മംഗളൂരു: 'പാകിസ്താൻ സിന്ദാബാദ്' മുദ്രാവാക്യം വിളിച്ചെന്നാരോപിച്ച് മംഗളൂരുവിൽ ആൾക്കൂട്ടം മർദ്ദിച്ച് കൊലപ്പെടുത്തിയത് മലയാളി യുവാവിനെയെന്ന് സംശയം. സംഭവത്തിന് പിന്നിൽ സംഘപരിവാർ ആക്രമണമെന്ന് സിപിഎം ആരോപിച്ചു.

കുടുപ്പുവിൽ ഞായറാഴ്ച നടന്ന പ്രാദേശിക ക്രിക്കറ്റ് മത്സരത്തിനിടെ, ഭത്ര കല്ലുർട്ടി ക്ഷേത്രത്തിന് സമീപമുള്ള മൈതാനത്താണ് സംഭവം. 'പാകിസ്താൻ സിന്ദാബാദ്' എന്ന മുദ്രാവാക്യം വിളിച്ചെന്ന് ആരോപിച്ച് ആൾക്കൂട്ടം യുവാവിനെ ക്രൂരമായി മർദ്ദിക്കുകയായിരുന്നു. മരണം സ്ഥിരീകരിച്ചതിന് പിന്നാലെ, അക്രമികൾ മൃതദേഹം മൈതാനത്ത് ഉപേക്ഷിച്ച് രക്ഷപ്പെട്ടു.

മൃതദേഹം തിരിച്ചറിയുന്നതിനായി കർണാടക പൊലീസും കേരള പൊലീസും ബന്ധപ്പെട്ടതിനെ തുടർന്ന്, മരണപ്പെട്ടയാളുടെ ബന്ധുക്കൾ മംഗളൂരുവിലേക്ക് തിരിച്ചു. രാത്രി ഒരു മണിയോടെ മംഗളൂരുവിലെത്തുമെന്നാണ് വിവരം. മൃതദേഹം മോർച്ചറിയിലേക്ക് മാറ്റിയിരിക്കുകയാണ്.

വെൻലോക്ക് ജില്ലാ ആശുപത്രിയിൽ നടത്തിയ പോസ്റ്റ്‌മോർട്ടത്തിൽ, തുടർച്ചയായ മർദനമാണ് മരണകാരണമെന്ന് സ്ഥിരീകരിച്ചു. തലയിലും ശരീരത്തിലും ആഴത്തിലുള്ള മുറിവുകളും കണ്ടെത്തി. സംഭവത്തിൽ 19 പേർക്കെതിരെ പൊലീസ് കേസെടുത്തു. 15 പേരെ അറസ്റ്റ് ചെയ്തിട്ടുണ്ട്. കുടുപ്പു സ്വദേശി ടി. സച്ചിനാണ് ആൾക്കൂട്ട ആക്രമണത്തിന് നേതൃത്വം നൽകിയതെന്ന് പൊലീസ് വ്യക്തമാക്കി. കുടുപ്പു സ്വദേശി ദീപക് കുമാർ (33) നൽകിയ പരാതിയുടെ അടിസ്ഥാനത്തിലാണ് കേസ് രജിസ്റ്റർ ചെയ്തത്.