ഗസ്സ സിറ്റി: ഇസ്‌റാഈലിനെ അവഗണിച്ച് ത്രിരാഷ്ട്ര ഗൾഫ് സന്ദർശനം പൂർത്തിയാക്കി യു.എസ് പ്രസിഡന്റ് ഡൊണാൾഡ് ട്രംപ് മടങ്ങിയ ഇന്നലെയും ഗസ്സയിൽ നരഹത്യ തുടർന്ന് ഇസ്‌റാഈൽ. 24 മണിക്കൂറിനിടെ ബോംബാക്രമണത്തിലൂടെ നൂറിലേറെ ഫലസ്തീനികളെയാണ് നിർദയം കൊലപ്പെടുത്തിയത്. തകർന്ന കെട്ടിടാവശിഷ്ടങ്ങൾക്കടിയിൽ ജീവനോടെയും അല്ലാതെയും നിരവധി പേരുണ്ടെന്ന് അൽജസീറ റിപ്പോർട്ട് ചെയ്തു.

ഇതോടെ ഗസ്സയിൽ ഇസ്‌റാഈൽ നടത്തുന്ന വംശഹത്യയിൽ കൊല്ലപ്പെട്ടവരുടെ എണ്ണം 53,119 ആയി. 1,29,919 പേർക്ക് സാരമായ പരുക്കേറ്റതായും ഗസ്സ ആരോഗ്യമന്ത്രാലയം അറിയിച്ചു. അതേസമയം കൊല്ലപ്പെട്ടവരുടെ എണ്ണം 61,700 കടന്നതായി സർക്കാർ മാധ്യമ ഓഫിസ് പറയുന്നു. തകർക്കപ്പെട്ട കെട്ടിടാവശിഷ്ടങ്ങൾക്കടിയിൽ പെട്ട് കാണാതായവരെ കൂടി ഉൾപ്പെടുത്തിയുള്ളതാണ് ഈ കണക്ക്.

അതേസമയം, ഇസ്‌റാഈൽ ഗസ്സയിൽ ആക്രമണം ശക്തിപ്പെടുത്തിയ സാഹചര്യത്തിൽ ആയിരക്കണക്കിനു ഫലസ്തീനികൾ വടക്കൻ ഗസ്സയിലെ വീടുകൾ വിട്ട് പലായനം തുടങ്ങി. ആളുകൾ ഒഴിഞ്ഞുപോകണമെന്ന് ആവശ്യപ്പെട്ട് ജബലിയ അഭയാർഥി ക്യാംപിൽ ഇസ്‌റാഈൽ സേന നോട്ടിസുകൾ വർഷിച്ചതായി റിപ്പോർട്ടുണ്ട്. അധിനിവിഷ്ട വെസ്റ്റ് ബാങ്കിലും അഭയാർഥി ക്യാംപുകൾ തകർത്ത് ആക്രമണം തുടരുകയാണ്. 

അപരിഷ്‌കൃതമായ കൂട്ടക്കൊല നടത്തുന്ന ഇസ്‌റാഈലിനെതിരേ നടപടി സ്വീകരിക്കണമെന്ന് ഹമാസ് അന്താരാഷ്ട്ര സമൂഹത്തോട് ആവശ്യപ്പെട്ടു. ഇസ്‌റാഈൽ അനുമതി നൽകിയാൽ ഗസ്സയിലേക്ക് കുതിക്കാൻ ഭക്ഷ്യവസ്തുക്കളുമായി ട്രക്കുകൾ അതിർത്തിയിൽ കാത്തിരിക്കുകയാണെന്ന് യു.എൻ ഏജൻസി അറിയിച്ചു. നാലുമാസത്തേക്കെങ്കിലും ഗസ്സയിലെ ജനങ്ങൾക്ക് കഴിക്കാനാവശ്യമായ ഭക്ഷ്യവസ്തുക്കളാണ് ഇവിടെ കെട്ടിക്കിടക്കുന്നത്.  അതിനിടെ യമനിലെ ഹുദൈദ തുറമുഖത്ത് ഇസ്‌റാഈൽ ആക്രമണം നടത്തിയതായി ഹൂത്തി സേന അറിയിച്ചു.

Israels offensive against Gaza continues death toll exceeds 53000