കോട്ടയം : ശബരിമല തീര്‍ത്ഥാടകര്‍ ചികിത്സ തേടിയെത്തുന്ന എരുമേലി സാമൂഹ്യാ രോഗ്യ കേന്ദ്രത്തില്‍ ആവശ്യത്തിന് ഡോക്ടര്‍മാരെയും നഴ്‌സുമാരെയും നിയമിക്കണമെന്ന് സംസ്ഥാന മനുഷ്യാവകാശ കമ്മീഷന്‍.
രാത്രികാല ചികിത്സ പുനരാരംഭിക്കണമെന്നും ആവശ്യമായ ചികിത്സ രോഗികള്‍ക്ക് ലഭിക്കുന്നുണ്ടെന്ന് അധികൃതര്‍ ഉറപ്പാക്കണമെന്നും കമ്മീഷന്‍ നിര്‍ദ്ദേശിച്ചു. കോട്ടയം ജില്ലാ മെഡിക്കല്‍ ഓഫീസര്‍ക്കും ആരോഗ്യവകുപ്പ് ഡയറക്ടര്‍ക്കുമാണ് കമ്മീഷന്‍ നിര്‍ദ്ദേശം നല്‍കിയിരിക്കുന്നത്. പൊതു പ്രവര്‍ത്തകനായ നെടുംകുന്നം മുഹമ്മദ് സമര്‍പ്പിച്ച പരാതിയിലാണ് നടപടി. ഡോക്ടര്‍മാരുടെ നിയമനം ആരോഗ്യ വകുപ്പിന്റെയും ജില്ലാ മെഡിക്കല്‍ ഓഫീസുകളുടെയും അധികാര പരിധിയില്‍ വരുന്ന കാര്യമാണെന്നും കാഞ്ഞിരപ്പള്ളി ബ്‌ളോക്ക് പഞ്ചായത്ത് സെക്രട്ടറി സമര്‍പ്പിച്ച റിപ്പോര്‍ട്ടില്‍ പറയുന്നു. ശബരിമല തീര്‍ത്ഥാടകരുടെ ഇടത്താവളമായ എരുമേലി ആശുപത്രിയില്‍ ചികിത്സാ സൗകര്യങ്ങള്‍ ഉറപ്പാക്കേണ്ടത് അടിയന്തിര പ്രാധാന്യം നല്‍കേണ്ട വിഷയമാണെന്നും വിശദീകരണത്തില്‍ പറയുന്നു. ജസ്റ്റിസ് ജെ.ബി. കോശിയുടേതാണ് ഉത്തരവ്.