റിയാദ്: സഊദി പ്രൊ ലീഗിൽ ഈ സീസണിലെ ഗോൾഡൻ ബൂട്ടിനായുള്ള ക്രിസ്റ്റ്യാനോ റൊണാൾഡൊക്കെതിരെയുള്ള പോരാട്ടത്തെക്കുറിച്ച് സംസാരിക്കുകയാണ് അൽ ഇത്തിഹാദിന്റെ ഫ്രഞ്ച് താരം കരിം ബെൻസിമ. താൻ ട്രോഫികൾക്കാണ് പ്രാധാന്യം നൽകുന്നതെന്നാണ് ഫ്രഞ്ച് താരം പറഞ്ഞത്. ഗോൾഡൻ ബൂട്ടിനായുള്ള മത്സരത്തിൽ റൊണാൾഡോയെ തോൽപ്പിക്കാൻ കഴിയുമെന്ന് തോന്നുന്നുണ്ടോ എന്ന ചോദ്യത്തിന് ഇഎസ്പിഎന്നിലൂടെ പ്രതികരിക്കുകയായിരുന്നു ബെൻസിമ. 

''ഗോൾഡൻ ബൂട്ടിന്റെ കാര്യത്തിൽ എനിക്ക് ഇതൊന്നും വലിയ പ്രശ്നമല്ല. ഞാൻ ട്രോഫികൾക്കാണ് പ്രാധാന്യം നൽകുന്നത്'' കരിം ബെൻസിമ പറഞ്ഞു. 

ഈ സീസണിൽ സഊദി ലീഗിൽ ഗോൾ വേട്ടക്കാരുടെ പട്ടികയിൽ ഒന്നാം സ്ഥാനത്തുള്ളത് റൊണാൾഡോയാണ്. 27 മത്സരങ്ങളിൽ നിന്നും 23 ഗോളുകളാണ് റൊണാൾഡോ അൽ നസറിനായി നേടിയിട്ടുള്ളത്. ലീഗിലെ ഓരോ  മത്സരങ്ങളിലും ഗോളുകൾ നേടി മിന്നും ഫോമിലാണ് റൊണാൾഡോ കളിച്ചുകൊണ്ടിരിക്കുന്നത്.

മറുഭാഗത്ത് ലീഗിൽ 26 മത്സരങ്ങളിൽ നിന്നുമായി 18 തവണയാണ് ബെൻസിമ എതിരാളികളുടെ വലയിൽ പന്തെത്തിച്ചത്. ഗോൾ വേട്ടക്കാരുടെ പട്ടികയിൽ നിലവിൽ നാലാം സ്ഥാനത്താണ് ബെൻസിമ. 24 ഗോളുകൾ വീതം നേടിയ അബ്ദർറസാക് ഹംദല്ല(അൽ ശബാബ് എഫ്‌സി), ഇവാൻ ടോണി(അൽ അഹ്ലി) എന്നിവരാണ് ഗോൾ വേട്ടക്കാരിൽ റൊണാൾഡോക്ക് പുറകിലുള്ളത്. 

നിലവിൽ സഊദി പ്രൊ ലീഗിൽ ഒന്നാം സ്ഥാനത്താണ് അൽ ഇത്തിഹാദ്. 29 മത്സരങ്ങളിൽ നിന്നും 21 വിജയവും അഞ്ചു സമനിലയും മൂന്ന് തോൽവിയും അടക്കം 68 പോയിന്റാണ് ബെൻസിമയുടെയും സംഘത്തിന്റെയും കൈവശമുള്ളത്. റൊണാൾഡോയുടെ അൽ നസർ 60 പോയിന്റുമായി മൂന്നാം സ്ഥാനത്തുമാണ്. 29 മത്സരങ്ങളിൽ നിന്നുമായി 18 ജയവും ആറ് സമനിലയും അഞ്ചു തോൽവിയുമാണ് അൽ നസറിന്റെ സമ്പാദ്യം.

ഒന്നാം സ്ഥാനത്തുള്ള അൽ ഇത്തിഹാദുമായി എട്ട് പോയിന്റിന്റെ വ്യത്യാസമാണ് അൽ നസറിനുള്ളത്. ലീഗിൽ ഇനി അഞ്ചു മത്സരങ്ങൾ മാത്രമേ ബാക്കിയുള്ളൂ. അതുകൊണ്ട് തന്നെ ഇനിയുള്ള ഓരോ മത്സരങ്ങളും നിർണായകമാണ്. മാർച്ച് ഏഴിന് അൽ ഇത്തിഹാദ്- അൽ നസർ മത്സരവും നടക്കും. ഈ മത്സരവും ലീഗിൽ വളരെ നിർണായകമാവുമെന്നാണ് പ്രതീക്ഷിക്കുന്നത്. 

Al Ittihads French star Karim Benzema is talking about his battle against Cristiano Ronaldo for this seasons Golden Boot in the Saudi Pro League