ഡൽഹി: ഇംഗ്ലണ്ടിനെതിരെയുള്ള അഞ്ച് ടെസ്റ്റ് മത്സരങ്ങളടങ്ങുന്ന പരമ്പരക്കുള്ള ഇന്ത്യൻ ടീമിനെ പ്രഖ്യാപിച്ചു. രോഹിത് ശർമയുടെ വിരമിക്കലിന് ശേഷം ശുഭ്മൻ ഗില്ലിനെയാണ് ഇന്ത്യയുടെ ടെസ്റ്റ് ടീമിന്റെ പുതിയ നായകനായി തെരഞ്ഞെടുത്തത്. ജസ്പ്രീത് ബുംറ, കെഎൽ രാഹുൽ തുടങ്ങിയ താരങ്ങളെ മറികടന്നുകൊണ്ടാണ് സെലക്ഷൻ കമ്മിറ്റി ഗില്ലിനെ ക്യാപ്റ്റനായി പ്രഖ്യാപിച്ചത്.

ഗില്ലിനെ പുതിയ ക്യാപ്റ്റനായി തെരഞ്ഞെടുത്തതിന്റെ കാരണത്തെക്കുറിച്ച് അജിത് അഗാർക്കർ സംസാരിച്ചു.  ദീർഘകാലത്തേക്കായി ടെസ്റ്റ് ടീമിനെ നയിക്കാൻ ഗില്ലിന് സാധിക്കുമെന്നും ഓരോ വർഷവറും ഗിൽ മികച്ച താരമായി വളർന്നുകൊണ്ടിരിക്കുകയാണെന്നുമാണ് അഗാർക്കർ പറഞ്ഞത്.

''ഒന്നോ രണ്ടോ പരമ്പരകൾക്കായി ക്യാപ്റ്റനെ തെരഞ്ഞെടുക്കരുത്. നമ്മൾ ദീർഘകാലത്തേക്ക്  ഒരു ക്യാപ്റ്റനെ നിയമിക്കണം. കാലക്രമേണ  ഗിൽ കാര്യങ്ങൾ പഠിക്കുമെന്ന് ഞങ്ങൾ പ്രതീക്ഷിക്കുന്നു. അദ്ദേഹം മൂന്ന് ഫോർമാറ്റിലും മികച്ച താരമാണെന്നാണ് ഞങ്ങൾ കരുതുന്നത്. കഴിഞ്ഞ വർഷത്തേക്കാൾ മികച്ച ഗുണങ്ങൾ അവൻ ടീമിനായി ചെയ്തിട്ടുണ്ട്. അതാണ് ഞങ്ങൾ ഡ്രസ്സിംഗ് റൂമിൽ നിന്നും കേട്ടത്. ക്യാപ്റ്റനാവാനുള്ള ചില ഗുണങ്ങൾ അവൻ പ്രകടിപ്പിച്ചിട്ടുണ്ട്'' അഗാർക്കർ പത്രസമ്മേളനത്തിൽ പറഞ്ഞു. 

ഏകദിനത്തിലും ടി-20യിലും ഇന്ത്യൻ ടീമിന്റെ വൈസ് ക്യാപ്റ്റനാണ് ഗിൽ. നിലവിൽ ഐപിഎല്ലിൽ ഗുജറാത്ത് ടൈറ്റൻസിനെ നയിക്കുന്നതും ഗിൽ തന്നെയാണ്. ഗുജറാത്തിനെ പ്ലേ ഓഫിലേക്ക് കൈപ്പിടിച്ചുയർത്താനും ഗില്ലിന് സാധിച്ചിട്ടുണ്ട്. 

ടീമിന്റെ വൈസ് ക്യാപ്റ്റനായി വിക്കറ്റ് കീപ്പർ ബാറ്റർ റിഷബ് പന്തിനെയാണ് ടീം നിയമിച്ചത്. ടീമിൽ ഇടംകയ്യൻ പേസർ അർഷദീപ് സിങ് ഇടം നേടി. താരം ഇതാദ്യമായാണ് ടെസ്റ്റ് ടീമിൽ ഇടം നേടുന്നത്. ലയാളി താരം കരുൺ നായരും ഗുജറാത്ത് ടൈറ്റൻസ് ഓപ്പണർ സായ് സുദർശനും ഇടം പിടിച്ചു. നീണ്ട വർഷക്കാലങ്ങൾക്ക് ശേഷമാണ് കരുൺ നായർ ഇന്ത്യൻ ടീമിൽ ഇടം നേടുന്നത്. 

സമീപകാലങ്ങളിൽ ഇന്ത്യ ടെസ്റ്റ് ക്രിക്കറ്റിൽ മോശം പ്രകടനമാണ് നടത്തിയത്. കഴിഞ്ഞ വർഷം നടന്ന ബോർഡർ ഗവാസ്കർ ട്രോഫിയിൽ ഇന്ത്യ ഓസ്ട്രേലിയയോട് 4-1ന് പരാജയപ്പെട്ടിരുന്നു. ഇതിന് പിന്നാലെ ഇന്ത്യക്ക് വേൾഡ് ടെസ്റ്റ് ചാമ്പ്യൻഷിപ്പിന്റെ ഫൈനലിലേക്ക് യോഗ്യത നേടാൻ സാധിക്കാതെ പോവുകയും ചെയ്തിരുന്നു. പുതിയ ക്യാപ്റ്റന്റെ കീഴിൽ ഇന്ത്യ ശക്തമായി തിരിച്ചുവരുമെന്നാണ് പ്രതീക്ഷിക്കുന്നത്. 

Ajit Agarkar explains the reason behind Shubman Gill being appointed as the new captain of the Indian Test cricket team