानने का अवसर मिला। हम सभी ने मिलकर इन समस्याओं के समाधान पर भी चर्चा की।

साथ ही, जब प्राचार्या मैडम के कार्यालय गए, तो वह नहीं मिलीं। लेकिन उनके कक्ष में छात्र शक्ति के साथ मिलकर गोबर लेप कर… pic.twitter.com/mouw5Tn0Pt

— Ronak Khatri (@ronak_khatrii) April 15, 2025

 
'ഇന്ന് ലക്ഷ്മീബായി കോളേജില്‍ വിവിധ പ്രശ്‌നങ്ങള്‍ക്കുമായി വിദ്യാര്‍ത്ഥിനികളുമായി കൂടിക്കാഴ്ച നടത്തി, അവരുടെ പ്രശ്‌നങ്ങള്‍ കേട്ടു, അവയുടെ പരിഹാരങ്ങള്‍ക്കായി ചര്‍ച്ചയും നടത്തി. അതിനോടൊപ്പം, പ്രിന്‍സിപ്പാള്‍ മാഡത്തിന്റെ ഓഫിസില്‍ പോയപ്പോള്‍ അവരെ കാണാനായില്ല. എന്നാല്‍ അവരുടെ ഓഫിസില്‍ വിദ്യാര്‍ത്ഥിനികളുമായി ചേര്‍ന്ന് ഗോബര്‍ (പശുവിന്റെ ചാണകം) പുരട്ടി അവരുടെ പ്രചാരണ പ്രവര്‍ത്തനത്തിന് പിന്തുണ നല്‍കി' റോണക് ഖത്രി എക്‌സില്‍ കുറിച്ചു.   

താനും സംഘവും പ്രിന്‍സിപ്പലിന്റെ ഓഫിസ് ചുവരുകളില്‍ പ്ലാസ്റ്റര്‍ ചെയ്ത് അവരെ സഹായിക്കാന്‍ പോയതായിരുന്നുവെന്നും ഖത്രി പരിഹസിച്ചു. ''മാഡം തന്റെ മുറിയില്‍ നിന്ന് എസി നീക്കം ചെയ്ത് ഇപ്പോള്‍ തന്നെ വിദ്യാര്‍ഥികള്‍ക്ക് കൈമാറും. ചാണകം പുരട്ടിയ ആധുനികവും പ്രകൃതിദത്തവുമായ തണുത്ത അന്തരീക്ഷത്തില്‍ അവര്‍ കോളജ് നടത്തുമെന്നും ഞങ്ങള്‍ക്ക് പൂര്‍ണ വിശ്വാസമുണ്ട്''-ഖത്രി പരിഹസിക്കുന്നു. 

सवाल पूछने और सवाल उठाने वालों की रौनक बनी रहे। @ronak_khatrii pic.twitter.com/V0xFQOW3Er

— Vinod Kapri (@vinodkapri) April 15, 2025