റിയാദ്: റിയാദ് മെട്രോ ഓറഞ്ച് ലൈനില്‍ രണ്ട് പുതിയ സ്റ്റേഷനുകള്‍ തുറക്കുമെന്ന് റിയാദ് പബ്ലിക് ട്രാന്‍സ്‌പോര്‍ട്ട് കമ്പനി അറിയിച്ചു. റിയാദ് പബ്ലിക് ട്രാന്‍സ്‌പോര്‍ട്ട് കമ്പനിയുടെ നീക്കം രാജ്യത്തെ റെയില്‍വേ ഗതാഗതത്തെ ശക്തിപ്പെടുത്തുമെന്നാണ് കരുതുന്നത്. റെയില്‍വേ സ്റ്റേഷന്‍, ജരീര്‍ ഡിസ്ട്രിക്റ്റ് സ്റ്റേഷന്‍ എന്നിങ്ങനെയാണ് പുതിയ സ്റ്റേഷനുകള്‍ക്ക് പേരിട്ടിരിക്കുന്നത്. 

ലൈന്‍ 3 എന്നും അറിയപ്പെടുന്ന ഓറഞ്ച് ലൈന്‍, മദീന റോഡ് അച്ചുതണ്ടില്‍ നിന്ന് പ്രിന്‍സ് സാദ് ബിന്‍ അബ്ദുള്‍റഹ്മാന്‍ റോഡ് വരെ 40.7 കിലോമീറ്റര്‍ ദൈര്‍ഘ്യമുണ്ട്. റിയാദ് മെട്രോ ശൃംഖലയുടെ ഘട്ടം ഘട്ടമായുള്ള പ്രവര്‍ത്തനത്തില്‍ തുറക്കുന്ന മൂന്നാമത്തെയും അവസാനത്തെയും ലൈനാണിത്. 2025 ജനുവരി 5ന് ഓറഞ്ച് ലൈന്‍ ആരംഭിച്ചതോടെ റിയാദ് മെട്രോയുടെ ആറ് ലൈനുകളും പൂര്‍ണ്ണമായും പ്രവര്‍ത്തനക്ഷമമായിരുന്നു.

2024 ഡിസംബര്‍ 1നാണ് മെട്രോയുടെ ബ്ലൂ (ലൈന്‍ 1), യെല്ലോ (ലൈന്‍ 4), പര്‍പ്പിള്‍ (ലൈന്‍ 6) ലൈനുകള്‍ ഉദ്ഘാടനം ചെയ്തത്. തുടര്‍ന്ന് ഡിസംബര്‍ 15ന് റെഡ് (ലൈന്‍ 2), ഗ്രീന്‍ (ലൈന്‍ 5) ലൈനുകളും തുറന്നു.

റോയല്‍ കമ്മീഷന്‍ ഫോര്‍ റിയാദ് സിറ്റി (ആര്‍സിആര്‍സി) യുടെ കീഴില്‍ പ്രവര്‍ത്തിക്കുന്ന റിയാദ് മെട്രോ മിഡില്‍ ഈസ്റ്റിലെ ഏറ്റവും വലുതും ലോകത്തിലെ ഏറ്റവും ദൈര്‍ഘ്യമേറിയ ഡ്രൈവറില്ലാ ട്രെയിന്‍ സംവിധാനമെന്ന നേട്ടവും സ്വന്തമാക്കിയിരുന്നു.

176 കിലോമീറ്റര്‍ വ്യാപിച്ചുകിടക്കുന്ന ഈ ശൃംഖലയില്‍ 85 സ്റ്റേഷനുകളും നാല് പ്രധാന ഇന്റര്‍ചേഞ്ച് ഹബുകളും ഉള്‍പ്പെടുന്നു. പ്രവര്‍ത്തനം ആരംഭിച്ചതിന് ശേഷം വെറും 75 ദിവസത്തിനുള്ളില്‍ 18 ദശലക്ഷത്തിലധികം ഉപയോക്താക്കളാണ് മെട്രോ സംവിധാനം ഉപയോഗിച്ചത്. ഇതിനകം 162,000ത്തിലധികം യാത്രകള്‍ പൂര്‍ത്തിയാക്കിയ റിയാദ് മെട്രോ മൊത്തം 4.5 ദശലക്ഷം കിലോമീറ്റര്‍ ദൂരമാണ് സഞ്ചരിച്ചത്.

Riyadh Metro expands its Orange Line with the addition of Railway Station and Jarir District Station, enhancing connectivity and easing mobility for commuters across the city.