കോഴിക്കോട്: ആദർശ - വൈജ്ഞാനിക പ്രചാരണവും സേവന-ജീവകാരുണ്യ മേഖലയിലെ വിവിധ പദ്ധതികളുടെ പൂർത്തീകരണവും ലക്ഷ്യമാക്കി എസ്.കെ.എസ്.എസ്.എഫ് സംസ്ഥാന കമ്മിറ്റിയുടെ ജാരിയ പ്രവർത്തന ഫണ്ട് ശേഖരണത്തിന്റെ ആപ്പ് ലോഞ്ചിങ് നാളെ നടക്കും. വൈകിട്ട് മൂന്ന് മണിക്ക് കോട്ടക്കൽ ജൂൺ ആർ അവന്യൂവിൽ സമസ്ത ജനറൽ സെക്രട്ടറി പ്രൊഫ.കെ ആലിക്കുട്ടി മുസ്‌ലിയാർ ലോഞ്ചിങ്  നിർവഹിക്കും.

എസ്.കെ.എസ്.എസ്.എഫ് സംസ്ഥാന പ്രസിഡൻ്റ് പാണക്കാട്  ഹമീദലി ശിഹാബ് തങ്ങൾ അധ്യക്ഷനാകും.
ജില്ലാ ഭാരവാഹികൾ മേഖലാ പ്രസിഡന്റ് - സെക്രട്ടറിമാർ പങ്കെടുക്കും.  ജാരിയയുടെ പ്രചാരണത്തിൻ്റെ ഭാഗമായി സോൺ അലർട്ടുകൾ പൂർത്തിയായി. ഒൻപതിന്  യൂനിറ്റ് അലർട്ടുകൾ നടക്കും. ആപ്പ് മുഖേന മെയ് 10 മുതൽ 31 വരെയാണ് ഫണ്ട് സമാഹരണം നടത്തുന്നത്.

തിരുവനന്തപുരം ആർ.സി.സിയുടെ സമീപവും കോഴിക്കോട് മെഡിക്കൽ കോളജ് പരിസരത്തും  നിർമിക്കുന്ന സഹചാരി സെന്ററുകളുടെയും സംഘടനയുടെ സ്വപ്ന പദ്ധതിയായ ട്രെയിനിങ് ആൻഡ് റിസർച്ച് സെന്ററിന്റെ നിർമാണവും ദേശിയ വിദ്യാഭ്യാസ, സംഘടനാ ശാക്തീകരണ പദ്ധതിയും മറ്റു വിവിധ പ്രവർത്തന പദ്ധതികളും ലക്ഷ്യമിട്ടാണ് ഫണ്ട് ശേഖരിക്കുന്നത്.