ജയ്പൂർ: ഐപിഎല്ലിൽ ഇന്ന് നടക്കുന്ന മത്സരത്തിൽ രാജസ്ഥാൻ റോയൽസും ഗുജറാത്ത് ടൈറ്റൻസുമാണ് നേർക്കുനേർ എത്തുന്നത്. രാജസ്ഥാന്റെ തട്ടകമായ സവായ് മാൻസിംഗ് സ്റ്റേഡിയത്തിൽ നടക്കുന്ന ഈ മത്സരത്തിലും രാജസ്ഥാൻ നായകൻ സഞ്ജു സാംസൺ കളിച്ചേക്കില്ല. ടീമിന്റെ പരിശീലന സെക്ഷനുകളിൽ സഞ്ജു പങ്കെടുത്തിട്ടുണ്ടെന്നും എന്നാൽ മത്സരത്തിന് താരം പൂർണമായും തയ്യാറായിട്ടില്ലെന്നുമാണ് റിപ്പോർട്ടുകൾ സൂചിപ്പിക്കുന്നത്.  

ഡൽഹി ക്യാപ്പിറ്റൽസിനെതിരായ മത്സരത്തിൽ ആണ് സഞ്ജു പരുക്ക് സംഭവിച്ചിരുന്നത്. മത്സരത്തിൽ 19 പന്തിൽ 31 റൺസായിരുന്നു സഞ്ജു നേടിയിരുന്നത്. രണ്ട് ഫോറുകളും ഒരു സിക്‌സും നേടിക്കൊണ്ട് മിന്നും ഫോമിൽ തുടരവെയാണ് സഞ്ജുവിനു ഈ തിരിച്ചടി നേരിടേണ്ടി വന്നത്. ഇതോടെ രാജസ്ഥാൻ റോയൽസിന്റെ ചരിത്രത്തിൽ ആദ്യമായി പരുക്കേറ്റ് റിട്ടയർഡ് ഹർട്ട് ആവുന്ന താരമായും സഞ്ജു മാറി. കൃണാൽ പാണ്ഡ്യക്ക് ശേഷം ഐപിഎല്ലിൽ പരുക്കേറ്റ് പുറത്താകുന്ന രണ്ടാമത്തെ ക്യാപ്റ്റൻ കൂടിയാണ് സഞ്ജു. 

സഞ്ജുവിന്റെ അഭാവത്തിൽ റിയാൻ പരാഗ് ആയിരുന്നു രാജസ്ഥാനെ നയിച്ചിരുന്നത്. സീസണിൽ ആദ്യ മൂന്ന് മത്സരങ്ങളിലും രാജസ്ഥാനെ നയിച്ചതും പരാഗ് തന്നെയാണ്. സഞ്ജു ആദ്യ മൂന്ന് മത്സരങ്ങളിൽ ഇമ്പാക്ട് പ്ലയെർ ആയാണ് കളത്തിൽ ഇറങ്ങിയിരുന്നത്. ടീമിനെ ഒറ്റ മത്സരത്തിൽ മാത്രമേ പരാഗിന്റെ ക്യാപ്റ്റൻസിയിൽ വിജയത്തിലെത്തിക്കാൻ സാധിച്ചത്. 

അവസാന മത്സരത്തിൽ റോയൽ ചലഞ്ചേഴ്സ് ബെംഗളൂരുവിനെതിരെ 11 റൺസിനായിരുന്നു രാജസ്ഥാൻ പരാജയപ്പെട്ടത്. മത്സരത്തിൽ ആദ്യം ബാറ്റ് ചെയ്ത ആർസിബി 20 ഓവറിൽ അഞ്ചു വിക്കറ്റ് നഷ്ടത്തിൽ 205 റൺസ് ആണ് നേടിയത്. വിജയലക്ഷ്യം പിന്തുടർന്നിറങ്ങിയ രാജസ്ഥാന്റെ ഇന്നിംഗ്സ് 20 ഓവറിൽ ഒമ്പത് വിക്കറ്റ് നഷ്ടത്തിൽ 194 റൺസിൽ അവസാനിക്കുകയായിരുന്നു.

നിലവിൽ ഐപിഎൽ പോയിന്റ് പട്ടികയിൽ ഒമ്പതാം സ്ഥാനത്താണ് രാജസ്ഥാൻ. ഒമ്പത് മത്സരങ്ങളിൽ നിന്നും രണ്ട് ജയവും ഏഴ് തോൽവിയും അടക്കം നാല് പോയിന്റാണ് രാജസ്ഥാനുള്ളത്. മറുഭാഗത്ത് ഗുജറാത്ത് പോയിന്റ് പട്ടികയിൽ രണ്ടാം സ്ഥാനത്തുമാണ്. എട്ട് മത്സരങ്ങളിൽ നിന്നും ആറ് ജയവും രണ്ട് തോൽവിയും അടക്കം 12 പോയിന്റാണ് ഗുജറാത്തിനുള്ളത്. 

Report says Sanju Samson will miss Gujarat Titans Match in IPL 2025