ഇന്ത്യൻ താരം വിരാട് കോഹ്‌ലി ടെസ്റ്റ് ക്രിക്കറ്റിൽ നിന്നും വിരമിക്കുന്നുവെന്ന റിപ്പോർട്ടുകൾ നിലനിൽക്കുന്നുണ്ട്. കോഹ്‌ലി തന്റെ വിരമിക്കൽ തീരുമാനം ബിസിസിഐയെ അറിയിച്ചിട്ടുണ്ട്. എന്നാൽ താരത്തിന്റെ വിരമിക്കൽ ഇതിനോടകം തന്നെ ഔദ്യോഗികമായിട്ടില്ല. ഇപ്പോൾ വിരാടിന്റെ ഈ വിരമിക്കൽ തീരുമാനത്തെക്കുറിച്ച് സംസാരിക്കുകയാണ്. വെസ്റ്റ് ഇൻഡീസ് ഇതിഹാസം ബ്രയാൻ ലാറ. കോഹ്‌ലിയെ ടെസ്റ്റ് ക്രിക്കറ്റിന് ആവശ്യമുണ്ടെന്നാണ് ലാറ ഇൻസ്റ്റാഗ്രാമിൽ കുറിച്ചത്.  

''ടെസ്റ്റ് ക്രിക്കറ്റിന് വിരാടിനെ ആവശ്യമുണ്ട്!! അദ്ദേഹത്തെ അത് ബോധ്യപ്പെടുത്താൻ പോകുന്നു. അദ്ദേഹം ടെസ്റ്റ് ക്രിക്കറ്റിൽ നിന്ന് വിരമിക്കാൻ പോകുന്നില്ല. വിരാട് കോഹ്‌ലി തന്റെ ടെസ്റ്റ് കരിയറിൽ ശേഷിക്കുന്ന കാലയളവിൽ 60ന് മുകളിൽ ആവറേജ് നിലനിർത്തും" ലാറ ഇൻസ്റ്റാഗ്രാമിൽ കുറിച്ചു.

ടെസ്റ്റ് ക്രിക്കറ്റിൽ നിന്നും ഇന്ത്യൻ ക്യാപ്റ്റൻ രോഹിത് ശർമ്മ വിരമിക്കൽ പ്രഖ്യാപിച്ചിരുന്നു . സമീപകാലങ്ങളിൽ ഇന്ത്യൻ ടീമിനൊപ്പം ടെസ്റ്റ് ക്രിക്കറ്റിൽ അത്ര മികച്ച  പ്രകടനങ്ങൾ പുറത്തെടുക്കാൻ രോഹിത്തിന് സാധിച്ചിരുന്നില്ല. ജൂണിലും ഓഗസ്റ്റിലുമായി നടക്കാനിരിക്കുന്ന ഇംഗ്ലണ്ടിനെതിരെയുള്ള ടെസ്റ്റ് പരമ്പരക്ക് മുന്നോടിയാണ് രോഹിത്തിന്റെ വിരമിക്കൽ പ്രഖ്യാപനം. രോഹിത്തിന് പകരക്കാരനായി ഇന്ത്യൻ ടെസ്റ്റ് ടീമിനെ നയിക്കുക ആരാണെന്നുള്ള ചോദ്യങ്ങളാണ് ഇപ്പോൾ ഉയർന്നു നിൽക്കുന്നത്. ജസ്പ്രീത് ബുംറ, ശുഭ്മൻ ഗിൽ എന്നിവരുടെ പേരുകളാണ് അടുത്ത ക്യാപ്റ്റനാവാൻ സാധ്യതയിൽ മുൻപന്തിയിൽ ഉള്ളത്. 

breian lara talks about the retirement of virat kohli test cricket