ഇലക്ട്രിക് വാഹനത്തിന്റെ കടന്നുവരവോടെ ഒട്ടുമിക്ക ആളുകളും വീട്ടിലെ പെട്രോള്‍-ഡീസല്‍ വാഹനങ്ങളിലേക്ക് മാറി തുടങ്ങിയിരിക്കുകയാണ്. ഇന്ധനമടിച്ചുള്ള പണം ലാഭിക്കാനായാണ് ശ്രമം. പലവീടുകളിലും ഓഫിസുകളിലും ഇലക്ട്രിക് വാഹനം സ്ഥാനം പിടിച്ചുകഴിഞ്ഞു. രാത്രിയില്‍ സ്‌കൂട്ടര്‍ ചാര്‍ജ് ചെയ്യുന്ന ശീലമാണ് ഭൂരിഭാഗം ആളുകള്‍ക്കുമുള്ളത്. എന്നാല്‍ അത് അത്ര നല്ലതല്ലെന്നാണ് കെഎസ്ഇബി പറയുന്നത്. 

ഇലക്ട്രിക് വാഹനങ്ങളുടെ ചാര്‍ജിങ് സ്റ്റേഷനുകളിലെ വൈദ്യുതി നിരക്കില്‍ മാറ്റം വരുന്നു. ചാര്‍ജിങ് സ്റ്റേഷനുകളില്‍ ഇവാഹനം ചാര്‍ജ് ചെയ്യുന്നതിന് ദിവസം രണ്ടുനിരക്കുകള്‍ പ്രാബല്യത്തിലായി.

ഇലക്ട്രിക് വാഹന ചാര്‍ജിങ് സ്റ്റേഷനുകളുടെ പ്രവര്‍ത്തനം സംബന്ധിച്ച കേന്ദ്ര സര്‍ക്കാരിന്റെ പരിഷ്‌കരിച്ച മാനദണ്ഡം അനുസരിച്ച് രണ്ട് സോണുകളായി തിരിച്ചായിരിക്കും ഇനി മുതല്‍ ബില്ലിങ്. ടൈം ഓഫ് ഡെ (ടിഒഡി) അടിസ്ഥാനമാക്കി രാവിലെ 9 മുതല്‍ വൈകിട്ട് 4 വരെ സോളാര്‍ എനര്‍ജി സമയമായി കണക്കാക്കി ഒരു തുകയും ബാക്കി സമയങ്ങളില്‍ വേറെ തുകയുമായിരിക്കും ഈടാക്കുക.

രാവിലെ 9 മണിമുതല്‍ 4 മണി വരെയുള്ള സമയങ്ങളില്‍ സാധാരണ നിരക്കുകളെക്കാള്‍ 30 ശതമാനം കുറവ് റേറ്റിനും മാറ്റ് സമയങ്ങളില്‍ സാധാരണ റേറ്റിനെക്കാള്‍ 30 ശതമാനം കൂടുതലായും നല്‍കണം. നിലവില്‍ ചാര്‍ജിങ്ങിന് പൊതുവായ നിരക്ക് യൂണിറ്റിന് 7.15 രൂപയാണ് നല്‍കേണ്ടത്. പുതിയ നിര്‍ദേശത്തോടെ 9 മുതല്‍ 4 വരെയുള്ള സമയത്തിന് 5 രൂപയും അതിന് ശേഷം 9.30 രൂപയും ഈടാക്കും.

ഇതിലൂടെ നിലവില്‍ 100 രൂപ ബില്ല് ആവുന്ന ചാര്‍ജിങ് തുക രാവിലെയാണെങ്കില്‍ 70 രൂപയായി കുറയുകയും വൈകീട്ട് നാല് മണിക്ക് ശേഷമാണെങ്കില്‍ 130 രൂപയായി കൂടുകയും ചെയ്യും. പകല്‍ സമയത്ത് പരമാവധി വാഹനങ്ങള്‍ ചാര്‍ജ് ചെയ്യിപ്പിക്കാനാണ് അധികൃതരുടെ ശ്രമം. നിലവില്‍ കെഎസ്ഇബി നല്‍കുന്ന നിരക്ക് ഇളവ് സ്വകാര്യ സ്റ്റേഷനുകള്‍ കൂടി നല്‍കിയാല്‍ പകല്‍ വാഹനങ്ങള്‍ ചാര്‍ജ് ചെയ്യുന്നവരുടെ എണ്ണം വര്‍ധിക്കുകയും രാത്രിയിലെ വൈദ്യുതി ഉപഭോഗം കുറയുകയും ചെയ്യുമെന്നാണ് വിലയിരുത്തുന്നത്.