ശ്രീനഗര്‍: ജമ്മു കശ്മീരിലെ പൂഞ്ചില്‍ ഭീകരരുടെ ഭൂഗര്‍ഭ ഒളിത്താവളം സുരക്ഷാസേന തകര്‍ത്തു. ഇന്ത്യന്‍ സൈന്യവും ജമ്മു കശ്മീര്‍ പൊലിസും ചേര്‍ന്ന് പൂഞ്ച് സുരന്‍കോട്ടിലെ ഹാരിമരോട്ടെ ഗ്രാമത്തില്‍  നടത്തിയ തെരച്ചിലിലാണ് ഒളിത്താവളം കണ്ടെത്തിയത്. ഒരു ഇംപ്രൊവൈസ്ഡ് എക്സ്പ്ലോസീവ് ഉപകരണം (ഐ.ഇ.ഡി), രണ്ട് റേഡിയോ സെറ്റുകള്‍, മൂന്ന് പുതപ്പുകള്‍ എന്നിവ ഒളിത്താവളത്തില്‍ നിന്ന് കണ്ടെത്തിയിട്ടുണ്ട്. മറ്റൊകു ഭാകരാക്രമണത്തിന് കൂടി പദ്ധതിയുണ്ടെന്ന സാധ്യതാ അറിയിപ്പുകള്‍ വരുന്നതിനിടെയാണ് ഒളിത്താവളവും സ്‌ഫോടക വസ്തുക്കളും കണ്ടെത്തിയിരിക്കുന്നത്. 

 പ്രദേശത്ത് ഭീകരര്‍ക്കായുള്ള തെരച്ചില്‍ ആരംഭിച്ചതായും സൈനിക വൃത്തങ്ങള്‍ അറിയിച്ചു. കഴിഞ്ഞ കുറച്ച് വര്‍ഷങ്ങളായി ജമ്മു കശ്മീരിലെ നിരവധി ഭീകരാക്രമണങ്ങളുടെയും ഏറ്റുമുട്ടലുകളുടെയും കേന്ദ്രമാണ് പൂഞ്ചും രജൗരിയും.

തീവ്രവാദികളുടെ ഒളിത്താവളം തകര്‍ത്തതിന് മണിക്കൂറുകള്‍ക്ക് ശേഷം, പൂഞ്ചിലും മറ്റ് സെക്ടറുകളിലും നിയന്ത്രണ രേഖക്ക് കുറുകെ പാകിസ്ഥാന്‍ സൈന്യം ഇന്നലെ രാത്രി വെടിവെപ്പ് പുനരാരംഭിച്ചതായും റിപ്പോര്‍ട്ടുകളുണ്ട്. യാതൊരു പ്രകോപനവുമില്ലാതെയാണ് ആക്രമണമെന്നും വൃത്തങ്ങള്‍ ചൂണ്ടിക്കാട്ടി. തുടര്‍ച്ചയായ 11-ാം ദിവസമാണ് പാക് സൈന്യം വെടിനിര്‍ത്തല്‍ കരാര്‍ ലംഘിക്കുന്നത്. കുപ് വാര, ബാരാമുല്ല, പൂഞ്ച്, രജൗരി, മെന്ദാര്‍, നൗഷേര, സുന്ദര്‍ബാനി, അഖ്നൂര്‍ തുടങ്ങിയ മേഖലകളിലാണ് പാക് സൈന്യം വെടിവെപ്പ് നടത്തിയത്. ഇന്ത്യ തിരിച്ചടിച്ചിട്ടുണ്ട്. ഏപ്രില്‍ 22 ന് പഹല്‍ഗാമില്‍ 26 പേര്‍ കൊല്ലപ്പെട്ട ഭീകരാക്രമണത്തിന് ശേഷം അതിര്‍ത്തിയില്‍ സംഘര്‍ഷാവസ്ഥ തുടരുകയാണ്.

അതിനിടെ,  ജമ്മു കശ്മീരിലെ ജയിലുകളില്‍ ഭീകരാക്രണം ഉണ്ടായേക്കുമെന്ന് ഇന്റലിജന്‍സ് റിപ്പോര്‍ട്ട് ലഭിച്ചിട്ടുണ്ട്. ഇതേത്തുടര്‍ന്ന് സംസ്ഥാനത്തെ ജയിലുകളില്‍ സുരക്ഷ ശക്തമാക്കിയിരിക്കുകയാണ്. ശ്രീനഗര്‍ സെന്‍ട്രല്‍ ജയില്‍, കോട്ട് ബല്‍വാല്‍ ജയില്‍ തുടങ്ങിയവ ഭീകരര്‍ ലക്ഷ്യമിടുന്നതായാണ് മുന്നറിയിപ്പില്‍ പറയുന്നത്. 

Security forces destroyed a terrorist hideout in Poonch, Jammu and Kashmir, recovering an IED and radio sets amid alerts of another possible attack.