കാക്കനാട് : തൃക്കാക്കര നഗരസഭയുടെ വരുമാനത്തിൽ നിന്ന് 7.50 കോടി രൂപ അപ്രത്യക്ഷമായതായി ജില്ലാ ഓഡിറ്റ് വകുപ്പിന്റെ 2023-24 വർഷത്തെ റിപ്പോർട്ട്. 361 ചെക്കുകളിലൂടെ ലഭിച്ച 7,50,62,050 രൂപ നഗരസഭയുടെ ബാങ്ക് അക്കൗണ്ടിൽ എത്തിയിട്ടില്ല. നികുതിയും ഫീസ് ഉൾപ്പെടെയുള്ള ഈ തുക എവിടേക്ക് പോയെന്നതിന് ഉദ്യോഗസ്ഥർക്ക് വിശദീകരണമില്ല. 

2023-24 സാമ്പത്തിക വർഷത്തിൽ മാത്രം 137 ചെക്കുകൾ വഴി ലഭിച്ച തുക അക്കൗണ്ടിൽ രേഖപ്പെടുത്തിയിട്ടില്ല. വീടുകളുടെയും സ്ഥാപനങ്ങളുടെയും നികുതി ചെക്കായി സ്വീകരിച്ച് രസീത് നൽകിയെങ്കിലും, പണം ബാങ്കിൽ എത്തിയില്ല. 2021 മുതൽ സൗത്ത് ഇന്ത്യൻ ബാങ്കിൽ നൽകിയ നിരവധി ചെക്കുകളും പണമായി ക്രെഡിറ്റ് ചെയ്യപ്പെട്ടിട്ടില്ല. 

നഗരസഭാ അധികൃതർ ഈ ഗുരുതര വീഴ്ചയിൽ ഗൗരവമായ അന്വേഷണം നടത്തിയിട്ടില്ലെന്നും റിപ്പോർട്ട് വിമർശിക്കുന്നു. വാടക പിരിവിന്റെ രേഖകൾ അവ്യക്തമാണ്, നഗരസഭയുടെ ഉടമസ്ഥതയിലുള്ള കടമുറികളുടെ എണ്ണമോ വാടകയ്ക്ക് നൽകിയവയുടെ വിവരമോ ഉദ്യോഗസ്ഥർക്ക് അറിയില്ല. മാലിന്യനീക്കത്തിന്റെ ചെലവ് രേഖകളും ക്രമീകരിച്ചിട്ടില്ല. 

മുൻ വർഷങ്ങളിൽ നിർദേശിച്ച നടപടികൾ പോലും നടപ്പാക്കാതെ, ലൈസൻസ് ഇല്ലാതെ പ്രവർത്തിക്കുന്ന സ്ഥാപനങ്ങൾ ഇപ്പോഴും നഗരസഭാ പരിധിയിൽ തുടരുന്നു. ഈ ക്രമക്കേടുകൾ വിശദമായി അന്വേഷിക്കണമെന്ന് ഓഡിറ്റ് റിപ്പോർട്ട് ആവശ്യപ്പെടുന്നു