ഇതിഹാസ താരങ്ങളായ ക്രിസ്റ്റ്യാനോ റൊണാൾഡോ, ലയണൽ മെസി എന്നിവരിൽ തനിക്ക് ഏറ്റവും പ്രിയപ്പെട്ട താരമാരാണെന്ന് പറഞ്ഞിരിക്കുകയാണ് ബെൽജിയൻ മിഡ്ഫീൽഡർ കെവിൻ ഡി ബ്രൂയ്ൻ. മെസിയെ മറികടന്നുകൊണ്ട് റൊണാൾഡോയെയാണ് ഡി ബ്രൂയ്ൻ തന്റെ ഇഷ്ടതാരമായി തെരഞ്ഞെടുത്തത്. വൗ ഹൈഡ്രേറ്റിന് നൽകിയ അഭിമുഖത്തിലാണ് ഡി ബ്രൂയ്ൻ ഇക്കാര്യം പറഞ്ഞത്. 

"ക്രിസ്റ്റ്യാനോ റൊണാൾഡോ എന്ന് ഞാൻ പറയും. കാരണം അദ്ദേഹം സ്‌ട്രൈക്കറാണ്. എന്നാൽ ലയണൽ മെസി ഒരു പ്ലേ മേക്കറാണ്. ഞാനും ഒരു പ്ലേ മേക്കറാണ്. അതിനാൽ ഒരു സ്‌ട്രൈക്കറെയാണ് ഞാൻ തെരഞ്ഞെടുക്കുക'' കെവിൻ ഡി ബ്രൂയ്ൻ പറഞ്ഞു.  

ഈ സീസൺ അവസാനത്തോട് കൂടി ഡി ബ്രൂയ്ൻ മാഞ്ചസ്റ്റർ സിറ്റി വിടുമെന്ന് അടുത്തിടെ അറിയിച്ചിരുന്നു. 2015 സീസണിൽ ജർമൻ ക്ലബ് വോൾഫ്സ്ബർഗിൽ നിന്നുമാണ് കെവിൻ ഡി ബ്രൂയ്ൻ മാഞ്ചസ്റ്റർ സിറ്റിയുടെ തട്ടകത്തിൽ എത്തിയത്. ഇത്തിഹാദിന്റെ മണ്ണിൽ ഡി ബ്രൂയ്ൻ ലോകത്തെ ഏറ്റവും മികച്ച മിഡ്ഫീൽഡർമാരിൽ ഒരാളായി സ്വയം അടയാളപ്പെടുത്തുകയായിരുന്നു.

മാഞ്ചസ്റ്റർ സിറ്റിക്കായി 413 മത്സരങ്ങളിൽ നിന്നും 106 ഗോളുകളാണ് താരം നേടിയിട്ടുള്ളത്. ടീമിനൊപ്പം 16 കിരീടങ്ങളാണ് ഡി ബ്രൂയ്ൻ നേടിയിട്ടുള്ളത്. ഇതിൽ ആറ് ഇംഗ്ലീഷ് പ്രീമിയർ ലീഗ് കിരീടങ്ങളും ഒരു ചാമ്പ്യൻസ് ലീഗ് കിരീടവും ഡി ബ്രൂയ്ൻ മാഞ്ചസ്റ്റർ സിറ്റിക്കൊപ്പം സ്വന്തമാക്കിയിട്ടുണ്ട്. 

മാഞ്ചസ്റ്റർ സിറ്റിക്കായി ഈ സീസണിൽ ഡി ബ്രൂയ്ൻ 19 മത്സരങ്ങളിലാണ് ബൂട്ട് കെട്ടിയത്. ഇതിൽ നാല് ഗോളുകളും ഏഴ് അസിസ്റ്റുകളുമാണ് താരം നേടിയിട്ടുള്ളത്. ഈ സീസണിൽ അത്ര മികച്ച പ്രകടനങ്ങളല്ല പെപ് ഗ്വാർഡിയോളയുടെ കീഴിൽ മാഞ്ചസ്റ്റർ സിറ്റി നടത്തുന്നത്. ചാമ്പ്യൻസ് ലീഗിൽ റയൽ മാഡ്രിഡിനോട് പരാജയപ്പെട്ട് സിറ്റി പുറത്തായിരുന്നു. 

Belgian midfielder Kevin De Bruyne has said that among the legends Cristiano Ronaldo and Lionel Messi he is his favorite player