ന്യൂഡല്‍ഹി: സുപ്രിം കോടതിക്കെതിരെ പരാമര്‍ശവുമായി  ഉപരാഷ്ട്രപതി ജഗ്ദീപ് ധന്‍കര്‍ വീണ്ടും. ഭരണഘടനപ്രകാരം ഏറ്റവും ഉന്നതമായ സ്ഥാപനം പാര്‍ലമെന്റാണ്. ഇതിന് മുകളില്‍ ഒരു സ്ഥാപനവും ഇല്ലെന്നാണ് ഉപരാഷ്ട്രപതിയുടെ ഇത്തവണത്തെ പരാമര്‍ശം. 
 
'പാര്‍ലമെന്റാണ് ഏറ്റവും ഉന്നതും. പാര്‍ലമെന്റിന് മുകളില്‍ ഒരു സ്ഥാപനവും ഇല്ല' ഉപരാഷ്ട്രപതി പറഞ്ഞു. തെരഞ്ഞെടുപ്പിലൂടെ തെരഞ്ഞെടുക്കപ്പെടുന്നവര്‍ക്ക് രാജ്യത്തെ സംബന്ധിച്ച ഉത്തരവാദിത്തമുണ്ടാകുമെന്നും ജഗ്ദീപ് ധന്‍കര്‍ കൂട്ടിച്ചേര്‍ത്തു.

1975ല്‍ ഇന്ദിരാഗാന്ധി അടിയന്തരാവസ്ഥ പ്രഖ്യാപിച്ചപ്പോള്‍ അതില്‍ ഇടപെടാന്‍ സുപ്രിംകോടതി തയാറായില്ല. അടിയന്തരാവസ്ഥകാലത്ത് മൗലികാവകാശങ്ങള്‍ ലംഘിക്കപ്പെട്ടപ്പോള്‍ ഒമ്പത് ഹൈകോടതികളുടെ വിധി തള്ളി അതിന് അനുകൂലമായ നിലപാടാണ് സുപ്രിം കോടതി സ്വീകരിച്ചത്.
ഭരണഘടനയുടെ ആമുഖം സംബന്ധിച്ചും വ്യത്യസ്തമായ വിധികളാണ് കോടതി പുറപ്പെടുവിച്ചത്- ധന്‍കര്‍ ചൂണ്ടിക്കാട്ടി.

ജഡ്ജിമാര്‍ നിയമനിര്‍മാണം നടത്തുകയും അത് നടപ്പിലാക്കുകയും സൂപ്പര്‍ പാര്‍ലമെന്റായി പ്രവര്‍ത്തിക്കുകയും ചെയ്യുന്നുവെന്ന് പറഞ്ഞ് ധന്‍കര്‍ നേരത്തെ രംഗത്തെത്തിയിരുന്നു. ബില്ലുകളില്‍ തീരുമാനമെടുക്കാന്‍ രാഷ്ട്രപതിക്ക് സമയപരിധി നിശ്ചയിച്ച സുപ്രിം കോടതി വിധിയില്‍ ആശങ്ക പ്രകടിപ്പിച്ചായിരുന്നു ഉപരാഷ്ട്രപതി ജഗ്ദീപ് ധന്‍കറിന്റെ ഈ പരാമര്‍ശം. ധന്‍കറിന്റെ ഈ കോടതി വിമര്‍ശനത്തിനെതിരെ വലിയ പ്രതിഷേധമാണ് ഉയര്‍ന്നുവന്നത്. ധന്‍കറിനെതിരെ നിയമനടപടി സ്വീകരിക്കണമെന്നും ആവശ്യം ഉയര്‍ന്നിരുന്നു.