യുഎഇ: ഇന്ത്യ-പാകിസ്താൻ സംഘർഷങ്ങൾക്ക് പിന്നാലെ പാക്സിതാൻ സൂപ്പർ ലീഗ് മറ്റൊരു വേദിയിലേക്ക് മാറ്റാനുള്ള തയ്യാറെടുപ്പിലാണ് പാകിസ്താൻ ക്രിക്കറ്റ് ബോർഡ്. പിഎസ്എല്ലിലെ ബാക്കിയുള്ള മത്സരങ്ങൾ യുഎഇയിൽ നടത്താനായിരുന്നു പാകിസ്താൻ ആഗ്രഹിച്ചിരുന്നത്. എന്നാൽ അതിർത്തിയിൽ പ്രശ്നങ്ങൾ നിലനിൽക്കുന്നതിനാൽ പിഎസ്എൽ നടത്താൻ യുഎഇ വിസമ്മതിച്ചുവെന്നാണ് റിപ്പോർട്ടുകൾ. ടൂർണമെന്റിന്റെ ബാക്കി മത്സരങ്ങൾ നടത്താൻ പിസിബിയോട് വിസമ്മതം പറയുമെന്ന് എമിറേറ്റ്സ് ക്രിക്കറ്റ് ബോർഡിനോട് അടുത്ത വൃത്തങ്ങൾ പറയുന്നത്. പിഎസ്എല്ലിലെ ബാക്കിയുള്ള എട്ട് മത്സരങ്ങൾ യുഎഇയിലേക്ക് മാറ്റുകയാണെനന്നായിരുന്നു പിസിബി അറിയിച്ചിരുന്നത്. 

അതേസമയം ഇന്ത്യൻ പ്രീമിയർ ലീഗ് മത്സരങ്ങൾ അനിശ്ചിത കാലത്തേക്ക് ബി.സി.സി.ഐ നിർത്തിവെച്ചിരുന്നു.. ഇരു രാജ്യങ്ങൾ തമ്മിലുള്ള സംഘർഷത്തിന്റെ പശ്ചാത്തലത്തിൽ, ഇന്നലെ ധരംശാലയിൽ നടന്ന പഞ്ചാബ് കിംഗ്സ് - ഡൽഹി ക്യാപിറ്റൽസ് മത്സരം പാതിവഴിയിൽ ഉപേക്ഷിച്ചിരുന്നു. ജമ്മു, പത്താൻകോട്ട് എന്നിവിടങ്ങളിൽ അപായ സൈറണുകൾ മുഴങ്ങിയതിനെ തുടർന്ന് സ്റ്റേഡിയത്തിലെ വൈദ്യുതി വിച്ഛേദിക്കപ്പെട്ടിരുന്നു. തുടർന്ന് സുരക്ഷ മുൻനിർത്തി മത്സരം ഉപേക്ഷിക്കുകയായിരുന്നു.  

ഏപ്രിൽ 22നാണ് രാജ്യത്തെ ഞെട്ടിച്ച ജമ്മു കശ്മീരിലെ ഭീകരാക്രമണം നടന്നത്. അക്രമത്തിൽ 27ലധികം നിരപരാധികളായ വിനോദസഞ്ചാരികൾ ആണ് കൊല്ലപ്പെട്ടത്. ട്രക്കിങിനായി പോയവർക്ക് നേരെയാണ് ആക്രമണം നടന്നത്. 2019ന് ശേഷം ജമ്മു കശ്മീരിൽ നടക്കുന്ന ഏറ്റവും വലിയ ഭീകരാക്രമണമാണ് പഹൽഗാമിൽ നടന്നത്. 

Pakistan suffers setback in cricket as UAE also gives up PSL in crisis