കൊല്ലം: ശബരിമല സ്വര്‍ണക്കൊള്ള കേസില്‍ തിരുവിതാംകൂര്‍ ദേവസ്വം ബോര്‍ഡ് മുന്‍ പ്രസിഡന്റ് എന്‍. വാസുവിന്റെ റിമാന്‍ഡ് കാലാവധി നീട്ടി. കൊല്ലം വിജിലന്‍സ് കോടതിയാണ് വാസുവിന്റെ റിമാന്‍ഡ് കാലാവധി 14 ദിവസത്തേക്ക് കൂടി നീട്ടിയത്. 

ഇന്ന് റിമാന്‍ഡ് കാലാവധി കഴിഞ്ഞതോടെയാണ് വാസുവിനെ എസ്.ഐ.ടി കോടതിയില്‍ ഹാജരാക്കിയത്. നേരത്തെ വാസു നല്‍കിയ ജാമ്യാപേക്ഷയെല്ലാം കോടതി തള്ളിയിരുന്നു.

അതേസമയം, ദ്വാരപാലക ശില്‍പത്തിലെ സ്വര്‍ണം കവര്‍ന്ന കേസില്‍ മുഖ്യപ്രതി ഉണ്ണികൃഷ്ണന്‍ പോറ്റിയുടെ ജാമ്യാപേക്ഷ നാളെ കോടതി പരിഗണിക്കും. കൊല്ലം വിജിലന്‍സ് കോടതിയാണ് ജാമ്യാപേക്ഷ പരിഗണിക്കുക. 

കേസില്‍ മൂന്നാം പ്രതിയായ വാസുവിനെ ഈ മാസം 19 നാണ് എസ്.ഐ.ടി അറസ്റ്റ് ചെയ്തത്. കമ്മീഷണറായിരുന്ന കാലയളവില്‍ ശബരിമല സന്നിധാനത്തെ സ്വര്‍ണം പൊതിഞ്ഞ കട്ടിളപ്പാളി സ്‌പോണ്‍സര്‍ ഉണ്ണികൃഷ്ണന്‍ പോറ്റിക്ക് കൈമാറിയതുമായി ബന്ധപ്പെട്ട കേസിലാണ് അറസ്റ്റ് രേഖപ്പെടുത്തിയത്. സ്വര്‍ണം പൂശലുമായി ബന്ധപ്പെട്ട്സ്പോണ്‍സറുടെ കൈവശം ബാക്കി സ്വര്‍ണം ഉണ്ടെന്നറിഞ്ഞിട്ടും നടപടിയെടുത്തില്ലെന്നാണ് വാസുവിനെതിരായ ആരോപണം. ശബരിമലയില്‍ സ്വര്‍ണക്കൊള്ള നടന്ന 2019-ല്‍ ദേവസ്വം ബോര്‍ഡ് കമ്മീഷണറായിരുന്നു എന്‍. വാസു.