മക്ക: കേരളത്തിൽ നിന്നുള്ള രണ്ടാമത്തെ ഹജ്ജ് വിമാനവും സഊദിയിൽ എത്തി. ജിദ്ദ എയർപോർട്ട് വഴി എത്തിയ ഹജ്ജ് സംഘത്തിന് വിഖായ വളണ്ടിയർമാർ ഊഷ്‌മള സ്വീകരണം നൽകി. മലയാളികളുമായി രണ്ടാമത്തെ വിമാനം ശനിയാഴ്ച വൈകീട്ട് 4.30ന് കോഴിക്കോട്ടു നിന്ന് പുറപ്പെട്ട് സഊദി സമയം രാത്രി എട്ടിനാണ് ജിദ്ദയിലെത്തിയത്. 87 പുരുഷന്മാരും 86 സ്ത്രീകളുമുൾപ്പെടെ 173 തീർഥാടകരാണ് ഈ വിമാനത്തിൽ ഉണ്ടായിരുന്നത്.

സുന്നി യുവജന സംഘം സംസ്ഥാന വർക്കിങ് സിക്രട്ടറി അബ്ദുൽ ഹമീദ് ഫൈസി അമ്പലക്കടവ് ഉൾപ്പെടെയുള്ള ഹജ്ജ് സംഘമാണ് ജിദ്ദയിൽ രാത്രി വിമാനമിറങ്ങിയത്. ഹജ്ജ് ടെർമിനലിൽ നിന്ന് പുറത്തിറങ്ങിയ ഹമീദ് ഫൈസി ഉൾപ്പെടെയുള്ള ഹാജിമാരെ വിഖായ ഊഷ്‌മളമായി സ്വീകരിച്ചു. 

എസ് ഐ സി നാഷണൽ വൈസ് പ്രസിഡന്റ് അബൂബക്കർ ദാരിമി ആലമ്പാടി, എസ്‌ഐസി ജിദ്ദ സെൻട്രൽ കമ്മിറ്റി പ്രസിഡന്റ് സയ്യിദ് സൈനുൽ അബിദീൻ തങ്ങൾ, ജനറൽ സിക്രട്ടറി സൽമാനുൽ ഫാരിസ് ദാരിമി, വിഖായ നാഷണൽ കൺവീനർ ജാബിർ നാദാപുരം, കോർഡിനേറ്റർ ദിൽഷാദ് തലാപ്പിൽ, വിഖായ നാഷണൽ സമിതി മെമ്പർ അസ്‌കർ മുല്ലപ്പള്ളി, വിഖായ ജിദ്ദ അംഗങ്ങളായ അബ്ദുൽ മുസ്വവ്വിർ, സലീം മണ്ണാർക്കാട്, സൈനുദ്ധീൻ ഫൈസി, ഷബീർ, ഇർഷാദ് മേലാറ്റൂർ അസ്‌കർ, ഫസലുദ്ധീൻ, നൗഷാദ് അൻവരി, മുഹ്‌യുദ്ധീൻ മുഹമ്മദ്‌ അരിമ്പ്ര, ഫാദി മുഹ്‌യുദ്ധീൻ, മുഹമ്മദ്‌ റയ്യാൻ തുടങ്ങിയവ നേതൃത്വം നൽകി.