ഗുരുഗ്രാം(ഹരിയാന): സ്ത്രീ പീഡനക്കേസുകള്‍ കൂടിവരുന്ന സാഹചര്യത്തില്‍ സുരക്ഷാ ക്രമീകരണങ്ങള്‍ വര്‍ധിപ്പിക്കുന്നതിന്റെ ഭാഗമായി ഓപറേഷന്‍ റോമിയോ റിട്ടേണ്‍സ് പരിപാടിയുമായി ഗുഡ്ഗാവ് പൊലിസ് രംഗത്തെത്തി. ശനിയാഴ്ച മാത്രം 121ഓളം പൂവാലന്മാരാണ് പൊലിസ് വലയിലായത്. നഗരത്തില്‍ സ്ത്രീകള്‍ക്കുനേരെ അക്രമങ്ങള്‍ വര്‍ധിച്ചുവരുന്നത് കണക്കിലെടുത്താണ് നടപടിയെന്ന് അസിസ്റ്റന്റ് പൊലിസ് കമ്മിഷനര്‍ ധര്‍ണ യാദവ് പറഞ്ഞു. രാത്രി സമയങ്ങളില്‍ റോഡിലൂടെ ഇറങ്ങിനടക്കാന്‍ പെണ്‍കുട്ടികള്‍ ഭയക്കുകയാണ്. സ്ത്രീകള്‍ക്ക് സുരക്ഷ ഉറപ്പാക്കാന്‍ ഇത്തരത്തിലുള്ള നടപടികള്‍ നഗരത്തിന്റെ പലയിടങ്ങളിലേക്കും വ്യാപിപ്പിക്കുമെന്ന് കമ്മിഷനര്‍ വ്യക്തമാക്കി.
നേരത്തെ ഓഗസ്റ്റ് 27നു നടത്തിയ ഓപറേഷനില്‍ 50ഓളം പേരെ പൊലിസ് അറസ്റ്റ് ചെയ്തിരുന്നു.