കാബൂള്‍: അഫ്ഗാനിസ്ഥാനില്‍ ഇന്ധന ടാങ്കറും ബസും കൂട്ടിയിടിച്ചുണ്ടായ അപകടത്തില്‍ 35 പേര്‍ മരിച്ചു. 20 പേര്‍ക്ക് പരുക്കേറ്റു. അപകടത്തെ തുടര്‍ന്ന് വന്‍ സ്‌ഫോടനം നടന്നുവെന്നാണ് റിപ്പോര്‍ട്ടുകള്‍. തെക്കന്‍ പ്രവിശ്യയായ കാണ്ഡഹാറും കാബൂളും തമ്മില്‍ ബന്ധിപ്പിക്കുന്ന സാബുല്‍ പ്രവിശ്യയിലെ ഹൈവേയില്‍ ഇന്നലെയായിരുന്നു അപകടം. കാണ്ഡഹാറില്‍ നിന്നു കാബൂളിലേക്ക് പോകുകയായിരുന്ന ബസാണ് അപകടത്തില്‍പ്പെട്ടത്. ബസില്‍ 60 ലേറെ യാത്രക്കാരുണ്ടായിരുന്നുവെന്ന് പൊലിസ് അറിയിച്ചു. ആറു പേരുടേത് ഒഴികെ മറ്റു മൃതദേഹങ്ങളെല്ലാം തിരിച്ചറിയാനാകാത്ത വിധം കത്തിക്കരിഞ്ഞു. ഇന്ധന ടാങ്കറിലെ ഡ്രൈവറും മരിച്ചു.
ഇന്നലെ പുലര്‍ച്ചെ പ്രശ്‌ന മേഖലയിലാണ് അപകടമുണ്ടായതെന്ന് പൊലിസ് അറിയിച്ചു. ആക്രമണം ഭയന്ന് ഇവിടെ വാഹനങ്ങള്‍ അമിത വേഗതയിലാണ് ഓടിക്കാറുള്ളത്. കൂടാതെ ലോകത്തെ ഏറ്റവും മോശം റോഡുകളുള്ള രാജ്യമാണ് അഫ്ഗാനിസ്ഥാന്‍. റോഡുകളുടെ നിലവാരത്തകര്‍ച്ചയും ഡ്രൈവര്‍മാര്‍ ട്രാഫിക് നിയമങ്ങള്‍ പാലിക്കാത്തതും മൂലം ഇവിടെ അപകടങ്ങള്‍ പതിവാണ്.
കാലപ്പഴക്കം ചെന്ന വാഹനങ്ങളും അപകടത്തിനു കാരണമാകുന്നു. കഴിഞ്ഞ മെയില്‍ ബസുകള്‍ കൂട്ടിയിടിച്ച് 73 പേര്‍ കൊല്ലപ്പെട്ടിരുന്നു