നിലവിൽ ലോക ഫുട്ബോളിൽ ഏറ്റവും മികച്ച യുവതാരങ്ങളിൽ ഒരാളാണ് സ്പാനിഷ് യുവതാരം ലാമിൻ യമാൽ. ഇതിഹാസ താരങ്ങളായ ലയണൽ മെസി, ക്രിസ്റ്റ്യാനോ റൊണാൾഡോ എന്നീ താരങ്ങളുമായി പല താരങ്ങളും പരിശീലകരും യമാലിനെ താരതമ്യം ചെയ്യുന്നുണ്ട്. ഇപ്പോൾ മെസിയുടെയും റൊണാൾഡോയുടെയും ലെവലിൽ എത്താൻ യമാൽ എന്താണ് ചെയ്യേണ്ടതെന്ന് പറയുകയാണ് ബാഴ്സലോണ പരിശീലകൻ ഹാൻസി ഫ്ലിക്ക്. നൽകി. മുണ്ടോ ഡിപോർട്ടീവോക്ക് നൽകിയ അഭിമുഖത്തിലാണ് ജർമൻ മാനേജർ ഇക്കാര്യം പറഞ്ഞത്.  

"റൊണാൾഡോയെപ്പോലെയും മെസിയെപ്പോലെയും ഉള്ള ലെവലിൽ എത്താൻ നിങ്ങൾ ആഗ്രഹിക്കുന്നുവെങ്കിൽ നിങ്ങൾ ശാന്തത പാലിക്കണം. യമാൽ ഈ ലെവലിൽ എത്തിയതിൽ ഞങ്ങൾക്ക് സന്തോഷമുണ്ട്. പക്ഷേ അവൻ കഠിനാധ്വാനം ചെയ്യണം. അവനും അത് ആഗ്രഹിക്കുന്നുണ്ട്'' ഹാൻസി ഫ്ലിക്ക് പറഞ്ഞു. 

ഈ സീസണിൽ ഹാൻസി ഫ്ലിക്കിന്റെ കീഴിലും മിന്നും പ്രകടനമാണ് സ്പാനിഷ് യുവതാരം നടത്തിക്കൊണ്ടിരിക്കുന്നത്.  ബാഴ്സക്കായി ഇതിനോടകം തന്നെ 22 ഗോളുകളും 33 ആസിസ്റ്റുകളും ആണ് താരം നേടിയത്.  രാജ്യാന്തര തലത്തിൽ സ്പാനിഷ് ടീമിന് വേണ്ടിയും ശ്രദ്ധേയമായ പ്രകടനങ്ങൾ പുറത്തെടുക്കാൻ യമാലിന് സാധിച്ചിട്ടുണ്ട്. സ്പാനിഷ് ടീമിനൊപ്പം 2024 യൂറോ കപ്പ് സ്വന്തമാക്കാനും ലാമിന് സാധിച്ചിട്ടുണ്ട്. 

നിലവിൽ ലാ ലിഗയിൽ ഒന്നാം സ്ഥാനത്താണ് ബാഴ്സലോണ. 33 മത്സരങ്ങളിൽ നിന്നും 24 വിജയവും നാല് സമനിലയും അഞ്ചു തോൽവിയും അടക്കം 76 പോയിന്റ് ആണ് ഹാൻസി ഫ്ലിക്കിന്റെയും സംഘത്തിന്റെയും കൈവശമുള്ളത്. യുവേഫ ചാമ്പ്യൻസ് സെമി ഫൈനലിൽ യോഗ്യത നേടാനും ഹാൻസി ഫ്ലിക്കിനും സംഘത്തിനും സാധിച്ചിട്ടുണ്ട്. ഇറ്റാലിയൻ ക്ലബ് ഇന്റർ മിലാനെതിരെയുള്ള ആദ്യ ലെഗ്ഗിൽ ബാഴ്സ സമനില പിടിച്ചിരുന്നു. 3-3 എന്ന ലൈനിലാണ് മത്സരം അവസാനിച്ചത്.

Barcelona coach Hansi Flick is telling what Lamine Yamal needs to do to reach the level of Lionel Messi and Cristiano Ronaldo