തൃശൂർ: കേന്ദ്രമന്ത്രി സുരേഷ് ഗോപി പുലിപ്പല്ല് മാല ഉപയോഗിക്കുന്നുവെന്ന് പരാതി. പുലിപ്പല്ല് മാല എവിടെനിന്ന് ലഭിച്ചുവെന്ന് വ്യക്തമാക്കണമെന്നും ഇത് വന്യജീവി സംരക്ഷണ നിയമത്തിന്റെ (വൈൽഡ് ലൈഫ് പ്രൊട്ടക്ഷൻ ആക്ട്) ലംഘനമാണെന്നും ചൂണ്ടിക്കാട്ടി ഐഎൻടിയുസി യുവജനവിഭാഗം സംസ്ഥാന ജനറൽ സെക്രട്ടറിയും യൂത്ത് കോൺഗ്രസ് മുൻ ദേശീയ വക്താവുമായ മുഹമ്മദ് ഹാഷിം സംസ്ഥാന പൊലീസ് മേധാവിക്ക് പരാതി നൽകി. നിയമലംഘനം നടന്നിട്ടുണ്ടോയെന്ന് അന്വേഷിച്ച് ഉചിതമായ നടപടി സ്വീകരിക്കണമെന്നാണ് പരാതിയിലെ ആവശ്യം.

അതിനിടെ, പുലിപ്പല്ല് കൈവശം വച്ചതിന് റാപ്പർ വേടനെ വനംവകുപ്പ് അറസ്റ്റ് ചെയ്തു. മൃഗവേട്ട ഉൾപ്പെടെയുള്ള വകുപ്പുകൾ ചുമത്തിയാണ് കേസെടുത്തത്. പെരുമ്പാവൂർ കോടനാട്ടെ ഫോറസ്റ്റ് റേഞ്ച് ഓഫീസിൽ നടത്തിയ ചോദ്യംചെയ്യലിന് ശേഷമാണ് നടപടി.

വേടന്റെ മൊഴി പ്രകാരം, പുലിപ്പല്ല് തനിക്ക് സമ്മാനമായി ലഭിച്ചതാണ്, അത് യഥാർഥമാണെന്ന് അറിയില്ലായിരുന്നു. ചെന്നൈയിൽ നടന്ന ഒരു പരിപാടിക്കിടെ പുലിപ്പല്ല് സമ്മാനമായി ലഭിച്ചതാണെന്നും ഇൻസ്റ്റഗ്രാം വഴി രഞ്ജിത് കുമ്പിടിയെ പരിചയപ്പെട്ടതായും വേടൻ പറഞ്ഞു.