ന്യൂഡല്‍ഹി: നാഷനല്‍ ഹെറാള്‍ഡ് കേസില്‍ കര്‍ണാടക ഉപമുഖ്യമന്ത്രി ഡി.കെ ശിവകുമാറിനെയും തെലങ്കാന മുഖ്യമന്ത്രി രേവന്ത് റെഡ്ഡിയെയും ലക്ഷ്യമിട്ട് കേന്ദ്ര ഏജന്‍സിയായ ഇ.ഡി.  ഡി.കെയും രേവന്ത് റെഡ്ഡിയും യങ് ഇന്ത്യാ ലിമിറ്റഡിന് പണം നല്‍കിയെന്ന് ഇ.ഡി ആരോപിച്ചു. ഡി.കെ ശിവകുമാര്‍ 25 ലക്ഷം നേരിട്ടും രണ്ടുകോടി ട്രസ്റ്റ് വഴിയും നല്‍കിയപ്പോള്‍ രേവന്ത് റെഡ്ഡി വഴി വിവിധ ആളുകളിലൂടെ 80 ലക്ഷം രൂപ യങ് ഇന്ത്യന്‍ ലിമിറ്റഡില്‍ എത്തിയെന്നും ഇ.ഡി ആരോപിക്കുന്നു.
കേസില്‍ കഴിഞ്ഞമാസം ഒമ്പതിനാണ് ഇ.ഡി കുറ്റപത്രം സമര്‍പ്പിച്ചത്. എന്നാല്‍ ഡല്‍ഹിയിലെ പ്രത്യേക കോടതി ഇതുവരെ കേസ് പരിഗണനയ്‌ക്കെടുത്തില്ല. ഹെറാള്‍ഡ് കേസ് പരിഗണിക്കണോ വേണ്ടയോ എന്നതുസംബന്ധിച്ച വാദമാകും പ്രത്യേക ജഡ്ജി വിശാല്‍ ഗോഗ്‌നെ മുമ്പാകെ നടക്കുക.

ജവഹര്‍ലാല്‍ നെഹ്‌റു 1937ല്‍ സ്ഥാപിച്ച നാഷനല്‍ ഹെറാള്‍ഡ് പത്രത്തിന്റെ ആദ്യ പ്രസാധകരായ അസോഷ്യേറ്റ് ജേണല്‍ ലിമിറ്റഡിന്റെ (എ.ജെ.എല്‍) സ്വത്ത് യങ് ഇന്ത്യ എന്ന പുതിയ സ്ഥാപനം രൂപീകരിച്ച് തട്ടിയെടുത്തെന്നാണ് കേസിന്നാധാരം. കള്ളപ്പണം വെളുപ്പിക്കല്‍ തടയല്‍ നിയമ പ്രകാരം ഫയല്‍ ചെയ്ത പ്രോസിക്യൂഷന്‍ പരാതിയില്‍ മുന്‍ കോണ്‍ഗ്രസ് അധ്യക്ഷ സോണിയ ഗാന്ധിയെ രണ്ടാം പ്രതിയാക്കിയാണ് ഇ.ഡി കേസെടുത്തത്. കേസില്‍ സോണിയ ഗാന്ധിക്കും രാഹുല്‍ ഗാന്ധിക്കുമെതിരേ തെളിവുകളുണ്ടെന്ന് ഇ.ഡി അവകാശപ്പെട്ടിരുന്നു.