കൊച്ചി: കേന്ദ്രമന്ത്രിയുടെ ബന്ധുവിന് ദുബൈയില്‍ കമ്പനിയുണ്ടെന്ന് പറഞ്ഞ് പറ്റിച്ച് വിസ തട്ടിപ്പ് നടത്തിയതിന് ബിജെപി നേതാവിനും സഹായിക്കുമെതിരെ കേസ്. ബി.ജെ.പി എറണാകുളം ഈസ്റ്റ് ജില്ലാ വൈസ് പ്രസിഡന്റ് മനോജ് മനക്കേക്കര, ബിജെപി പ്രവര്‍ത്തക കൊല്ലം സ്വദേശിനി സിനി എന്നിവര്‍ക്കെതിരെയാണ് കേസെടുത്തത്. കുന്നത്തുനാട് പൊലീസാണ് നടപടി സ്വീകരിച്ചത്. കഴിഞ്ഞദിവസമാണ് ബി.ജെ.പി എറണാകുളം ഈസ്റ്റ് ജില്ലാ വൈസ് പ്രസിഡന്റായി മനോജ് മനക്കേക്കരയെ തെരഞ്ഞെടുത്തത്. ഇതിന് പിന്നാലെയാണ് മനോജ് തട്ടിപ്പ് കേസില്‍ കുടുങ്ങിയത്. ലൈസന്‍സ് ഇല്ലാതെ വിദേശത്തേക്ക് ആളുകളെ റിക്രൂട്ട് ചെയ്തതിനും വിശ്വാസ വഞ്ചനയ്ക്കുമാണ് കേസെടുത്തത്.

വിസ തട്ടിപ്പ് നടത്തി പണം തട്ടിയെന്ന വെമ്പിള്ളി സ്വദേശി രഞ്ജിത് കൃഷ്ണന്റെ പരാതിയിലാണ് നടപടി. ദുബൈയിലെ എ വണ്‍ റൈസ് എന്നപേരിലുള്ള കമ്പനിയില്‍ ജോലി വാഗ്ദാനം ചെയ്ത് മനോജ് കമ്പളിപ്പിക്കുകയായിരുന്നുവെന്നും ഇതുവഴി പണംതട്ടിയെന്നുമാണ് രഞ്ജിത് കൃഷ്ണന്‍ പരാതിയില്‍ പറയുന്നത്. രഞ്ജിതിന്റെ അച്ഛന്റെ എല്‍എസി നിക്ഷേപത്തിലെ രണ്ടുലക്ഷം രൂപയാണ് ബിജെപി നേതാവും സഹായിയും ചേര്‍ന്ന് തട്ടിയെടുത്തതെന്നാണ് പറയുന്നത്.

ദുബൈയിലെ കമ്പനി ബിജെപി നേതാവായ കേന്ദ്രമന്ത്രിയുടെ ബന്ധുവിന്റെയാണെന്നും സിനി ഇവരുമായി അടുത്ത് ബന്ധമുള്ള വ്യക്തിയാണെന്നും പറഞ്ഞാണ് മനോജ് വിസ തട്ടിപ്പ് നടത്തിയത്. ഇത് വിശ്വസിച്ച പരാതിക്കാരന്‍ സിനിയുടെ കൊല്ലം തൃക്കോവില്‍വട്ടത്തുള്ള കനാറ ബാങ്കിലെ അക്കൗണ്ടിലേക്ക് പണം കൈമാറി. 

ഏകദേശം ഒരു വര്‍ഷം മുമ്പാണ് തട്ടിപ്പ് തുടങ്ങിയത്. പലരില്‍ നിന്നുമായി 75,000 മുതല്‍ രണ്ടുലക്ഷം രൂപവരെയാണ് പ്രതികള്‍ തട്ടിയെടുത്തത്. പണം നഷ്ടപ്പെട്ടവര്‍ എറണാകുളം റൂറല്‍ എസ്പിക്ക് പരാതി നല്‍കിയതോടെയാണ വന്‍ തട്ടിപ്പ് പുറത്തായത്. പണം നഷ്ടപ്പെട്ടവരില്‍ കൂടുതലും ബിജെപി പ്രവര്‍ത്തകരായതിനാല്‍ സംഭവം ഒതുക്കിത്തീര്‍ക്കാനും ശ്രമം നടക്കുന്നുണ്ട്.

രഞ്ജിത്തിനൊപ്പം തട്ടിപ്പിനിരയായ മറ്റ് എട്ടു പേര്‍ ഒന്നിച്ചാണ് റൂറല്‍ എസ്പിക്ക് പരാതി നല്‍കിയത്. എസ്പി അത് ബന്ധപ്പെട്ട സ്റ്റേഷനുകളിലേക്കും കൈമാറി. പാര്‍ട്ടി നേതൃത്വത്തിന്റെ സമ്മര്‍ദ്ദംമൂലം മറ്റുള്ളവര്‍ ഇതുവരെ മൊഴി നല്‍കിയിട്ടില്ല. പരാതിയില്‍ രഞ്ജിത് മൊഴി നല്‍കുന്നതിനെതിരെ സമ്മര്‍ദ്ദമുണ്ടായെന്ന് അദ്ദേഹത്തിന്റെ അച്ഛന്‍ രാധാകൃഷ്ണന്‍ പറഞ്ഞു. 

അതേസമയം, താന്‍ പണം വാങ്ങിയില്ലെന്നും കേസ് രാഷ്ട്രീയ പ്രേരിതമാണെന്നുമാണ് മനോജ് പറയുന്നത്.

A case has been registered against a BJP leader and his aide for allegedly defrauding a Union Minister's relative by claiming that he had a company in Dubai. A case has been registered against BJP Ernakulam East district vice president Manoj Manakekkara and BJP activist Sini, a native of Kollam.