ഇന്ത്യൻ മുൻനിര പേസർ മുഹമ്മദ് ഷമി തന്റെ വിരമിക്കുന്നതിനെക്കുറിച്ചുള്ള വാർത്തകൾ തള്ളി ശക്തമായി പ്രതികരിച്ചു. തന്റെ വിരമിക്കല്‍ വാര്‍ത്ത പുറത്തുവിട്ട മാധ്യമങ്ങളെയാണ് താരം വിമർശിച്ചത്. ഇത്തരത്തിലുള്ള വിവരങ്ങൾ തന്റെ ഭാവിയെ ബാധിക്കുന്നതായും ഇനിയെങ്കിലും തന്നെക്കുറിച്ച് സത്യസന്ധമായി എഴുതണമെന്നും ഷമി ആവശ്യപ്പെട്ടു.

മാധ്യമ റിപ്പോർട്ടിന്റെ സ്ക്രീൻഷോട്ട് ഇൻസ്റ്റാഗ്രാമിൽ പങ്കുവെച്ച ഷമി ഹിന്ദിയിലാണ് തന്റെ  പ്രതികരണം രേഖപ്പെടുത്തിയത്:

"നന്നായിട്ടുണ്ട് മഹാരാജാവേ, നിങ്ങളുടെ ജോലി നോക്കാൻ ശ്രദ്ധിക്കുക. എന്നെ മാത്രം ലക്ഷ്യമാക്കി എഴുതുന്നത് നിർത്തൂ. നിങ്ങളെ പോലെയുള്ളവരാണ് എന്റെ ഭാവിയെ നശിപ്പിച്ചത്. ഒരിക്കലെങ്കിലും നല്ലതെന്തെങ്കിലും എഴുതാൻ ശ്രമിക്കൂ. ഇന്നത്തെ ഏറ്റവും മോശം കഥയാണ് ഇത്. ദയവായി ക്ഷമിക്കൂ." — എന്നാണ് ഷമിയുടെ വാക്കുകൾ.

മെയ് 7ന് രോഹിത് ശർമയും, മെയ് 12ന് വിരാട് കോലിയും ടെസ്റ്റ് ക്രിക്കറ്റിൽ നിന്ന് വിരമിക്കുമെന്ന് പ്രഖ്യാപിച്ച പശ്ചാത്തലത്തിലാണ്, ഷമിയെയും മറ്റ് മുതിർന്ന താരങ്ങളെയും കേന്ദ്രികരിച്ചുള്ള "വിരമിക്കല്‍ ചർച്ചകൾ" സമൂഹമാധ്യമങ്ങളിൽ പരക്കാൻ തുടങ്ങിയത്.

ടൈംസ് ഓഫ് ഇന്ത്യ ഉൾപ്പെടെയുള്ള ചില ദേശീയ മാധ്യമങ്ങൾ റിപ്പോർട്ട് ചെയ്തതു പോലെ, ഷമി നിലവിൽ ടീമിൽ ഇടം നേടാനുള്ള മികച്ച നിലയിലല്ല എന്നും, ഐപിഎല്ലിൽ വ്യക്തമായ പ്രകടനം ഇല്ലാതിരുന്നുവെന്നുമാണ് ബിസിസിഐയിലെ ചില ആളുകളുടെ നിലപാട്.

ഈ സീസണിൽ ഷമി 9 മത്സരങ്ങളിൽ നിന്ന് വെറും 6 വിക്കറ്റ് മാത്രമാണ് നേടിയിരിക്കുന്നത്. ശരാശരി 56 ആണ്, ഇക്കോണമിയും ഏറെ. കരിയറിൽ മികച്ച തിരിച്ചുവരവായി ചാമ്പ്യൻസ് ട്രോഫി മാറിയെങ്കിലും, ഐപിഎൽ സീസണിൽ താരത്തിന്റെ പ്രകടനം നിരാശപ്പെടുത്തുന്നതായിരുന്നു.

അതേസമയം, ടീമിൽ പൂർണ്ണമായി നിന്ന് ഫോമിനൊപ്പം തിരിച്ചുവരാൻ ശ്രമിക്കുന്നതിനിടയിലാണ് ഷമി ഇത്തരം അഭ്യൂഹങ്ങൾക്ക് കടുത്ത മറുപടി നൽകുന്നത്.