തിരുവനന്തപുരം: കുമരകത്തെ റിസോര്‍ട്ടില്‍ ആര്‍എസ്എസ് അനുഭാവികളായ ജയില്‍ ഉദ്യോഗസ്ഥര്‍ രഹസ്യയോഗം ചേര്‍ന്ന സംഭവത്തില്‍ ജയില്‍ വകുപ്പ് 18 ഉദ്യോഗസ്ഥര്‍ക്കെതിരെയായ നടപടി സ്ഥലംമാറ്റം മാത്രമായി ഒതുക്കുകയും, എന്നാൽ ഇതിന് സൗകര്യമൊരുക്കിയ കുമരകം പൊലീസ് സ്റ്റേഷനിലെ ഉദ്യോഗസ്ഥനെതിരെ നടപടിയില്ലാത്തത് വലിയ വിമര്‍ശനത്തിന് വഴിയൊരുക്കുന്നു. ആർഎസ്എസ് അനുഭാവികളായ പൊലീസ് ഉദ്യോ​ഗസ്ഥർ നടത്തിയ യോ​ഗത്തിൽ എന്തെല്ലാം കാര്യങ്ങൾ ചർച്ച ചെയ്തു എന്നത് ഇപ്പോഴും അവ്യക്തമാണ്. വിഷയത്തിൽ സർക്കാരിന്റെ ഭാ​ഗത്ത് നിന്നുള്ള വിശദമായ അന്വേഷണം ഉണ്ടാകുമോ എന്നതാണ് ഇനി അറിയേണ്ടത്.

ജനുവരിയില്‍ നടന്ന ഈ യോഗം, രാഷ്ട്രീയാടിസ്ഥാനത്തില്‍ സംഘടിക്കരുതെന്ന ജയില്‍ വകുപ്പിന്റെ ചട്ടങ്ങള്‍ക്ക് വിരുദ്ധമാണ്. സ്പെഷ്യല്‍ ബ്രാഞ്ചും ഇന്റലിജന്‍സ് വിഭാഗവും ഇതുസംബന്ധിച്ച് സര്‍ക്കാരിനും ജയില്‍ വകുപ്പിനും റിപ്പോര്‍ട്ട് സമര്‍പ്പിച്ചിരുന്നു. 13 ഡെപ്യൂട്ടി പ്രിസണ്‍ ഓഫീസര്‍മാരും അഞ്ച് അസിസ്റ്റന്റ് പ്രിസണ്‍ ഓഫീസര്‍മാരും ഉള്‍പ്പെട്ട ഈ രഹസ്യ കൂടിക്കാഴ്ചയ്ക്ക് റിസോര്‍ട്ടിലെ മുറികള്‍ ഏര്‍പ്പാടാക്കിയത് കുമരകം പൊലീസ് സ്റ്റേഷനിലെ ഒരു ഉദ്യോഗസ്ഥനാണ്. ഈ പൊലീസ് ഉദ്യോഗസ്ഥനെതിരെ യാതൊരു നടപടിയും സ്വീകരിക്കാത്തത് സര്‍ക്കാരിന്റെ ഇരട്ടത്താപ്പിനെയാണ് ചൂണ്ടിക്കാട്ടുന്നത്.

സ്പെഷ്യല്‍ ബ്രാഞ്ചിന്റെയും ഇന്റലിജന്‍സ് വിഭാഗത്തിന്റെയും റിപ്പോര്‍ട്ടുകള്‍ ഈ യോഗത്തിന്റെ ഗൗരവം വ്യക്തമാക്കിയിട്ടുണ്ട്. "ഒരേ മനസുള്ള ഞങ്ങളുടെ കൂട്ടായ്മ. കോട്ടയത്ത് തുടക്കമായി, ഇനി വളര്‍ന്നുകൊണ്ടേയിരിക്കും" എന്ന അടിക്കുറിപ്പോടെ സമൂഹമാധ്യമങ്ങളില്‍ പ്രചരിച്ച ചിത്രങ്ങള്‍ ജനങ്ങള്‍ക്കിടയില്‍ വലിയ പ്രതിഷേധത്തിന് കാരണമായി. തിരുവനന്തപുരം, വിയ്യൂര്‍, കണ്ണൂര്‍, തവനൂര്‍ തുടങ്ങിയ ജയിലുകളില്‍ നിന്നുള്ള ഉദ്യോഗസ്ഥര്‍ പങ്കെടുത്ത ഈ യോഗം, സര്‍ക്കാര്‍ സര്‍വീസിന്റെ നിഷ്പക്ഷതയെ ചോദ്യം ചെയ്യുന്നതാണ്.

ആര്‍എസ്എസ് അനുഭാവികളായ ജയില്‍ ഉദ്യോഗസ്ഥര്‍ നടത്തിയ ​രഹസ്യ കൂടിക്കാഴ്ചയ്ക്ക് മുറി ഏർപ്പാടാക്കിയ കുമരകം പൊലീസ് സ്റ്റേഷനിലെ പൊലീസ് ഉദ്യോഗസ്ഥന്റെ പങ്ക് വ്യക്തമായിട്ടും നടപടി എടുക്കാത്തത്, ആഭ്യന്തര വകുപ്പിന്റെ വീഴ്ചയും അന്വേഷണം പോലും പ്രഖ്യാപിക്കാത്തത് സര്‍ക്കാരിന്റെ ഇരട്ടനീതിയെയുമാണ് ചോദ്യം ചെയ്യുന്നത്. ജയില്‍ ഉദ്യോഗസ്ഥര്‍ക്കെതിരെ കര്‍ശന നടപടി സ്വീകരിച്ച സര്‍ക്കാര്‍, പൊലീസിന്റെ ഈ ഗുരുതരമായ ഇടപെടലിനെ അവഗണിക്കുന്നത് നിയമവാഴ്ചയോടുള്ള വെല്ലുവിളിയാണ്.

മുന്‍ ആഭ്യന്തര മന്ത്രിയും കോണ്‍ഗ്രസ് നേതാവുമായ രമേശ് ചെന്നിത്തല, യോഗം സര്‍ക്കാരിന്റെ പിന്തുണയോടെയാണ് നടന്നതെന്ന് ഗുരുതര ആരോപണം ഉന്നയിച്ചു. "ഒരേ മനസുള്ള ഞങ്ങളുടെ കൂട്ടായ്മ" എന്ന അടിക്കുറിപ്പോടെ സമൂഹമാധ്യമങ്ങളില്‍ പ്രചരിച്ച യോഗത്തിന്റെ ചിത്രങ്ങള്‍ ജനരോഷത്തിന് കാരണമായി. യോഗത്തില്‍ എന്തൊക്കെ ചര്‍ച്ച ചെയ്തുവെന്ന് വ്യക്തമല്ലാത്ത സാഹചര്യത്തില്‍, ഇതേക്കുറിച്ച് വിശദമായ അന്വേഷണം നടത്തണമെന്നാണ് പൊതുജനങ്ങളുടെ ആവശ്യം.

സര്‍ക്കാര്‍ സര്‍വീസിന്റെ നിഷ്പക്ഷതയും വിശ്വാസ്യതയും ഉറപ്പാക്കാന്‍ രാഷ്ട്രീയ ഇടപെടലുകള്‍ തടയുന്നതിന് കര്‍ശന നിയന്ത്രണങ്ങള്‍ അനിവാര്യമാണെന്ന് വിമര്‍ശകര്‍ ചൂണ്ടിക്കാട്ടുന്നു. പൊലീസ് ഉദ്യോഗസ്ഥനെതിരെ ഉടനടി അന്വേഷണം നടത്തി കര്‍ശന നടപടി സ്വീകരിക്കണമെന്ന ആവശ്യവും ശക്തമാകുകയാണ്.