കോഴിക്കോട്: ബസില്‍ ലൈംഗികാതിക്രമം നടത്തിയെന്നാരോപിച്ച് യുവതി സമൂഹമാധ്യമങ്ങളിലൂടെ വിഡിയോ ദൃശ്യം പങ്കുവച്ചതിനു പിന്നാലെ യുവാവ് ജീവനൊടുക്കിയ സംഭവത്തില്‍ പരാതി നല്‍കി കുടുംബം.  ഗോവിന്ദപുരം കൊളങ്ങരകണ്ടി, ഉള്ളാട്ട്‌തൊടി യു. ദീപക് (42) ആണ് മരിച്ചത്. ബസ് യാത്രക്കിടെ ശരീരത്തില്‍ സ്പര്‍ശിച്ചുവെന്നായിരുന്നു യുവതിയുടെ ആരോപണം. യുവതിയുടെ ആരോപണത്തിന് പിന്നാലെ ദീപക് വലിയ മാനസിക വിഷമത്തില്‍ ആയിരുന്നുവെന്നും ദീപകിന് നീതി ലഭിക്കാനായി എതറ്റം വരെയും പോകുമെന്നും ബന്ധുക്കളും സുഹൃത്തുക്കളും പറഞ്ഞു. 

ബസില്‍ യുവതി ചിത്രീകരിച്ച വിഡിയോ സമൂഹമാധ്യങ്ങളില്‍ പങ്കുവയ്ക്കുകയും പിന്നീട് വ്യാപകമായി പ്രചരിക്കുകയും ചെയ്തിരുന്നു. 20 ലക്ഷത്തിലേറെ പേര്‍ വിഡിയോ കാണുകയും നിരവധി പേര്‍ പങ്കുവയ്ക്കുകയും ചെയ്തതോടെ യുവതിയെ അനുകൂലിച്ചും പ്രതികൂലിച്ചും പലരും രംഗത്തെത്തി. വിഷയം സമൂഹമാധ്യമങ്ങളില്‍ ചര്‍ച്ചയായതിനു പിന്നാലെയാണ് ദീപക് ആത്മഹത്യ ചെയ്തത്.

ALSO READ: പശുക്കടത്ത് ആരോപിച്ച് ഒഡിഷയില്‍ യുവാവിനെ തല്ലിക്കൊന്നത് ചിരപരിചിതര്‍; നേരിട്ടത് ക്രൂര മര്‍ദ്ദനം, ശരീരത്തില്‍ മുറിവേല്‍ക്കാത്ത ഒരിടവും ബാക്കിയില്ലായിരുന്നുവെന്നും സഹോദരന്‍

ശനിയാഴ്ച രാത്രി മുറിയില്‍ കയറിയ ദീപക്കിനെ ഇന്നലെ രാവിലെ കാണാതായതോടെ അന്വേഷിച്ചപ്പോഴാണ് ഫാനില്‍ തൂങ്ങിയ നിലയില്‍ കണ്ടത്. അപ്പോഴേക്കും മരിച്ചിരുന്നു. തുടര്‍ന്ന് മെഡി.കോളജ് പൊലിസില്‍ വിവരമറിയിച്ചു. പൊലിസെത്തി ഇന്‍ക്വസ്റ്റ് നടപടികള്‍ പൂര്‍ത്തിയാക്കുകയും പോസ്റ്റ്‌മോര്‍ട്ടത്തിനു ശേഷം മൃതദേഹം ബന്ധുക്കള്‍ക്ക് കൈമാറുകയും ചെയ്തു. 

വസ്തുതാവിരുദ്ധമായ പ്രചാരണമാണ് യുവതി സമൂഹമാധ്യങ്ങളിലൂടെ നടത്തിയതെന്നും ഇതില്‍ ദീപക് കടുത്ത മാനസിക സമ്മര്‍ദത്തിലായിരുന്നതായും ബന്ധുക്കളും നാട്ടുകാരും പറഞ്ഞു. വസ്ത്രവ്യാപാര കേന്ദ്രത്തിലെ തൊഴിലാളിയായ ദീപക് കഴിഞ്ഞ വെള്ളിയാഴ്ച പയ്യന്നൂര്‍ റെയില്‍വേ സ്റ്റേഷനില്‍നിന്ന് ബസില്‍ പോകവെയാണ് സംഭവം. 

ആത്മഹത്യയുമായി ബന്ധപ്പെട്ട് അസ്വാഭാവിക മരണത്തിന് മെഡി.കോളജ് പൊലിസ് നേരത്തെ കേസെടുത്തിരുന്നു. യുവാവിനെതിരേ മറ്റു കേസുകളൊന്നുമില്ലെന്ന് മെഡി.കോളജ് പൊലിസ് അറിയിച്ചു.  

ALSO READ: കുഞ്ഞിനെ കടല്‍ഭിത്തിയില്‍ എറിഞ്ഞു കൊന്ന കേസ്: അമ്മ ശരണ്യ കുറ്റക്കാരിയെന്ന് കോടതി; രണ്ടാം പ്രതി നിധിനെ വെറുതെ വിട്ടു

സംഭവത്തില്‍ യുവതിയുടെ മൊഴി രേഖപ്പെടുത്തുമെന്ന് പൊലിസ് അറിയിച്ചു. ആത്മഹത്യയില്‍ പരാതിയുണ്ടെന്ന് ബന്ധുക്കള്‍ അറിയിച്ചതിനെ തുടര്‍ന്നാണ് വിഡിയോ സംബന്ധിച്ചും മറ്റും വിശദമായി അന്വേഷിക്കാന്‍ പൊലിസ് തീരുമാനിച്ചത്. യുവതി സമൂഹമാധ്യമത്തില്‍ പങ്കുവച്ച ദൃശ്യങ്ങള്‍ ഇതിനകം പൊലിസ് ശേഖരിച്ചിട്ടുണ്ട്. ഇവ വിശദമായി പരിശോധിക്കും. കൂടാതെ ബസിലുണ്ടായിരുന്ന സഹയാത്രികരുടെയും ബസ് ജീവനക്കാരുടേയും മൊഴി രേഖപ്പെടുത്തുമെന്നും കേസന്വേഷിക്കുന്ന മെഡി.കോളജ് പൊലിസ് അറിയിച്ചു.

സംഭവത്തെ കുറിച്ച് യുവതി വടകര പൊലിസില്‍ വിവരമറിയിച്ചിരുന്നതായാണ് വെളിപ്പെടുത്തിയത്. എന്നാല്‍ ഇതു സംബന്ധിച്ച് യാതൊരു വിവരവും അറിയില്ലെന്ന് വടകര പൊലിസ് അറിയിച്ചു. എസ്.ഐ വി.ആര്‍ അരുണാണ് കേസ് അന്വേഷിക്കുന്നതെന്ന് മെഡി.കോളജ് ഇന്‍സ്പക്ടര്‍ ബൈജു കെ.ജോസ് പറഞ്ഞു. 

അതേസമയം യുവാവിന്റെ മരണവുമായി ബന്ധപ്പെട്ട് ഹൈക്കോടതി അഭിഭാഷകനും പൊതുപ്രവര്‍ത്തകനുമായ അഡ്വ. കുളത്തൂര്‍ ജയ്‌സിങ് മുഖ്യമന്ത്രിക്ക് പരാതി നല്‍കി.

The family of a 42-year-old man who died by suicide in Kozhikode has filed a complaint, alleging that he was driven to extreme mental distress after a woman accused him of sexual harassment and shared a video of the incident on social media. The video went viral, triggering widespread public reactions.