ലണ്ടൻ: മലയാളി താരം കെപി രാഹുൽ ഇംഗ്ലീഷ് പ്രീമിയർ ലീഗ് ക്ലബായ വെസ്റ്റ് ഹാം യൂണൈറ്റഡിനായി കളിക്കും. ടിഎൻടി സെവൻസ് ഫുട്ബോളിലാണ് താരം വെസ്റ്റ് ഹാമിന്റെ ജേഴ്സി അണിയുക. വെസ്റ്റ് ഹാം തങ്ങളുടെ സോഷ്യൽ മീഡിയ അക്കൗണ്ടിലൂടെയായാണ് ഇക്കാര്യം പുറത്തുവിട്ടത്.

അമേരിക്കയിലെ നോർത്ത് കരോലിനയിലെ കാരിയിലാണ് സെവൻസ് ചാമ്പ്യൻഷിപ്പ് ടൂർണമെന്റ് നടക്കുന്നത്. ടൂർണമെന്റിൽ ഓപ്പൺ ട്രൈ ഔട്ടുകളിൽ നിന്നും തെരഞ്ഞെടുക്കപ്പെടുന്ന താരങ്ങളും ക്ഷണിക്കപ്പെട്ട താരങ്ങളും ആണ് കളിക്കുന്നത്. ജൂൺ നാല് മുതൽ ഒമ്പത് വരെയാണ് ടൂർണമെന്റ് നടക്കുന്നത്. ടൂർണമെന്റിൽ ഒരു ടീം സൈൻ ചെയ്യുന്ന ആദ്യ ഇന്ത്യൻ താരം കൂടിയാണ് രാഹുൽ. 

ബേൺമൗത്ത്, വിയ്യാറയൽ, ബൊറൂസിയ ഡോർട്മുണ്ട്, അത്ലറ്റികോ മാഡ്രിഡ് എന്നീ ടീമുകളാണ് ടൂർണമെന്റിൽ കളിക്കുന്ന മറ്റ് വലിയ ക്ലബ്ബുകൾ. 48 ടീമുകളാണ് കിരീടത്തിനായി മാറ്റുരക്കുന്നത്. ഈ ടീമുകളെ 12 ഗ്രൂപ്പുകളായാണ് തിരിച്ചിരിക്കുന്നത്.

തൃശൂർ സ്വദേശിയായ കെപി രാഹുൽ ആറ് സീസണുകളിൽ കേരള ബ്ലാസ്റ്റേഴ്സിന് വേണ്ടി ബൂട്ട് കെട്ടിയിട്ടുണ്ട്. 2019 മുതൽ കേരളത്തിന്റെ താരമായ രാഹുൽ ബ്ലാസ്റ്റേഴ്സിനായി 81 മത്സരങ്ങളിൽ നിന്നും എട്ട് ഗോളുകളാണ് നേടിയത്. കഴിഞ്ഞ ഐഎസ്എല്ലിൽ താരം ഒഡീഷ എഫ്‌സിക്ക് വേണ്ടിയാണ് കളിച്ചത്. താരം അണ്ടർ 17 ലോകകപ്പിൽ ഇന്ത്യക്കായും കളിച്ചിട്ടുണ്ട്. 

Kerala Player KP Rahul will play for English Premier League club West Ham United