ന്യൂഡൽഹി: വോട്ടർമാർ പോളിങ് സ്‌റ്റേഷനിൽ പ്രവേശിക്കുമ്പോൾ മൊബൈൽ ഫോൺ കൈവശംവയ്ക്കുന്നത് നിരോധിച്ച് കേന്ദ്ര തെരഞ്ഞെടുപ്പ് കമ്മിഷൻ. എന്നാൽ വോട്ടർമാർക്ക് മൊബൈൽ ഫോണുകൾ സൂക്ഷിക്കാനായി പോളിങ് സ്റ്റേഷനുപുറത്ത് പ്രത്യേക സൗകര്യം ഒരുക്കാൻ കമ്മിഷൻ നിർദേശം നൽകി. 

തെരഞ്ഞടുപ്പ് പരിഷ്‌ക്കരണനടപടികളുടെ ഭാഗമായാണ് തീരുമാനം. 1951ലെ ജനപ്രാതിനിധ്യ നിയമത്തിലെയും 1961ലെ തെരഞ്ഞെടുപ്പ് പെരുമാറ്റച്ചട്ടങ്ങളിലെയും വ്യവസ്ഥകളെ അടിസ്ഥാനമാക്കിയാണ് തീരുമാനമെന്ന് കമ്മിഷൻ പ്രസ്താവനയിൽ വിശദീകരിച്ചു. അടുത്ത് നടക്കുന്ന ബിഹാർ നിയമസഭാ തെരഞ്ഞെടുപ്പ് മുതലായിരിക്കും പരിഷ്‌കരണം നടപ്പാക്കുക.

മറ്റ് നിർദേശങ്ങൾ :

വോട്ടെടുപ്പുദിവസം രാഷ്ട്രീയ പാർട്ടികൾ സ്ഥാപിക്കുന്ന കൗണ്ടറുകൾ പോളിങ് സ്റ്റേഷന്റെ 100മീറ്റർ പരിധിയിൽ പാടില്ല. (നേരത്തെ സ്റ്റേഷൻ പ്രവേശന കവാടത്തിൽ നിന്ന് 200 മീറ്റർ അകലെ മാത്രമേ ഇത്തരം ബൂത്തുകൾക്ക് അനുമതിയുണ്ടായിരുന്നുള്ളൂ).

100മീറ്റർ പരിധിയിൽ പ്രചാരണത്തിനും വിലക്ക്
പോളിങ് സ്റ്റേഷന്റെ 100 മീറ്റർ ചുറ്റളവിൽ മൊബൈൽഫോൺ സ്വിച്ച് ഓഫ് ചെയ്തിരിക്കണം. 
പ്രതികൂല സാഹചര്യത്തിൽ റിട്ടേണിങ് ഓഫിസർമാർക്ക് മൊബൈൽഫോൺ കൈവശം വയ്ക്കാം.
വോട്ടെടുപ്പിന്റെ രഹസ്യ സ്വഭാവം കർശനമായി പാലിക്കണം.
ബൂത്തിൽ പ്രവേശിക്കും മുമ്പ് വോട്ടർമാർ മൊബൈൽ ഫോണുകൾ കൈമാറിയാൽ അവ സംരക്ഷിക്കേണ്ട ഉത്തരവാദിത്തം ഇലക്ടറൽ ഓഫിസർമാർക്ക്.