ന്യൂഡല്‍ഹി: കോണ്‍ഗ്രസ് പാര്‍ട്ടിയില്‍ നിന്നും സംഭവിച്ച എല്ലാ തെറ്റുകളുടെയും ഉത്തരവാദിത്വം സന്തോഷത്തോടെ ഏറ്റെടുക്കാന്‍ തയ്യാറെന്ന് ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധി. താന്‍ ഇവിടെ ഇല്ലാതിരുന്ന കാലത്താണ് കോണ്‍ഗ്രസ് പാര്‍ട്ടിയില്‍ നിന്നും സംഭവിച്ച ഭൂരിഭാഗം തെറ്റുകളും ഉണ്ടായതെന്നും രാഹുല്‍ പറഞ്ഞു. 

1984ലെ സിഖ് വിരുദ്ധ പ്രക്ഷോഭങ്ങളിലെ കോണ്‍ഗ്രസ് പങ്കിനെക്കുറിച്ചുള്ള ചോദ്യത്തിന് മറുപടി പറയുകയായിരുന്നു അദ്ദേഹം.

ദിവസങ്ങള്‍ക്കു മുമ്പ് അമേരിക്കയിലെ ബ്രൗണ്‍ സര്‍വകലാശാലയിലെ വാട്‌സണ്‍ ഇന്‍സ്റ്റിറ്റ്യൂട്ട് ഫോര്‍ പബ്ലിക് അഫയേഴ്‌സില്‍ പങ്കെടുക്കവേയാണ് ഇത്തരമൊരു ചോദ്യം രാഹുല്‍ നേരിട്ടത്. സിഖ്കാരനായ യുവാവാണ് രാഹുലിനോട് ചോദ്യം ഉയര്‍ത്തിയത്. 

ഇന്നത്തെ ഇന്ത്യയില്‍ സിഖ് വിശ്വാസിയായ ഒരാള്‍ക്ക് തലപ്പാവ് ധരിക്കാന്‍ അനുവദിക്കുമോ അതല്ലെങ്കില്‍ സിഖുകാരന് കട ധരിക്കാന്‍ അനുമതി ലഭിക്കുമോ ഗുരുദ്വാരയില്‍ പോകാനാകുമോ എന്നതാണ് പ്രധാന വിഷയമെന്ന് രാഹുല്‍ പറഞ്ഞതിനു മറപടിയായാണ് യുവാവ് ചോദ്യം ഉന്നയിച്ചത്.
'നിങ്ങള്‍ സിഖുകാരുമായി അനുരഞ്ജനത്തിന് ശ്രമിച്ചിട്ടില്ല,' സജ്ജന്‍ കുമാര്‍, കെപിഎസ് ഗില്‍ തുടങ്ങിയ വ്യക്തികളെ ചൂണ്ടിക്കാണിച്ചുകൊണ്ട് യുവാവ് പറഞ്ഞു.
സിഖുകാരെ ഭയപ്പെടുത്തുന്ന ഒന്നും തന്നെയില്ലെന്ന് രാഹുല്‍ ഗാന്ധി ഇതിനു മറുപടി നല്‍കി. 'ആളുകള്‍ക്ക് അവരുടെ മതം പ്രകടിപ്പിക്കാന്‍ പ്രയാസമുള്ള ഒരിന്ത്യ നമുക്ക് വേണോ എന്നതായിരുന്നു എന്റെ പ്രസ്താവന? കോണ്‍ഗ്രസ് പാര്‍ട്ടിയുടെ തെറ്റുകളെ സംബന്ധിച്ചിടത്തോളം, അവയില്‍ പലതും ഞാന്‍ അവിടെ ഇല്ലാതിരുന്നപ്പോഴാണ് സംഭവിച്ചത്, പക്ഷേ കോണ്‍ഗ്രസ് പാര്‍ട്ടിയുടെ ചരിത്രത്തില്‍ ഇതുവരെ ചെയ്ത എല്ലാ തെറ്റുകളുടെയും ഉത്തരവാദിത്തം ഏറ്റെടുക്കുന്നതില്‍ ഞാന്‍ സന്തുഷ്ടനാണ്,' അദ്ദേഹം പറഞ്ഞു. 

'80കളില്‍ സംഭവിച്ചത് തെറ്റാണെന്ന് ഞാന്‍ പരസ്യമായി പറഞ്ഞിട്ടുണ്ട്, ഞാന്‍ നിരവധി തവണ സുവര്‍ണ്ണ ക്ഷേത്രത്തില്‍ പോയിട്ടുണ്ട്, ഇന്ത്യയിലെ സിഖ് സമൂഹവുമായി എനിക്ക് വളരെ നല്ല ബന്ധമുണ്ട്,' രാഹുല്‍ ഗാന്ധി പറഞ്ഞു.