മാഞ്ചസ്റ്റർ സിറ്റി പരിശീലകൻ പെപ് ഗ്വാർഡിയോളയുടെ ഫുട്ബോൾ ശൈലിയെക്കുറിച്ച് സംസാരിക്കുകയാണ് ഇതിഹാസ താരം ലയണൽ മെസി. മറ്റുള്ള ടീമുകൾ ഗ്വാർഡിയോളയുടെ കളി ശൈലി അനുകരിക്കാൻ ശ്രമിച്ചത് ഫുട്ബോളിന് ദോഷം വരുത്തിയെന്നാണ് മെസി അഭിപ്രായപ്പെട്ടത്. ഓൾ എബൗട്ട് അർജന്റീനക്ക് നൽകിയ അഭിമുഖത്തിലാണ് മെസി ഇക്കാര്യം പറഞ്ഞത്. 

''പെപ് ഗ്വാർഡിയോള മറ്റൊരു ലോകത്തിൽ നിന്നുള്ള ആളാണ്. അദ്ദേഹം വ്യത്യസ്തനാണ്. മറ്റാരും കാണാത്ത കാര്യങ്ങൾ അദ്ദേഹം കാണും. അദ്ദേഹം ഫുട്ബോളിനെ മാറ്റിമറിച്ചു. എല്ലാവരും ഈ ശൈലി പകർത്താൻ ആഗ്രഹിച്ചു. എന്നാൽ ശരിക്കും അദ്ദേഹം ഫുട്ബോളിന് ഒരു തരത്തിൽ ദോഷം ചെയ്തു. കാരണം മറ്റുള്ള ടീമുകൾ ബാഴ്‌സലോണയെപോലെ കളിക്കാൻ ശ്രമിച്ചു. പക്ഷെ ഞങ്ങൾ വളരെയധികം പ്രത്യേകയുള്ള ഒരു ടീമായിരുന്നു. മിഡ്ഫീൽഡിൽ സാവി, ബുസി, ഇനിയേസ്റ്റ എന്നിവരുണ്ടായിരുന്നു താരങ്ങൾക്കും പരിശീലകർക്കും ഇടയിൽ മികച്ച ബന്ധമാണ് ഉണ്ടായിരുന്നത്'' മെസി പറഞ്ഞു. 

ബാഴ്സലോണയിൽ പെപ് ഗ്വാർഡിയോളയുടെ കീഴിൽ ആണ് മെസി ലോകത്തിലെ ഏറ്റവും മികച്ച താരമായി വളർന്നു വന്നത്. 2008ലാണ് ഗ്വാർഡിയോളയുടെ സ്പാനിഷ് ക്ലബ്ബിന്റെ പരിശീലകനായി ചുമതലയേൽക്കുന്നത്. എന്നാൽ അതിനു മുമ്പ് തന്നെ ബാഴ്സലോണ ടീമിൽ മെസി ഇടം നേടിയിരുന്നു. 

2021ലാണ് മെസി ബാഴ്സലോണക്കൊപ്പമുള്ള നീണ്ട കരിയർ അവസാനിപ്പിച്ച് ഫ്രഞ്ച് ക്ലബ്‌ പാരീസ് സെയ്ന്റ് ജെർമെയ്നിലേക്ക് ചേക്കേറിയത്. രണ്ട് വർഷമാണ്‌ മെസി പാരീസിൽ കളിച്ചത്. പിഎസ്ജിക്ക്‌ വേണ്ടി രണ്ട് സീസണുകളിലായി 32 ഗോളുകളും 35 അസിസ്റ്റുകളുമാണ് മെസി നേടിയത്. ടീമിനൊപ്പം രണ്ട് ലീഗ് കിരീടങ്ങളും മെസി സ്വന്തമാക്കിയിരുന്നു.

2023ലാണ് മെസി പാരീസ് വിട്ട് മേജർ ലീഗിലേക്ക് പോയത്. മെസിയുടെ വരവോടെ ഇന്റർ മയാമി വേണ്ടി മിന്നും പ്രകടനമാണ് നടത്തിയിരുന്നത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്. ഇതിന് പുറമെ സപ്പോർട്ടേഴ്‌സ് ഷീൽഡും മയാമി സ്വന്തമാക്കി.

Lionel Messi talks about Manchester City coach Pep Guardiolas footballing style