ദുബൈ: ദുബൈയിലെ അല്‍ ബര്‍ഷ ഒന്നിലെ കെട്ടിടത്തില്‍ വീണ്ടും അഗ്‌നിബാധ. ബഹുനില റസിഡന്‍ഷ്യല്‍ കെട്ടിടത്തിന്റെ താഴത്തെ നിലയില്‍ പ്രവര്‍ത്തിക്കുന്ന റസ്റ്റോറന്റിലാണ് ആദ്യം തീപിടിത്തമുണ്ടായത്. ഉടന്‍തന്നെ സ്ഥലത്തെത്തിയ സിവില്‍ ഡിഫന്‍സ് സേന തീ നിയന്ത്രണവിധേയമാക്കിയതിനാല്‍ ആളപായം റിപ്പോര്‍ട്ട്‌ചെയ്തില്ല.

ഇന്നലെ ഉച്ചയ്ക്കാണ് സംഭവം. സംഭവത്തെക്കുറിച്ച് ദൃക്‌സാക്ഷികള്‍ മാധ്യമങ്ങളോട് അനുഭവം പങ്കുവയ്ക്കുകയുംചെയ്തു. ഞാന്‍ ഉറങ്ങുകയായിരുന്നു, എന്റെ ഫ്‌ലാറ്റ് മേറ്റ് എന്നെ ഉണര്‍ത്തി കെട്ടിടത്തില്‍ തീപിടുത്തമുണ്ടെന്ന് പറഞ്ഞു.  എഴുന്നേറ്റപ്പോള്‍ ആളുകള്‍ പുറത്തേക്ക് ഓടുന്നതാണ് കണ്ടത്. പുറത്തേക്കിറങ്ങിയപ്പോള്‍ ദുബൈ സിവില്‍ ഡിഫന്‍സ് ഉദ്യോഗസ്ഥര്‍ തീ അണയ്ക്കാന്‍ ശ്രമിക്കുന്നുണ്ടായിരുന്നു. ജനക്കൂട്ടത്തെ നിയന്ത്രിക്കാന്‍ പോലീസും എത്തിയിരുന്നു - കെട്ടിടത്തിലെ താമസക്കാരില്‍ ഒരാള്‍ പറഞ്ഞു. 

ഈ മാസം 13ന് അല്‍ ബര്‍ഷ 1ലെ മാള്‍ ഓഫ് ദി എമിറേറ്റ്‌സിന് പിന്‍വശത്തായി സ്ഥിതി ചെയ്യുന്ന മറ്റൊരു കെട്ടിടത്തിലും സമാനമായ അഗ്‌നിബാധയുണ്ടായിരുന്നു. പാചകവാതക പൈപ്പ് ലൈനില്‍ ചോര്‍ച്ചയെ തുടര്‍ന്നായിരുന്നു വന്‍ തീപിടിത്തം ഉണ്ടായത്. 13 നില കെട്ടിടത്തിന്റെ താഴത്തെ നിലയില്‍ പ്രവര്‍ത്തിച്ചിരുന്ന തലശ്ശേരി സ്വദേശിയുടെ ഉടമസ്ഥതയിലുള്ള റസ്റ്റോറന്റ് കത്തി നശിക്കുകയും രണ്ട് മലയാളികള്‍ക്ക് പരുക്കേല്‍ക്കുകയും ചെയ്തിരുന്നു. ഈ സ്ഥലത്ത് നിന്ന് ഏകദേശം 500 മീറ്റര്‍ അകലെയാണ് ഇന്നലത്തെ സംഭവം. 

 Fire breaks out at restaurant in Dubai Barsha residential building