ന്യൂഡൽഹി: ഛത്തിസ്ഗഢിൽ മനുഷ്യക്കടത്തും നിർബന്ധിത മതപരിവർത്തനവും ആരോപിച്ച് അറസ്റ്റ് ചെയ്ത മലയാളി കന്യാസ്ത്രീകളുടെ ജാമ്യാപേക്ഷ കോടതി തള്ളി. അസീസി സിസ്റ്റേഴ്‌സ് ഓഫ് മേരി ഇമ്മാക്യുലേറ്റ് (ഗ്രീൻ ഗാർഡൻസ്) സന്ന്യാസസഭയിലെ സിസ്റ്റർമാരായ പ്രീതി മേരി, വന്ദന ഫ്രാൻസിസ് എന്നിവരുടെ ജാമ്യാപേക്ഷയാണ് തള്ളിയത്. മജിസ്ട്രേറ്റ് കോടതിയാണ് ജാമ്യാപേക്ഷ തള്ളിയത്. ഇതോടെ കന്യാസ്ത്രീകൾ ദുർ​ഗിലെ സെൻട്രൽ ജയിലിൽ തന്നെ തുടരും. 

എന്നാൽ ജാമ്യാപേക്ഷയ്ക്കുള്ള ശ്രമങ്ങൾ തുടരുമെന്ന് കേസിൽ പ്രതികളായിട്ടുള്ള കന്യാസ്ത്രീമാരുടെ അഭിഭാഷകർ അറിയിച്ചു. സിസ്റ്റർ പ്രീതി മേരിയാണ് കേസിൽ ഒന്നാം പ്രതി. സിസ്റ്റർ വന്ദന ഫ്രാൻസിസ് രണ്ടാം പ്രതിയുമാണ്. ഗുരുതര വകുപ്പുകളാണ് ഇവർക്കെതിരെ ചുമത്തിയിട്ടുള്ളത്. മനുഷ്യക്കടത്തും, നിർബന്ധിത മത പരിവർത്തനവും ഉൾപ്പെടെ വരുന്ന ഛത്തീസ്ഗഡ് മത സ്വാതന്ത്ര്യ നിയമത്തിലെ നാല്, ഭാരതീയ ന്യായ സംഹിത 143 എന്നീ വകുപ്പുകളാണ് ചുമത്തിയിട്ടുള്ളത്. ഈ വകുപ്പുകൾ പ്രകാരം 10 വർഷം വരെ തടവുശിക്ഷ ലഭിക്കാം.

കഴിഞ്ഞ വെള്ളിയാഴ്ചയാണ് സിറോ മലബാർ സഭയുടെ കീഴിൽ ചേർത്തല ആസ്ഥാനമായ അസീസി സിസ്റ്റേഴ്‌സ് ഓഫ് മേരി ഇമ്മാക്യുലേറ്റ് (ഗ്രീൻ ഗാർഡൻസ്) സന്ന്യാസ സഭയ്ക്ക് കീഴിലെ സ്ഥാപനങ്ങളിലേക്ക് ജോലിക്കായി മൂന്ന് പെൺകുട്ടികളെ കൂട്ടിക്കൊണ്ടുപോകാൻ വന്ന കന്യാസ്ത്രീകൾ പിടിയിലാകുന്നത്. ഛത്തീസ്ഗഡിലെ ദുർഗിൽ വെച്ചാണ്  മലയാളികളായ ഇവരെ അറസ്റ്റ് ചെയ്തത്. ബജ്റംഗ്ദൾ പ്രവർത്തകർ ദുർഗ് റെയിൽവേ സ്റ്റേഷനിൽ വെച്ച് ഇവരെ തടഞ്ഞ് പൊലിസിനെ അറിയിക്കുകയായിരുന്നു. കേസിൽ പെൺകുട്ടികളുടെ ബന്ധു സുഖ്മൻ മണ്ടാവിയെ മൂന്നാം പ്രതിയാക്കിയാണ് എഫ്.ഐ.ആർ ഇട്ടിട്ടുള്ളത്.

ALSO READ: 'എന്തിനാ പ്രതിഷേധിക്കുന്നേ, അടുത്ത പെരുന്നാളിനു ഡൽഹിയിൽ ഒന്നുകൂടെ വിളിച്ച്‌ ആദരിച്ചാൽ പോരേ?' - സഭകളുടെ ബിജെപി അടുപ്പത്തെ പരിഹസിച്ച്  യൂഹാനോൻ മാർ മിലിത്തിയോസ്

ഇതിനിടെ, ഛത്തീസ്ഗഢിൽ ക്രിസ്ത്യൻ മിഷനറി പ്രവർത്തകർക്ക് എതിരായ അക്രമം നിത്യ സംഭവമെന്ന് വെളിപ്പെടുത്തുന്ന കൂടുതൽ ദൃശ്യങ്ങൾ പുറത്തായി. മിഷനറി പ്രവർത്തകരെ പൊലിസിന്റെ മുന്നിലിട്ട്  തീവ്ര ഹിന്ദു സംഘടന നേതാവ് ജ്യോതി ശർമ മർദിക്കുന്ന ദൃശ്യങ്ങൾ ഉൾപ്പെടെയാണ് പുറത്തുവന്നത്. കേസിൽ പ്രതിയായ ജ്യോതി ശർമ ഒളിവിൽ ആണെന്നാണ് പൊലിസ് കോടതിയെ അറിയിച്ചത് എന്നും ആരോപണമുയരുന്നുണ്ട്. മലയാളി കന്യാസ്ത്രീകളെ അറസ്റ്റ് ചെയ്തത് ബജ്റംഗ്ദൾ പ്രവർത്തകരുടെ സമ്മർദത്തെ തുടർന്നാണെന്ന് ആരോപണമുണ്ട്. 

അതേസമയം, ഛത്തിസ്ഗഡില്‍ മനുഷ്യക്കടത്തും നിര്‍ബന്ധിത മതപരിവര്‍ത്തനവും ആരോപിച്ച് മലയാളി കന്യാസ്ത്രീകളെ അറസ്റ്റ്‌ചെയ്തതിന് പിന്നാലെ ഉത്തരേന്ത്യയില്‍ യാത്ര ചെയ്യുമ്പോള്‍ സഭാവസ്ത്രം ഉപേക്ഷിക്കാന്‍ വൈദികര്‍ക്കും കന്യസ്ത്രീകള്‍ക്കും നിര്‍ദേശം. പ്രത്യേകിച്ച് ഉത്തരേന്ത്യന്‍ നഗരങ്ങളില്‍ പൊതുസ്ഥലങ്ങളിലൂടെ യാത്രചെയ്യുമ്പോള്‍ വൈദികരും കന്യാസ്ത്രീകളും സാധാരണ വേഷം ധരിക്കണമെന്ന നിര്‍ദേശം ആഭ്യന്തരവൃത്തങ്ങളില്‍ അനൗദ്യോഗികമായാണ് നല്‍കിയത്. ഉത്തരേന്ത്യയില്‍ പ്രവര്‍ത്തിക്കുന്ന മുതിര്‍ന്ന വൈദികര്‍ ആണ് വൈദികരുടെയും കന്യാസ്ത്രീകളുടെയും സോഷ്യല്‍മീഡിയാ ഗ്രൂപ്പുകളില്‍ ഇത്തരം നിര്‍ദേശം നല്‍കിയത്. 

ALSO READ: ഉത്തരേന്ത്യയില്‍ യാത്ര ചെയ്യുമ്പോള്‍ സഭാവസ്ത്രം ഉപേക്ഷിക്കാന്‍ നിര്‍ദേശം, നടപടി മലയാളി കന്യാസ്ത്രീകളുടെ അറസ്റ്റിന് പിന്നാലെ; മതസ്വാതന്ത്ര്യം അപകടത്തിലെന്ന് കെ.സി.ബി.സി

ഇതോടൊപ്പം സഭയ്ക്ക് കീഴിലുള്ള സ്ഥാപനങ്ങളിലേക്ക് ജോലിക്കായി വരുന്ന തൊഴിലാളുടെ കൂടെ അവരുടെ മാതാപിതാക്കളെയും കൂട്ടാനും ആവശ്യമായ രേഖകള്‍ കരുതാനും നിര്‍ദേശമുണ്ട്. ഇത്തരക്കാര്‍ക്കുള്ള യാത്രാ, ഭക്ഷണചെലവുകള്‍ അതതു സ്ഥാപനം തന്നെ വഹിക്കണമെന്നും നിര്‍ദേശങ്ങളില്‍ പറയുന്നു. ജാഗ്രതാനിര്‍ദേശം എന്ന നിലയ്ക്കാണ് ഇത്തരത്തില്‍ അനൗദ്യോഗികമായി സന്ദേശം നല്‍കിയതെന്ന് അമൃത്സറിലെ ഫാ. സുരേഷ് മാത്യു സ്ഥിരീകരിച്ചു.