തിരുവനന്തപുരം: യമനിൽ വധശിക്ഷയ്ക്ക് വിധിക്കപ്പെട്ട് ജയിലിൽ കഴിയുന്ന മലയാളി നഴ്സ് നിമിഷ പ്രിയയുടെ മോചനത്തിനായി അടിയന്തര ഇടപെടൽ ആവശ്യപ്പെട്ട് പ്രതിപക്ഷ നേതാവ് വി.ഡി. സതീശൻ രാഷ്ട്രപതിക്ക് കത്തയച്ചു. യമൻ പൗരൻ തലാൽ അബു മഹ്ദിയുടെ കൊലപാതകവുമായി ബന്ധപ്പെട്ട കേസിൽ സനായിലെ ജയിലിൽ കഴിയുന്ന നിമിഷ പ്രിയയുടെ വധശിക്ഷ വരുന്ന ബുധനാഴ്ച (ജൂലൈ 16) നടപ്പാക്കാനിരിക്കെ, ‘സേവ് നിമിഷ പ്രിയ ആക്ഷൻ കൗൺസിൽ’ മോചനത്തിനായി എല്ലാ വഴികളും തേടുന്നതിന്റെ ഭാ​ഗമായാണ്  വി.ഡി. സതീശൻ രാഷ്ട്രപതിക്ക് കത്തയച്ചത്.

സുപ്രീംകോടതിയിൽ ആക്ഷൻ കൗൺസിലിന്റെ ഹരജി അഭിഭാഷകൻ കെ.ആർ. സുഭാഷ് ചന്ദ്രൻ മെൻഷൻ ചെയ്തു. കേന്ദ്ര സർക്കാരിന്റെ നയതന്ത്ര ഇടപെടലിലൂടെ തലാലിന്റെ കുടുംബവുമായി ചർച്ചകൾക്ക് സാഹചര്യമൊരുക്കണമെന്നാണ് ഹരജിയിലെ ആവശ്യം. ഈ ഹരജി തിങ്കളാഴ്ച സുപ്രീംകോടതി പരിഗണിക്കും.

2017 ജൂലായിൽ നിമിഷ പ്രിയയും സുഹൃത്തും ചേർന്ന് യമൻ പൗരൻ തലാൽ അബു മഹ്ദിയെ കൊലപ്പെടുത്തി, മൃതദേഹം വീടിന് മുകളിലെ ജലസംഭരണിയിൽ ഒളിപ്പിച്ച കേസിലാണ് വധശിക്ഷ വിധിച്ചത്. ജയിൽ അധികൃതർക്ക് യമനിലെ പബ്ലിക് പ്രോസിക്യൂട്ടർ നൽകിയ നിർദേശപ്രകാരം ഈ മാസം 16-ന് വധശിക്ഷ നടപ്പാക്കാനാണ് തീരുമാനം.

ALSO READ: ​ഗസ്സയിലെ വംശഹത്യയുടെ മാനസികാഘാതം: ഇസ്റാഈലി സൈനികൻ ആത്മഹത്യ ചെയ്തു; സൈനിക ബഹുമതിയോടെയുള്ള ശവസംസ്കാരം ആവശ്യപ്പെട്ട കുടുംബത്തിന്റെ അപേക്ഷ നിരസിച്ച് ഇസ്റാഈൽ

രാഷ്ട്രീയ നേതാക്കളുടെ ഇടപെടൽ

നിമിഷ പ്രിയയുടെ മോചനത്തിനായി എല്ലാ സാധ്യതകളും പ്രയോജനപ്പെടുത്തുമെന്ന് കെ. രാധാകൃഷ്ണൻ എം.പി. വ്യക്തമാക്കി. കേന്ദ്ര വിദേശകാര്യ മന്ത്രാലയം അടിയന്തിരമായി ഇടപെടണമെന്ന് കോൺഗ്രസ് നേതാവ് രമേശ് ചെന്നിത്തല ആവശ്യപ്പെട്ടു. കേരളത്തിൽ നിന്നുള്ള എം.പി.മാരായ കെ. രാധാകൃഷ്ണൻ, ഡോ. ജോൺ ബ്രിട്ടാസ്, അടൂർ പ്രകാശ്, എ.എ. റഹീം, ഹാരിസ് ബീരാൻ എന്നിവർ കേന്ദ്ര സർക്കാരിന് കത്തയച്ചു. പ്രധാനമന്ത്രി നരേന്ദ്ര മോദിക്കും വിദേശകാര്യ മന്ത്രി എസ്. ജയ്ശങ്കറിനും അയച്ച കത്തുകളിൽ വിഷയം പാർലമെന്റിന്റെ ശ്രദ്ധയിൽപ്പെടുത്തിയിട്ടുണ്ടെന്നും അവർ അറിയിച്ചു.

ALSO READ: വളർത്തുപൂച്ച മാന്തിയതിനെ തുടർന്ന് ചികിത്സയിലായിരുന്ന വിദ്യാർഥിനി മരിച്ചു 

മനുഷ്യാവകാശ പ്രവർത്തകന്റെ ശ്രമങ്ങൾ

യമനിൽ എത്തിയ മനുഷ്യാവകാശ പ്രവർത്തകൻ സാമൂവൽ ജെറോം, തലാലിന്റെ കുടുംബവുമായി ചർച്ചകൾ നടത്താനുള്ള ശ്രമങ്ങൾ തുടരുകയാണ്. ഇന്ത്യയ്ക്ക് ഇറാനുമായുള്ള സൗഹൃദ ബന്ധം പ്രയോജനപ്പെടുത്തി വിഷയത്തിൽ ഇടപെടണമെന്ന് ഡോ. ജോൺ ബ്രിട്ടാസ് എം.പി. കഴിഞ്ഞ ബജറ്റ് സമ്മേളനത്തിൽ ആവശ്യപ്പെട്ടിരുന്നു. വിദേശകാര്യ മന്ത്രാലയം യമനിലേക്ക് 40,000 ഡോളർ അയച്ചെങ്കിലും, ഇത് ആർക്കാണ് നൽകിയതെന്നതിന് വ്യക്തമായ മറുപടി ലഭിച്ചിട്ടില്ല. ഇനിയും എത്ര തുക വേണ്ടിവരുമെന്ന് ആക്ഷൻ കൗൺസിൽ ചോദിച്ചിട്ടുണ്ട്.

തുടർനടപടികൾ

നിമിഷ പ്രിയയെ വധശിക്ഷയിൽ നിന്ന് രക്ഷിക്കാൻ യമനിലെ സാമൂഹ്യപ്രവർത്തകർ ഉൾപ്പെടെ ശ്രമങ്ങൾ തുടരുന്നു. കേന്ദ്ര സർക്കാരിന്റെ സമയബന്ധിതമായ ഇടപെടൽ അനിവാര്യമാണെന്ന് നേതാക്കൾ ചൂണ്ടിക്കാട്ടി. ഇന്ത്യയുടെ നയതന്ത്ര സ്വാധീനം ഉപയോഗിച്ച് തലാലിന്റെ കുടുംബവുമായി ധാരണയിലെത്താൻ കഴിഞ്ഞാൽ നിമിഷ പ്രിയയുടെ ശിക്ഷ ഒഴിവാക്കാനാകുമെന്ന പ്രതീക്ഷയിലാണ് ആക്ഷൻ കൗൺസിലും മറ്റ് പ്രവർത്തകരും.